ايماقتار • 28 قىركۇيەك، 2020

شىمكەنتتە قالانىڭ گەوپورتالى دايىندالىپ جاتىر

206 رەت كورسەتىلدى

بۇل جونىندە شىمكەنت قالاسى اكىمىنىڭ ورىنباسارى ماۋلەن ايمانبەتوۆ ءوزىنىڭ ينستاگرامداعى پاراقشاسىندا جاريالادى، دەپ حابارلايدى Egemen.kz

ونىڭ ايتۋىنشا، شىمكەنت قالاسىنىڭ گەوپورتالى – قالادا ورنالاسقان ءاربىر نىسان تۋرالى تولىق اقپارات جيناقتالاتىن ارنايى سايت بولادى.
 
اتالعان پورتالدى كەزەڭ كەزەڭىمەن ىسكە قوسۋ جوسپارلانىپ وتىر. جىل سوڭىنا دەيىن 1 كەزەڭ ىسكە قوسىلادى دەپ كۇتىلۋدە. وندا جەر قاتىناستارى سالاسىنداعى كورسەتىلەتىن مەملكەتتىك قىزمەتتەردىڭ بارلىعى ەنگىزىلىپ، تولىعىمەن اۆتوماتتاندىرىلادى. ياعني قالانىڭ باس جوسپارى، جەرگە قاتىستى اقپاراتتار، مەكەنجاي انىقتاماسى قوسىلادى.
 
جالپى پورتال - قالا اۋماعىنداعى نىساندار مەن پروتسەستەر تۋرالى شىنايى جانە وزەكتى اقپاراتتى جەدەل الۋعا مۇمكىندىك بەرەدى. جوبا اياسىندا ساۋلەت جانە جەر قاتىناستارى سالاسىندا كاسىپكەرلىك باعىتىنداعى پروتسەستەردى اۆتوماتتاندىرۋ، قىزمەت كورسەتۋ ساپاسىن جوعارىلاتۋ جانە مەرزىمىن قىسقارتۋ جوسپارلانۋدا.
 
اتاپ ايتقاندا، ساۋلەت-جوسپارلاۋ تاپسىرماسىن جانە ينجەنەرلىك كوممۋنيكاتسيالارعا قوسىلۋعا ارنالعان تەحنيكالىق شارتتاردى الۋ، ولاردى كەلىسۋ جانە قۇجاتتاردى بەرۋ سەكىلدى پروتسەستەرىن گەواقپاراتتىق سەرۆيس ارقىلى اۆتوماتتاندىرۋ جۇمىستارى جۇرگىزىلەتىن بولادى.
 
سەرۆيس ارقىلى كەز كەلگەن قالا تۇرعىنى (ينۆەستورلار، كاسىپكەرلەر جانە ت. ب.) جەر ۋچاسكەسى تۋرالى، ونىڭ كاداسترلىق قۇنى، كەپىلدىك جارناسى، جەر ۋچاسكەسىنىڭ ورنالاسقان جەرى جانە وزگە دە اقپاراتتى كورە الاتىنداي ەتىپ ازىرلەنەدى.
 
سونداي-اق، نىساننىڭ ورنالاسۋى جانە سول اۋماقتىڭ دامۋ باعىتىن كورۋ ارقىلى كاسىپكەرلەر ءوز كاسىبىن قانداي كولەمدە جۇرگىزۋ كەرەكتىگىن باعامداي الۋىنا مۇمكىندىك بار. ودان وزگە، كاسىپكەر نەمەسە ينۆەستوردىڭ تەحنيكالىق شارتتاردى دايىنداۋ جانە كەلىسۋ كەزەڭدەرىندە ءوز ءوتىنىشىن باقىلاي الادى.
 
كاسىپكەرلەردى قولداۋدى وڭتايلاندىرۋ ماقساتىندا گازبەن جابدىقتاۋ، ەلەكتر جانە سۋمەن جابدىقتاۋ، جىلۋ جۇيەسىنە قوسۋ، بايلانىس جانە تەلەكوممۋنيكاتسيا جەلىلەرىنە قوسۋعا ارنالعان تەحنيكالىق شارتتاردى الۋ پروتسەستەرى جانە ولاردى كەلىسۋ، سەرۆيس ارقىلى "تەحنيكالىق شارتتار" قۇجاتىن بەرۋ تولىعىمەن اۆتوماتتاندىرىلادى دەيدى پورتالدى دايىنداۋشى ماماندار.
 
اتالعان جوبا اشىقتىق نەگىزىندە جاسالادى. تەحنيكالىق شارتتاردى الۋدىڭ مەرزىمدەرىن قىسقارتادى، ۆەدومستۆوارالىق كەلىسۋ پروتسەسىن جەڭىلدەتەدى.
سوڭعى جاڭالىقتار

تسيرك - الەم نازارىندا

قازاقستان • كەشە

ۇقساس جاڭالىقتار