ايماقتار • 20 قىركۇيەك، 2020

ءبىلىم – باستى قۇندىلىق

37 رەت كورسەتىلدى

Covid-19 ىندەتىنە بايلانىستى جاريالانعان كارانتين كەزىندە باتىسقازاقستاندىق مەكتەپتەر وقۋشىلارعا قاشىقتان ءبىلىم بەرۋ ءۇشىن كەشەندى شارالار اتقاردى، دەپ حابارلايدى Egemen.kz.

جالپى وڭىردە 380 مەملەكەتتىك مەكتەپ جۇمىس ىستەيدى. بۇل ءبىلىم وردالارىندا 111 282 وقۋشى وقىپ جاتىر.

- بيىلعى جاڭا وقۋ جىلى باستالعاندا الەمدى جايلاعان پاندەمياعا بايلانىستى وقۋشىلار مەن قىزمەتكەرلەردىڭ قاۋىپسىزدىگىن، دەنساۋلىعىن قامتاماسىز ەتۋ باستى نازاردا بولدى، - دەيدى باتىس قازاقستان وبلىستىق ءبىلىم بەرۋ باسقارماسىنىڭ باسشىسى ايگۇل مىڭباەۆا.

قىركۇيەكتە سانيتارلىق دارىگەردىڭ رۇقساتىمەن ەپيدەميولوگيالىق جاعدايى قالىپتى ەلدىمەكەندەردەگى 249 مەكتەپ شتاتتىق رەجيمدە جۇمىسىن باستاعان بولاتىن. قازىر بۇل مەكتەپتەردە 24 399 وقۋشى، ياعني بارلىق وقۋشى كونتينگەنتىنىڭ 21،9 پايىزى ادەتتەگىدەي وقىپ جاتىر.

ال 131 مەكتەپتە وقىتۋ قاشىقتان ۇيىمداستىرىلىپ، وقۋشىلاردىڭ 48،7 %-ى (54 273 وقۋشى) قامتىلعان.

ودان بولەك، اتا-انالاردىڭ وتىنىشىمەن 15 وقۋشىدان اسپايتىن كەزەكشى سىنىپتار جۇمىس ىستەۋىنە رۇقسات ەتىلگەن بولاتىن. بۇگىندە وبلىستاعى باستاۋىش سىنىپ وقۋشىلارىنىڭ 66،2 پايىزى، ياعني 32 610 وقۋشى، مەكتەپالدى دايارلىق سىنىپتارىنىڭ 53،3 پايىزى، ياعني 4 286 وقۋشى وسىنداي كەزەكشى سىنىپتاردا ءبىلىم الىپ جاتىر ەكەن.

 

قاۋىپسىزدىك – باستى تالاپ

ارينە، شتاتتىق رەجيمدە جۇمىس ىستەيتىن جانە كەزەكشى سىنىپتارى بار مەكتەپتەر سانيتارلىق-ەپيدەميولوگيالىق تالاپتاردى قاتاڭ ساقتاۋى قاجەت.

- بۇل تالاپتاردى ساقتاۋ ءۇشىن جەرگىلىكتى بيۋدجەت ەسەبىنەن دەزينفيكتسيالىق قۇرالدار، تەپلوۆيزورلار، باكتەريتسيدتى لامپالار ساتىپ الىندى. سونىمەن قاتار، يۋنيسەف حالىقارالىق ۇيىمى ارقىلى تەگىن نەگىزىندە وبلىستىڭ بارلىق شاعىن جيناقتى مەكتەبىنە سانيتايزەرلەر، تەمپەراتۋرالى ولشەۋىش قۇرالدار (تەرموسكانەر) جانە سانيتارلىق نورمالار، گيگيەنالاردى ساقتاۋ، «COVID-19» جونىندە اقپاراتتىق ماتەريالدار تاراتىلدى، - دەيدى ايگۇل مىڭباەۆا.

مەكتەپ عيماراتتارىندا وقۋشىلار ءبىر باعىتتا قوزعالۋى ءۇشىن دالىزدەر ەدەنىندە قوزعالىس بەلگىلەرى سالىندى. ۇلكەن مەكتەپتەردە وقۋشىلار بىرنەشە جەردەن كىرۋى ءۇشىن قوسىمشا ەسىكتەر بەلگىلەندى. ءار وقۋشى جەكە پارتاعا وتىرادى. ساباق بارىسىندا بەتپەردەسىن بىرنەشە مارتە اۋىستىرادى. مەكتەپتىڭ كىرەبەرىسىندە اياقكيىمگە ارنالعان دەزينفەكتسيا كىلەمشەلەرى، بارلىق قاباتتا قولدى وڭدەۋگە ارنالعان سانيتايزەرلەر ورناتىلدى.

 

قاشىقتان وقۋشىلار قاتاردان قالمايدى

جاڭا وقۋ جىلى قارساڭىندا جەرگىلىكتى بيۋدجەتتىڭ ۇنەمدەلگەن قارجىسى ەسەبىنەن 1053 جانە ەل ۇكىمەتى رەزەرۆىنەن 14970 كومپيۋتەرلىك قۇرىلعىنى ساتىپ الۋعا قاراجات بولىنگەن.

بۇل قۇرىلعىلاردى ساتىپ الۋ، كومپيۋتەرلىك تەحنيكانى ءبولۋ بويىنشا «اقجايىق ادالدىق الاڭى» جوبالىق كەڭسەسى باسشىسى توراعالىعىمەن قۇرامىندا اتا-انالار كوميتەتتەرى مەن قامقورشىلىق كەڭەس مۇشەلەرى، قوعامدىق ۇيىم وكىلدەرى بار جۇمىس توبى قۇرىلدى. اۋدان جانە قالا دەڭگەيىندە دە مۇقتاج وقۋشىلارعا كومپيۋتەرلەردى تاراتۋ جۇمىسى قاتاڭ باقىلاۋدا بولدى.

ءسويتىپ، قاشىقتان وقيتىن وقۋشىلاردىڭ سۇراۋىنا ساي مەكتەپ بالانسىنداعى كومپيۋتەرلەر ۋاقىتشا پايدالانۋعا بەرىلە باستادى. كۇنى بۇگىن وقۋشىلارعا 11 212 كومپيۋتەرلىك قۇرىلعى بەرىلگەن ەكەن.

- كومپيۋتەرى جوق قالعان وقۋشىلار ۇكىمەت رەزەرۆىنەن ساتىپ الىناتىن كومپيۋتەرلەر ەسەبىنەن قامتىلادى. بۇل كومپيۋتەرلەر وبلىسقا 1 قازانعا دەيىن جەتكىزىلەدى، - دەيدى باسقارما باسشىسى.

ينتەرنەت بايلانىسى جوق وقۋشىلارعا دا ءتيىستى قۇرىلعىلار ساتىپ الىنىپ، بەرىلۋدە. بيىل ۇيالى بايلانىس وپەراتورلارى قاشىقتان وقىتۋ كەزىندە وقۋشىلارعا ارزانداتىلعان ء«بىلىم» تاريفىن ۇسىندى. وبلىس بويىنشا ءبىلىم بەرۋ ۇيىمدارى ارقىلى بۇل تاريفپەن 2 مىڭعا جۋىق وقۋشى قامتىلعان.

 

قۇرىلىس تا قارقىندى

كارانتين سالدارىنان مەكتەپ عيماراتتارىنداعى «دەمالىستى» پايدالانىپ، مەكتەپتەردى جاڭارتۋ، ماتەريالدىق-تەحنيكالىق بازانى جەتىلدىرۋ ءىسى قارقىندى ءجۇرىپ جاتىر.

ورال قالاسىنداعى زاشاعان كەنتىندە 2 مەكتەپ ءۇش اۋىسىمدا قىزمەت ەتەتىن. كوپ قاباتتى ۇيلەر ءجيى سالىنىپ، تۇرعىندار سانى ارتقان جاڭا مەكتەپ عيماراتىن سالۋ وزەكتى بولعان. مىنە، وسى تاپشىلىقتى جويۋ ماقساتىندا قازىر 900 ورىندىق جاڭا مەكتەپ قۇرىلىسى ءجۇرىپ جاتىر.

ودان بولىك، جاقىندا عانا شەتەل ينۆەستيتسياسى ەسەبىنەن سالىنعان 450 ورىندىق مەكتەپ عيماراتى پايدالانۋعا بەرىلىپ، ورال قالاسىنداعى ەستەتيكالىق باعىتتاعى گيمنازيا ءۇش اۋىسىمدىلىقتان قۇتىلدى.

سونداي-اق وڭىردە اپاتتى مەكتەپتەردىڭ ورنىنا 4 مەكتەپ قۇرىلىسى جاڭادان سالىنىپ جاتىر. سونىڭ ىشىندە اقجايىق اۋدانىنىڭ چاپاەۆ اۋىلىندا 100 ورىندىق ينتەرناتىمەن 300 ورىندىق اباي مەكتەپ گيمنازياسى جانە قازتالوۆ اۋدانىندا 60 ورىندىق سارىقۇدىق نەگىزگى مەكتەبى قۇرىلىسى بيىل اياقتالادى.

- اپات جاعدايىندا تۇرعان جانە ءۇش اۋىسىمدا وقىتاتىن مەكتەپتەردىڭ قۇرىلىسىنا جەكە ينۆەستورلار تارتىلىپ جاتىر. مىسالى، «نۇركاپسترويگاز» كومپانياسى زاشاعان كەنتىندە 900 ورىندىق، «كاز-حولل» كومپانياسى ورال قالاسىندا №31 ورتا مەكتەپ عيماراتىنىڭ قۇرىلىس جۇمىسىن باستايدى، - دەيدى ايگۇل ادىلگەرەيقىزى.

بۇدان بولەك، مەملەكەتتىڭ «اۋىل بەسىگى»، «جۇمىسپەن قامتۋدىڭ جول كارتاسى» باعدارلامالارى اياسىندا 33 ءبىلىم بەرۋ نىسانىنا كۇردەلى جوندەۋ جانە قايتا جاڭعىرتۋ جۇمىسى دا قاتار ءجۇرىپ جاتىر. بۇل مەملەكەتىمىزدىڭ قيىن كەزدە دە ءبىلىم سالاسىنا باسىمدىق بەرىپ، قارجى اياماي وتىرعانىن كورسەتەدى.

 

سوڭعى جاڭالىقتار

ەلورداعا قارجى قۇيۋعا نيەتتى

ەلوردا • بۇگىن، 16:50

29-31 قازان كۇندەرى كۇن جىلىنادى

اۋا رايى • بۇگىن، 12:40

قانداستار ماسەلەسى تالقىلاندى

ساياسات • بۇگىن، 08:12

كوشە كامەراسىنىڭ كومەگى

ايماقتار • بۇگىن، 07:57

ۇقساس جاڭالىقتار