تەاتر • 18 قىركۇيەك، 2020

"دون پاسكۋالە" سپەكتاكلىنىڭ پرەمەراسى ونلاين فورماتتا وتەدى

19 رەت كورسەتىلدى

"استانا وپەرا" مەملەكەتتىك وپەرا جانە بالەت تەاترىنىڭ كامەرالىق زالى ساحناسىندا گ.دونيتسەتتيدىڭ "دون پاسكۋالە" وپەراسىنىڭ پرەمەراسى وتپەك. سپەكتاكل كورەرمەنگە 2-3 قازاندا Tengri TV-دەن ونلاين-رەجيمدە ۇسىنىلماق، دەپ حابارلايدى Egemen.kz

ءبىز وسىعان بايلانىستى سپەكتاكلدىڭ ستسەنوگرافى ءارى كوستيۋمدەر بويىنشا سۋرەتشىسى مانانا گۋنيا مەن كوركەمدىك جەتەكشىسى اللا سيمونيشۆيليدەن جاڭا قويىلىمعا دايىندىقتىڭ بارىسى مەن سپەكتاكلدىڭ ەرەكشەلىكتەرى تۋرالى ايتىپ بەرۋىن سۇراعان ەدىك.

– مۇندا وقيعالار جەلىسى وتكەن عاسىردىڭ باستاپقى جىلدارىنا، ياعني BELLE EPOQUE داۋىرىنە اۋىستىرىلادى. بۇل – ادامزات تاريحىندا ەلەۋلى وقيعالار ورىن العان ايرىقشا  ءداۋىر، ەۋروپا قوعامىندا الەۋمەتتىك ءارى ەكونوميكالىق داعدارىس تۋىنداي باستاعان ناعىز اۋمالى-توكپەلى كەزەڭ، الدا ءبىرىنشى دۇنيەجۇزىلىك سوعىس، ەسكى قوعام ءوزىن-ءوزى جويىپ، قۇلدىراۋعا ۇشىرايدى، الايدا ونىڭ ورنىنا تىڭ دۇنيە كەلە قويماعان ءسات، انىعىن ايتقاندا، زيالى قاۋىمنىڭ ورنىن الاياقتار، وزىندىك ۇستانىمى جوق ارسىز ادامدار باسۋعا تىرىسقان كەز ەدى. مورالدىق، مادەني ءارى الەۋمەتتىك قۇندىلىقتاردى قايتا باعالاۋ – ۇلكەن ماڭىزعا يە. ءار كەيىپكەردىڭ بويىنان اشكوزدىك، مەنمەندىك، كۇندەستىك سياقتى وپاسىز سەزىمدەر اتقاقتايدى... ولاردىڭ ارقايسىسى ۇلكەن ءبىر ىمىراعا بارىپ، تۇبىندە ءوز ماقساتىنا جەتەدى. دراماتۋرگ دونيتسەتتيدىڭ كەمەڭگەرلىگى جۇمىر باستى پەندەگە ءتان ورەسىزدىك پەن ادەپسىزدىكتى كۇلكىمەن ءارى ازىلمەن جەتكىزەدى، كورەرمەننىڭ كوكەيىندە وي قالدىرادى، كەيىپكەرلەردىڭ بويىنان ءوز ءمىنىن سەزىنىپ، ويلانۋعا مۇمكىندىك بەرەدى.

سپەكتاكلدىڭ بەزەندىرىلۋىنە ارقاۋ بولعان ART NOUVEAU (ارت-نۋۆو) نەمەسە مودەرن ءستيلى دەكادانستىڭ نازىكتىگىن باسا كورسەتىپ تۇر. ءپىشىننىڭ تالعامپازدىعى، ماتەريالداردىڭ ەكلەكتيكاسى، تۇستەر گامماسى ءسان-سالتانات پەن مامىراجاي احۋالدى تۋىنداتادى. وقيعا دون پاسكۋالە دا كورنەتوعا تيەسىلى ريمدىك قوناق ۇيدە وتەدى. تۇتاس قابىرعانى الاتىن ۇلكەن تەرەزەلەر ساحنادا بولەك ءبىر الەمنىڭ تىنىسىن سەزدىرەدى جانە تۇستەر مەن جارىق تابيعي تۇردە قۇبىلىپ وتىرادى، وقيعانىڭ، ارەكەتتىڭ شىنايى قابىلدانۋىنا اسەر ەتەدى، سوڭعى كورىنىستە كوكتەمگى باققا اينالىپ شىعا كەلەدى. دەكوراتسيالاردىڭ ترانسفورماتسياسى ءزاۋلىم قوناق ءۇيدىڭ كۇندەلىكتى تىرشىلىگىن جاقىننان باقىلاپ وتىرعانداي اسەرگە قالدىرادى. BELLE EPOQUE سوڭىنداعى كوستيۋمدەر باستى كەيىپكەرلەردىڭ الەۋمەتتىك ءارى پسيحولوگيالىق سيپاتىن اشا تۇسەدى. اسىرەسە باس قاھارمان نورينانىڭ ۆيزۋالدى ترانسفورماتسياسى قارقىندى داميدى. دون پاسكۋالەنىڭ بەينەسى جاڭا قىرىنان ۇسىنىلادى. ول ەزۋگە كۇلكى ۇيىرەتىن قارت ەمەس، ەگدە تارتقان «دەندي»، اقسۇيەك ازامات رەتىندە سيپاتتالادى. ونىڭ كوستيۋمدەرى قاتاڭ ەدۆارديان ستيلىندە جاسالعان جانە كەيىپكەردىڭ سىرباز دا سىمباتتى تۇلعاسىن اشا تۇسەدى. حور مەن ميمانس ماڭىزدى ءرول اتقارادى، ءاربىر ءارتىستىڭ كوستيۋمى كەيىپكەرلەردىڭ جەكە-دارا مىنەز-قۇلقىنا لايىقتالعان.  "دون پاسكۋالە" ماعان زور قۋانىش سىيلادى، سەبەبى بۇل وپەرا ونى ءتۇرلى قىرىنان ايشىقتاپ ۇسىنۋعا مۇمكىندىك تۋعىزادى. ەركىن كوسىلىپ، شىعارماشىلىقپەن اينالىسۋعا بەرىلگەن مۇمكىندىك ءۇشىن وتە قۋانىشتىمىن، – دەپ اڭگىمەسىن تۇيىندەدى مانانا گۋنيا.

ال قويىلىمنىڭ كوركەمدىك جەتەكشىسى اللا سيمونيشۆيلي  وپەرانىڭ رەپەرتۋارداعى تاڭداۋلى سپەكتاكلدەر ساناتىنا قوسىلاتىنىن ايتتى. سونداي-اق دراماتۋرگيالىق جيناقىلىعى، ازىلمەن ورىلگەن قۇلاققا جاعىمدى ءماتىن جەڭىل ءارى تەز قابىلداناتىنىنا سەندىردى.

– كومپوزيتور داۋىس ەرەكشەلىگى مەن وركەستر ويىنىن ءوز دەڭگەيىندە تاماشا پايدالانعان. ءوزىن جاس سەزىنەتىن ەگدە جاستاعى ەر ادامدى (باس) سيپاتتاي وتىرىپ، كومپوزيتور بي ىرعاعىن پايدالانادى، الاياق قۋدىڭ (باريتون) بەينەسى وزىنە لايىق تۇرپاتتاعى سوزدەرمەن، ادەمى اۋەنمەن، عاشىقتىقتان باسى اينالعان بوزبالا (تەنور) كەرنەيدىڭ "مۇڭدى" دارا سازىمەن، ال مىنەزى شاتاق جاس ايەل بەينەسى جارقىن كولوراتۋرامەن بەرىلگەن. وپەرا پارتيتۋراسىنداعى اريالاردا، دۋەتتەردە، انسامبلدەردە... ءۆالستىڭ ىرعاعى باسىم، بۇل دا، ارينە، كەزدەيسوقتىق ەمەس. ءۆالستى بارلىق تۇلعالار تارتىلىپ كەتە باراتىن ءومىردىڭ شەكسىز ءيىرىمى رەتىندە قاراستىرۋعا بولادى جانە ونىڭ بارلىعى قايتالانىپ وتىرادى. 

دون پاسكۋالەنىڭ وقيعاسى وتە قاراپايىم، سولاي بولا تۇرا، ايشىقتى. اۆتور ءوز وپەراسىن dramma buffa (كۇلكىلى دراما) دەپ بەكەر اتاماسا كەرەك. وسى ارقىلى ول ءوز ماقساتىنا قول جەتكىزۋ جولىن ىزدەپ جۇرگەن كەيىپكەرلەردىڭ اراسىنداعى قارىم-قاتىناستى تولىق قامتي العان. وپەرانىڭ كومەديالى سيپاتىن ەمەس، انىعىندا، ونىڭ ساتيرالىق قىرىن ايرىقشا اتاپ كورسەتكەن. بۇنداي جاعداي بۇگىنگى قوعامدا دا كوپتەپ كەزدەسەدى. سول سەبەپتى دە قويىلىمدى ەسكىرمەيتىن، زامانا تىلىمەن جىرلانعان كلاسسيكالىق تۋىندى دەۋگە تولىق نەگىز بار. كىسىنى ءوزىنىڭ ىشكى الەمىنە، بولمىسىنا ۇڭىلۋگە، كوپ نارسەنى قايتا باعالاۋعا مۇمكىندىك بەرەدى. ونەردىڭ باستى ماقساتى وسىندا، دەيدى اللا سيمونيشۆيلي.

قويىلىمنىڭ قويۋشى ديريجەرى  – قازاقستاننىڭ ەڭبەك سىڭىرگەن قايراتكەرى ابزال مۇحيتدين، قويۋشى رەجيسسەرى – ناتاليا كاگادي. باس حورمەيستەرى – قازاقستاننىڭ ەڭبەك سىڭىرگەن قايراتكەرى ەرجان ءداۋىتوۆ، جارىق بويىنشا سۋرەتشىسى – سەرگەي كۋلاك. جوبا ۇيلەستىرۋشىسى – مارجان جاكەنوۆا. ونلاين-پرەمەرا ساعات 18:00-دە جانە 19:00-دە وتپەك.

 

 

سوڭعى جاڭالىقتار

ساقتانساڭ – ساۋ بولارسىڭ

ايماقتار • بۇگىن، 23:00

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار