كلينيكالىق سىناقتان وتكىزۋگە رۇقسات العان QazCovid-in® ۆاكتسيناسىن عىلىم كوميتەتىنىڭ بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى ازىرلەدى. عىلىم كوميتەتىنىڭ اقپاراتىنا سۇيەنسەك, وتاندىق ۆاكتسينانىڭ كلينيكالىق سىناقتارىنا 627 ادام قاتىسۋعا نيەت ءبىلدىردى. بۇعان دەيىن اتالعان ينستيتۋتتىڭ عالىمدارى ەكپەنى سىناقتان وتكىزۋگە نيەتتى ەرىكتىلەردى ىزدەستىرۋ جۇمىسىنىڭ باستالعانىن حابارلاعان. بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى (بقپعزي) قازاقستاندىق كوروناۆيرۋس ۆاكتسيناسىنىڭ كلينيكالىق سىناقتارىنا قاتىسۋعا ەرىكتىلەر تارتۋدى جالعاستىرىپ جاتىر.
بقپعزي باس ديرەكتورى كۇنسۇلۋ زاكاريا بۇل تۋرالى:
«قۇجاتتاردى قابىلداۋ وسى جىلدىڭ 10 قىركۇيەگىندە اياقتالادى. از عانا ۋاقىتتىڭ ىشىندە 627 ادام ءبىز جاساعان ۆاكتسينانى وزدەرىنە سالدىرۋعا نيەت ءبىلدىردى. ءبىرىنشى كەزەڭدە 44 ادامدى, ەكىنشىسىندە 200 ادامدى تاڭداۋدى جوسپارلاپ وتىرمىز. قازاقستاندىقتاردىڭ وتاندىق ۆاكتسيناعا دەگەن سەنىمىنە, وڭ كوزقاراس تانىتۋىنا, جاعىمدى موتيۆاتسياسى مەن پاتريوتيزمىنە قۇرمەتىمىز بولەك. مۇنداي سەنىم ءىس جۇزىندەگى دەمەۋ عانا ەمەس, سونىمەن قاتار ءبىز سياقتى ءوندىرۋشى ءۇشىن جانە بۇكىل قازاقستاندىق عىلىمعا ۇلكەن مورالدىق قولداۋ بولاتىنى انىق. 627 ادامنىڭ ارقايسىسى, ءتىپتى ولار ەرىكتىلەر قاتارىنا كىرمەي قالسا دا (244 ادام عانا ەرىكتى بولۋعا تاڭدالىپ الىنادى, وسى تىزىمگە كىرمەي قالاتىندار جونىندە ءسوز بولىپ وتىر – ا.ش.), ءبىز ءۇشىن باتىر دەۋگە بولادى. ءبىز ولارعا بارلىق قازاقستاندىقتاردىڭ دەنساۋلىعى مەن قاۋىپسىزدىگىن ساقتاۋعا قوسقان جەكە ۇلەسى ءۇشىن وتە ريزامىز», دەدى.
ەسكە سالا كەتەيىك, 31 شىلدەدە دۇنيەجۇزىلىك دەنساۋلىق ساقتاۋ ۇيىمى QazCovid-in® كوروناۆيرۋسقا قارسى قازاقستاندىق يناكتيۆتەلگەن ۆاكتسينانى كلينيكالىق سىناقتارعا جىبەرىلگەن كانديدات ۆاكتسينالار تىزىمىنە ەنگىزدى.
ينستيتۋت ديرەكتورى باستاعان جەتى ۆاكتسينا جاساۋشى عالىم ۆيرۋسپەن جۇمىس كەزىندە قاۋىپسىزدىگىن قورعاۋ ءۇشىن وزدەرى ازىرلەگەن ەكپەنى ءبىرىنشى بولىپ سالدىردى. تەست ناتيجەلەرى بويىنشا ۆاكتسينا سالعانداردىڭ بارىندە ۆيرۋسقا قارسى انتيدەنەلەر پايدا بولدى, قىزمەتكەرلەردىڭ دەنى ساۋ جانە عىلىمي-تەحنيكالىق باعدارلاما شەڭبەرىندە جۇمىستارىن جالعاستىرىپ جاتىر.
