جۋىردا مادەنيەت جانە سپورت مينيسترلىگىنىڭ باستاماسىمەن «جاز اۋەندەرى» جوباسى جۇزەگە اسىرىلدى دەگەن جىلى حاباردى كوزىمىز شا­لىپ قال­دى. قازاقستاندىقتارعا وبلىس­تىق كونتسەرتتىك ۇيىمداردىڭ ۇز­دىك كون­تسەرتتەرى جيناعىن ۇسىنۋعا باعىت­تالعان اتالمىش جوبا اعىمداعى جىل­دىڭ 24 شىلدەسى كۇنى اقتوبە وبلىسى ونەرپاز­دارىنىڭ  كونتسەرتىمەن باستاۋ الىپ­تى.

جالپى، الەمدىك كوروناۆيرۋس پان­دەمياسى كەزىندە YouTube ارنا­سى­نىڭ الدىنا جينالعان جۇرتتىڭ كوبەي­گەنىن بايقاۋ قيىن ەمەس. ارنا ءوز كورەرمەندەرىنە رۋحاني دەم بەرۋ­دە ءبىرشاما جۇمىس اتقارىپ وتىر. كاران­تين كەزىندە قازاقستاندىق ۇزدىك شىعارماشىلىق ۇجىمداردىڭ ونەرىن قولداۋ، ۇلتتىق قۇندىلىقتاردى ناسيحاتتاۋ، ونەردىڭ ءتۇرلى جانرلارىن كەڭى­نەن دارىپتەۋدە قازنەت قادام­دارىنىڭ بۇل باعىتتا جەمىستى ەكەنىن ايتا كەتۋىمىز كەرەك.

جوعارىداعى جوبا دا وسى الاڭ ارقىلى «قازاقكونتسەرت» مەملەكەتتىك كونتسەرتتىك ۇيىمى» جانىنداعى كون­تسەرتتىك-گاسترولدىك قىزمەت ورتالى­عىنىڭ جۇمىسىن جانداندىرىپ وتىر.

بۇگىنگە دەيىن 15 ءوڭىردىڭ فيلارمونيالارى جانىنداعى شىعارماشىلىق ۇجىمداردىڭ ونلاين-كونتسەرتتەرى مينيسترلىكتىڭ وسى YouTube ارناسى ارقىلى كورسەتىلىپ، كورەرمەندەرگە ۇسىنىلعان. جوبا تامىز ايىنىڭ سوڭىنا دەيىن جالعاسىپ، وعان 30-دان استام كونتسەرتتىك ۇيىمدار تارتىلادى دەپ كۇتىلۋدە ەكەن.

ەڭ قىزىعى، جوبانىڭ جۇزەگە اسىرىلۋى بارىسىندا قارالىم جونىنەن وڭىرلەردىڭ ءوزارا باسەكەلەسۋى دە باي­قالادى. ماسەلەن، قىزىلوردا، ال­ماتى، شىعىس قازاقستان وبلىس­تارىنىڭ فيلارمونيالارى ۇسىنعان ونلاين-كونتسەرت كورەرمەندەرىنىڭ بەلسەندىلىگى وسى ۋاقىت ارالىعىندا ايتار­لىقتاي ارتقان.

كونتسەرتتىك-گاسترولدىك قىزمەت ورتالىعى جاڭا جوبانى الەۋمەتتىك جەلى تەتىكتەرى ارقىلى الدىن الا جار­­­نا­مالاپ جولعا قويعانى دا ونەر­پاز­داردىڭ شابىتىن ارتتىرعان سى­ڭايلى.

ەسەپتى مەرزىمگە قاراساڭىز كون­تسەرتتەردىڭ ونلاين-كورسەتىلىم­دەرىن 4 000-نان استام ادام تاماشالاپ، وڭ پىكىرلەرىن قالدىرعان.

بۇل دەگەنىڭىز، ءبىر مەزەتتە ءتورت مىڭ ادامدىق ءزاۋلىم زالدى تولتىرىپ انشلاگپەن كونتسەرت بەرگەندەي ۇلكەن جەتىستىك.

شاپالاعىن شىنى ەكراننىڭ ار جاعىنان سوعىپ وتىرعانى بولماسا تىڭدارمانداردىڭ كوڭىلىنە بۇل دا بولسا جاز شۋاعىن سىيلاپ وتىر.