23 ماۋسىمدا قر پرەمەر-ءمينيسترى مەملەكەت باسشىسىنىڭ توراعالىعىمەن وتكەن BIZ BIRGEMIZ جالپىۇلتتىق ونلاين فورۋمىنا قاتىستى. قاسىم-جومارت توقاەۆ ءوز سوزىندە الەمنىڭ بارلىق ەلى, ونىڭ ىشىندە قازاقستاننىڭ دا كوروناۆيرۋس ىندەتىنە قارسى كۇرەسىپ جاتقانىن ايتتى. وسىعان وراي, مەملەكەت تاراپىنان اسا ماڭىزدى شارالار قولعا الىندى.
دۇيسەنبى كۇنى قر پرەمەر-ءمينيسترى پارلامەنتتىڭ قوس پالاتاسى دەپۋتاتتارىنىڭ بىرلەسكەن وتىرىسىندا ۇكىمەتتىڭ 2019 جىلعى جۇمىسى جانە ەكونوميكانى ودان ءارى دامىتۋ بويىنشا قابىلدانىپ جاتقان شارالار تۋرالى ەسەپ بەردى. ۇكىمەت باسشىسى مۇنايعا الەمدىك باعانىڭ تومەندەۋىنە جانە سىرتقى ەكونوميكالىق كونيۋنكتۋرانىڭ ناشارلاۋىنا قاراماستان, 2019 جىلدىڭ قورىتىندىسى بويىنشا قازاقستان ەكونوميكاسىنىڭ سوڭعى 6 جىلداعى ەڭ جوعارى ءوسىمى – 4,5%-عا قول جەتكىزىلگەنىن اتاپ ءوتتى.
26 ماۋسىمدا ا.مامين "Nur Otan" پارتياسى فراكتسياسىنىڭ كەڭەيتىلگەن جيىنىنا قاتىسىپ, "Nur Otan" پارتياسىنىڭ سايلاۋالدى باعدارلاماسىن جۇزەگە اسىرۋ ناتيجەلەرى تۋرالى ەسەپ بەردى.
سەيسەنبى كۇنى قر پرەمەر-ءمينيسترىنىڭ توراعالىعىمەن وتكەن ۇكىمەتتىڭ كەزەكتى وتىرىسىندا بيزنەس احۋالدى جاقسارتۋ جونىندەگى شارالار جانە جىلىتۋ ماۋسىمىنا دايىندىق بارىسى قارالدى. ۇكىمەت باسشىسى بارلىق ءوڭىردىڭ كاسىپكەرلەرىمەن ماسەلەنى تالقىلاۋ قورىتىندىسى بويىنشا بيزنەستى قولداۋ جونىندەگى 43 قوسىمشا شارادان تۇراتىن ءىس-شارالار جوسپارى ازىرلەنگەنىن اتاپ ءوتىپ, مەملەكەتتىك ورگاندار مەن اكىمدىكتەرگە بارلىق جوسپارلانعان ءىس-شارالاردىڭ ورىندالۋىن قامتاماسىز ەتۋدى تاپسىردى. ەكىنشى سۇراقتى قاراۋ كەزىندە اسقار مامين وڭىرلەردىڭ اكىمدىكتەرىنە الداعى جىلىتۋ ماۋسىمىنا ساپالى دايىندىق شارالارىن كۇشەيتۋدى, بارلىق جوسپارلانعان جوندەۋ جۇمىستارىن ۋاقىتىلى اياقتاۋدى جانە تۇرعىن ءۇي-كوممۋنالدىق شارۋاشىلىق, دەنساۋلىق ساقتاۋ جانە الەۋمەتتىك سالانىڭ بارلىق نىسانىنىڭ جىلىتۋ ماۋسىمىنا دايىندىعىن قامتاماسىز ەتۋدى تاپسىردى.
بەيسەنبى كۇنى اسقار مامين مەملەكەت باسشىسىنىڭ جارلىعىمەن تاعايىندالعان مينيستر الەكسەي تسويدى دەنساۋلىق ساقتاۋ مينيسترلىگىنىڭ ۇجىمىنا تانىستىردى. پرەمەر-مينيستر كوروناۆيرۋس پاندەمياسىمەن كۇرەس جاعدايىندا حالىق دەنساۋلىعىن ساقتاۋ بويىنشا دەنساۋلىق ساقتاۋ جۇيەسىنىڭ الدىندا تۇرعان مىندەتتەردى شەشۋدىڭ ماڭىزدىلىعىن اتاپ ءوتتى.
سارسەنبى كۇنى قر پرەمەر-ءمينيسترى اسقار ءماميننىڭ توراعالىعىمەن قازاقستان رەسپۋبليكاسى پرەزيدەنتى جانىنداعى "جاسىل ەكونوميكاعا" كوشۋ جونىندەگى كەڭەس وتىرىسى ءوتتى. وتىرىسقا قاتىسۋشىلار قالدىقتاردى باسقارۋ جۇيەسىن جاقسارتۋ, جاڭارتىلاتىن ەنەرگيا كوزدەرىن دامىتۋ, ەلدى مەكەندەردى گازداندىرۋ جانە «تازا» كولىكتى دامىتۋ ارقىلى اۋانىڭ لاستانۋىن تومەندەتۋ ماسەلەلەرىن قارادى.
سول كۇنى قر پرەمەر-ءمينيسترى اسقار مامين قر پرەزيدەنتى جانىنداعى تسيفرلاندىرۋدى ەنگىزۋ ماسەلەلەرى جونىندەگى كوميسسيا وتىرىسىن وتكىزدى. ۇكىمەت باسشىسى يندۋستريا جانە ينفراقۇرىلىمدىق دامۋ مينيسترلىگىنە ءبىر اي مەرزىمدە يندۋستريا 4.0 ەلەمەنتتەرىن دامىتۋ جانە "مودەلدى تسيفرلىق فابريكالار" جوباسىن كەڭەيتۋ بويىنشا رەتتەۋشى جانە ىنتالاندىرۋشى شارالار كەشەنى بويىنشا ءىس-شارالار جوسپارىن ازىرلەۋدى تاپسىردى.
