«شاپاعاتتىڭ» 200-دەن استام تۇرعىنىنىڭ ىشىندە 42 ادامنان كوروناۆيرۋس انىقتالعان ەدى. تەرى-ۆەنەرولوگيالىق اۋرۋحانادا جابدىقتالعان پروۆيزورلىق ورتالىق تاۋلىك بويى مەديتسينالىق باقىلاۋ جۇرگىزۋدە. بۇگىنگى تاڭعا دەيىن مۇندا ۆيرۋس جۇقتىرعان جاندارمەن بايلانىستا بولعان 143 ازامات تەكسەرۋدەن ءوتتى. قاۋىپتى ىندەت 10 ادامنان انىقتالىپ وتىر. دارىگەرلەر باقىلاۋىنا الىنعان ەرەكشە توپ «شاپاعات» ارنايى الەۋمەتتىك كومەك كورسەتۋ ورتالىعىنىڭ قامقورلىعىنداعى جاندار. 10 ءساۋىر كۇنى كەلىپ تۇسكەن 24-ءىنىڭ اۋرۋعا شالدىقپاعانى راستالدى.
–تسەلينوگراد اۋدانىنداعى بۇل ورتالىقتان ىندەت وشاعى انىقتالعان بولاتىن. ولاردىڭ كوپشىلىگى ارنايى مەديتسينالىق كۇتىمدى تالاپ ەتەتىن جاندار. كوروناۆيرۋسقا تەست ەكى رەت تاپسىرىلدى. ناتيجە تەرىس, ياعني, اۋرۋ انىقتالمادى. بارلىق پاتسيەنتتەردىڭ دەنساۋلىق جاعدايى قالىپتى, اۋرۋ بەلگىلەرى جوق,–دەيدى پروۆيزورلىق ستاتسيوناردىڭ جەتەكشىسى جامبىل قابدىراشيتوۆ.
ىندەت جۇقتىرۋ قاۋپى بار ازاماتتار تەمىرجولشىلار اۋرۋحاناسى, قالالىق اۋرۋحانا مەن تەرى-ۆەنەرولوگيالىق اۋرۋحاناسىندا دا مەديتسينالىق تەكسەرۋدەن وتۋدە. مۇندا دارىگەرلەر ەكسترەمالدى جاعدايدا قىزمەت اتقارىپ وتىر دەۋگە بولادى. اۋىسىم ءار ەكى اپتا سايىن, بارلىق مەديتسينالىق قىزمەتكەرلەر وتباسىنان, تۋعان-تۋىستارىنان وقشاۋلانىپ, جەكە جاتاقحانادا قونىستانعان. دەنساۋلىعى سىر بەرگەن, ەگدە تارتىپ, كىسى قولىنا قاراپ قالعان «شاپاعاتتىقتار» اق حالاتتى ابزال جانداردىڭ ەڭبەگىنە العىس بىلدىرۋدە.
بۇل اۋىسىمداعى 34 ماماننىڭ وزدەرى دە 14 كۇن سايىن تەكسەرۋدەن وتكىزىلەدى. قازىر مۇندا نەبارى 11 كۇدىككە ىلىنگەن ادام قالعان. ولاردىڭ ينكۋباتسيالىق مەرزىمى 30 ساۋىردە اياقتالادى.
