ءان ءسوزىن جازعان كوكشە وڭىرىنە تانىمال اقىن, سال-سەرىلىك ءداستۇردى جالعاستىرۋشى يران سال تاسقارا. اۋەنى سازگەر ەرلان تاشەۆتىكى. قالانىڭ شىعارماشىل زيالى قاۋىمى توتەنشە جاعداي كەزىندە كوكشەتاۋلىقتاردى قولداۋ ماقساتىندا وسى انگە بەينەبايان ءتۇسىرىپ, حالىقتى سابىرلىققا جانە بىرلىككە شاقىرۋدا. «جاسا, كوكشەتاۋىم» ءانى قالالىق مادەنيەت ءبولىمىنىڭ سۇراۋى بويىنشا 1998 جىلى جازىلعان.
– ولەڭ شۋماقتارىن جارتى ساعاتتىڭ ىشىندە قاعاز بەتىنە تۇسىرگەن ەدىم,– دەپ ەسكە الادى بۇگىندە يران سال تاسقارا.
اتاسىنىڭ تۋعان جەرى كوكشەتاۋ وڭىرىنە قونىس اۋدارۋى بۇل ولەڭ جولدارىنىڭ كوكىرەكتەن قۇيىلىپ تۇسۋىنە سەبەپ بولعان ەكەن. ولەڭنىڭ جىپ-جىلى بولىپ, جانىڭدى شۋاقتاندىراتىن ساۋلەسى از ەمەس. ءار ءسوزدىڭ استارىنداعى وي تۋعان جەردىڭ قاسيەتىن اسقاقتاتىپ تۇرعانداي. ال, سازگەر ەرلان تاشەۆ ءار نوتادا پاتريوتتىق سەزىم مەن بىرلىكتى, ىنتىماقتاستىقتى جەتكىزۋگە تىرىسىپتى. ءاندى جوبالاپ ويلاستىرىپ, ۇلگىلەرىن جاساۋعا ءبىر اپتا ۋاقىت كەتكەن. سوڭىندا ءتاپ-ءتاۋىر تۋىندى دۇنيەگە كەلدى.
– ول كەزدە جاعداي قيىن بولاتىن. قالانىڭ وبلىس ورتالىعى دەگەن مارتەبەسى جوق ەدى. جارىق جوق, جولدار ناشار, جۇمىس كوزى دە تاپشى. كاسىپورىنداردىڭ جۇمىسى ىركىلگەن. سول كەزدە حالىقتىڭ رۋحىن قالاي دا كوتەرۋ كەرەك بولدى. ماحاببات تۋرالى جازۋ وڭاي. وتانعا دەگەن ماحابباتتى جەتكىزۋ قيىن. جەرگىلىكتى ءانشى بيبىگۇل ىسقاقوۆا بۇل ءاندى شىرقاعاندا ادامداردىڭ كوزىنە جاس كەلەتىن,–دەيدى سازگەر ەرلان تاشەۆ.
ەلدەگى جاريالانعان توتەنشە جاعداي شىعارماشىلىقتى ونلاين فورماتقا اۋىستىردى. بۇل قيىن كەزەڭدە كوكشەتاۋلىق اۋدارماشى باقىت مۇحامەدراحيموۆا «جاسا, كوكشەتاۋىم» ءانىن ەسكە الىپ, قالا حالقىنىڭ رۋحىن كوتەرۋ ماقساتىندا ولەڭدى ورىس تىلىنە اۋدارىپ, بەينەبايان ءتۇسىرىلىمىن ۇيىمداستىردى.
ءان اۋەنى, مازمۇنى مەن ماڭىزى كوڭىلگە مەدەۋ, داتكە قۋات.
كوكشەتاۋ قالاسى
