ءبىر عانا باتىرلاردىڭ ساۋىت-سايمانىڭ جاساۋ ءۇشىن جارتى جىل ۋاقىتىن جۇمساپتى. قازىر بۇل تۋىندى وبلىستىق مالىك عابدۋللين مۋزەيىندە تۇر.
–مەكتەپ جاسىنان بەينەلەۋ مەن ەڭبەك ساباقتارىندا سۋرەت سالىپ, اعاشتان, مەتاللدان ءتۇرلى بۇيىمدار جاساپ ۇيرەندىم. قورعاسىندى ەرىتىپ, ونى قۇيىپ ءبىر پىشىنگە كەلتىرىپ ءجۇردىم. اعاشتان دا كوپ دۇنيە ىستەدىم. تەرى يلەپ, تورسىق, سابا جاسادىم. ۋنيۆەرسيتەت بىتىرگەن سوڭ زەرگەرلىك ونەرگە بەت بۇردىم. قيىن ونەردىڭ قىر-سىرىن قاپىسىز مەڭگەرۋ ءۇشىن كوپتەگەن ۇستالاردان ءدارىس الدىم. اسىرەسە, ون ساۋساعىنان ونەر تامعان قۇرمان بازيلينوۆ دەگەن ۇستادان كوپ ۇيرەدىم. ول كىسى ماعان مەتالل وڭدەۋ جونىندە كوپ قۇندى كەڭەس بەردى. سونداي-اق, تاستىڭ ءتىلىن ءتۇسىندىردى, دەيدى شەبەر رۇستەم ءشارىپوۆ.
قازىرگى تاڭدا رۇستەم حاسەن ۇلى شوقان ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىندە «قولدانبالى ساندىك ونەر» پانىنەن ساباق بەرەدى. ياعني, شەبەر قۇندى بۇيىمداردى ءوزى جاساپ قانا قويماي, ونى جاس ورەندەرگەدە ۇيرەتىپ, ناسيحاتتاۋدا.
اعاش پەن تەمىردەن ءتۇيىن ءتۇيۋ – شەبەردىڭ قولى بوستا اينالىساتىن سۇيىكتى ءىسى. ال وسى بۇيىمدارعا جۇمسالاتىن شيكىزاتتى ول نۇر-سۇلتان, الماتى قالالارىنان ارنايى تاپسىرىسپەن الدىرتادى. ونىڭ قولىنان تۋعان كوپتەگەن بۇيىمدار كونە داۋىردەن سىر شەرتەدى. شەبەردىڭ ايتۋىنشا, بۇيىمداردىڭ باستى قۇندىلىعى دا – وسى. ول الداعى ۋاقىتتا ءوزىنىڭ جەكە ونەر كورمەسىن وتكىزۋدى جوسپارلاپ وتىر.
