بۇل كۇي اتاسى قۇرامانعازىنىڭ «ادايى» دومبىرا شاناعىنان توگىلىپ تۇر. يۋري كادىمگى داۋلەسكەر دومبىراشىلارشا قاپىسىز شەبەرلىكپەن ورىندايدى ەكەن. وسىنداي رۋحتى كۇيلەر ءيۋريدىڭ رەپەرتۋارىندا كوپتەپ كەزدەسەدى. ونەرگە قاتتى قىزىققان ونەرپازدى 10 جاسىندا اتا-اناسى مۋزىكالىق مەكتەپكە اكەلەدى. سول كەزدە ءتۇرلى اسپاپتاردىڭ ىشىنەن ورىس بالاسى قازاقتىڭ دومبىراسىن تاڭدايدى. ونىڭ سوزىنشە, قوس ىشەكتى دومبىرانىڭ كۇمبىرى ەرەكشە.
– مەنى ەڭ العاش مۋزىكالىق مەكتەپكە اكەلگەندە ول جەردە اسپاپتار كوپ بولدى. پيانينو, فورتوپيانو, بايان سەكىلدى. بىراق مەن دومبىرانى تاڭدادىم. سەبەبى دومبىرانىڭ داۋىسى, ءۇنى ماعان قاتتى ۇنادى. ال, وسى دومبىرانى ماعان اتا-انام ارنايى جاساتتى. مەن قازىرگى تاڭدا 50-دەن استام كۇي بىلەمىن. بۇگىندە ءبىرجان سال كوللەدجىندە «دومبىرا ءپانىنىڭ مۇعالىمى» ماماندىعىندا وقىپ جاتىرمىن. بولاشاقتا باسقا بالالارعا دومبىرا ۇيرەتەمىن. ماعان قۇرمانعازى اتامىزدىڭ جانە سەكەن تۇرىسبەكوۆتىڭ كۇيلەرى ۇنايدى. اسىرەسە سەكەن تۇرىسبەكوۆتىڭ «اق جاۋىن» كۇيى, – دەيدى جاس دومبىراشى يۋري كوچەتىگوۆ.
يۋري وتباسىنىڭ تۇڭعىشى. ارتىنان ەرگەن قارىنداسى زلاتا دا قازاق مەكتەبىندە وقيدى. ول دا ونەردەن قۇر الاقان ەمەس. اعاسى سياقتى دومبىرا, فلەيتا اسپاپتارىندا وينايدى. ال, اتا-انالارى ءاردايىم ولاردىڭ ونەرىنە قولداۋ ءبىلدىرىپ, شىعارماشىلىقتارىن شىڭداۋعا ۇلەس قوسىپ كەلەدى.
– ءبىز ءيۋريدى مەملەكەتتىك تىلدە وقىتقان سەبەبىمىز,ول قازاق بالاباقشاسىنا باردى. كوپ سوزدەر ۇيرەنىپ, تۇسىنە باستادى. قازاقشا تازا سويلەگەن سوڭ, ءبىز ونى مالىك عابدۋللين اتىنداعى مەكتەپ-گيمنازياسىنا قازاق تىلىندە ءبىلىم الۋعا بەردىك. مەنىڭ ويىمشا, ءار بالا مەملەكەتتىك ءتىلدى ءبىلۋى كەرەك. 10 جاسىندا ول مۋزىكامەن اينالىسقىسى كەلدى. مۋزىكالىق مەكتەپكە الىپ كەلسەم, دومبىرا كۋرسىنا ىرىكتەۋ بولىپ جاتىر ەكەن. ءيۋريدىڭ قىزىعۋشىلىعىن بايقادىم دا سول دومبىرا كۋرسىنا جازدىم. بۇل ونىڭ قالاۋى, – دەيدى اناسى ولەسيا كوچەتىگوۆا.
قوس ىشەكتىڭ قۇلاعىن بۇراپ, كۇي كۇمبىرلەتكەن جاس ورەن كوپتەگەن بايقاۋلاردا توپ جارعان. اتاپ ايتساق, حالىقارالىق «استانا - مەرەي», «اناعا تاعزىم» بايقاۋلارىندا ديپلومانت اتانعان. وبلىستىق سايىستاردىڭ بىرنەشە دۇركىن لاۋرەاتى. يۋري وسىنداي شىعارماشىلىق بايقاۋلاردىڭ بىردە-بىرەۋىن قالت جىبەرمەۋگە تىرىسادى. ول بولاشاقتا قازاقتىڭ كيەلى دومبىراسىمەن الەمدىك ارەنادا ونەر كورسەتسەم دەگەن ىزگى ارمانىن جاسىرمادى.
