دانيار الكەباي ۇلى ەلدە كوروناۆيرۋس تارالۋىنا بايلانىستى توتەنشە جاعداي كەزىندەگى ەڭبەك ءتارتىبى تۋرالى ايتتى.
قاشىقتىقتان ورىندالاتىن جۇمىسقا كوشكەن جاعدايدا جۇمىس ىستەۋ ءتارتىبى جۇمىس ۋاقىتىنىڭ ەسەبى بويىنشا قر ەڭبەك كودەكسىنىڭ 138-بابىنا سايكەس انىقتالادى. جالاقى تولىق كولەمدە تولەنە وتىرىپ, جۇمىس ۋاقىتى جۇمىس بەرۋشىنىڭ اكتىسىمەن رەتتەلەدى. بۇل رەتتە, ەڭبەك كودەكسى جۇمىس بەرۋشىنى قاشىقتان جۇمىس اتقارۋ ءۇشىن جاعداي جاساۋدى مىندەتتەيدى.
قاشىقتىقتان جۇمىس ىستەۋ مۇمكىن ەمەس ۇيىمداردا جۇمىس بەرۋشى – ەڭبەك كودەكسىنىڭ 70-بابىنا سايكەس تولىق ەمەس رەجيم جۇمىس كۇنىن ەنگىزۋگە قۇقىلى, وندا ەڭبەكاقى ناقتى جۇمىس ىستەگەن ۋاقىتى بويىنشا تولەنەدى.
«ەگەر مۇنداي رەجيم مۇمكىن ەمەس جانە جۇمىس بەرۋشىلەر ءوز قىزمەتىن توقتاتۋعا ءماجبۇر بولسا, وندا ەڭبەك كودەكسىنىڭ 112-بابى باسشىلىققا الىنادى – بوس تۇرىپ قالعان ۋاقىتىنا اقى تولەۋ. بۇل جاعدايدا جۇمىس بەرۋشى قىزمەتكەرلەردىڭ جالاقىسى ەڭ تومەنگى جالاقى مولشەرىنەن (42 500 تەڭگە) كەم بولمايتىن مولشەردە بەلگىلەيدى. دەگەنمەن, ەگەر ەڭبەك نەمەسە ۇجىمدىق شارتتا جازىلعان وزگە تالاپتار بولسا, وندا تولەم سول تالاپقا سايكەس جۇرگىزىلەدى, بىراق جالاقىنىڭ ەڭ تومەنگى مولشەرىنەن تومەن بولماۋى ءتيىس», – دەدى دانيار الكەباي ۇلى.
توتەنشە جاعدايلاردا جۇمىس بەرۋشى شتات سانىن قىسقارتۋى مۇمكىن. بۇل جاعدايدا جۇمىس بەرۋشى ەڭبەك كودەكسىنىڭ 131 بابىنا سايكەس ءبىر اي بۇرىن جۇمىسشىنى حاباردار ەتۋى كەرەك جانە جۇمىسشىنىڭ ورتاشا جالاقىسى مولشەرىندە وتەماقى تولەۋى قاجەت.
«وسىعان بايلانىستى, ءبىز جەرگىلىكتى اتقارۋشى ورگان رەتىندە قالاداعى كاسىپورىنداردىڭ جۇمىس جاعدايىن, قىزمەتكەرلەردى بوساتۋىن, جۇمىس بەرۋشىلەرمەن جۇمىسشىلاردىڭ ەڭبەك كودەكسىن ساقتاۋىن كۇندەلىكتى مونيتورينگ جۇرگىزەتىن بولامىز», – دەپ اتاپ ءوتتى دانيار الكەباي ۇلى.
ەڭبەك زاڭناماسىنىڭ ساقتالۋىن ەڭبەك ينسپەكتورلارى باقىلايتىن بولادى. ينسپەكتورلاردىڭ بارلىق بايلانىس دەرەكتەرى باسقارمانىڭ رەسمي سايتىندا, سونىمەن بىرگە الەۋمەتتىك جەلىلەردە كورسەتىلگەن.
جۇمىستان بوساتىلعان جاعدايدا, جۇمىستان بوساتىلۋ سەبەپتەرىنە قاراماستان, 6 اي ىشىندە ازاماتتاردىڭ جۇمىسىنان ايىرىلۋىنا بايلانىستى الەۋمەتتىك تولەمدى راسىمدەۋگە قۇقىعى بار (مەملەكەتتىك الەۋمەتتىك ساقتاندىرۋ قورىنان). تولەم بۇرىن العان جالاقىسىنىڭ 40% مولشەرىندە جۇرگىزىلەدى. ول ءۇشىن قالانىڭ جۇمىسپەن قامتۋ ورتالىعىندا جۇمىسسىز رەتىندە تىركەلۋ قاجەت, ونى egov.kz پورتالىنا تىركەلىپ, قاشىقتىقتان جاساۋعا بولادى, ودان ءارى الەۋمەتتىك تولەم جۇمىسشىنىڭ قاتىسۋىنسىز تاعايىندالادى.
باسقارما باسشىسىنىڭ ورىنباسارى ءسوزىن قورىتىندىلاي كەلىپ, حالىقتى جۇمىسپەن قامتۋعا جاردەمدەسۋ شارالارى قامتاماسىز ەتىلەتىندىگىن, سونداي-اق قىزمەتكەرلەردىڭ بوساۋىنا جانە ولاردى جۇمىسقا ورنالاستىرۋ بويىنشا ۋاقتىلى شارالار قابىلداۋعا باقىلاۋ جۇرگىزىلەتىنىن اتاپ ءوتتى.
