بۇگىن وسى شاراعا بايلانىستى الماتىداعى دوستىق ۇيىندە ءباسپاسوز-ءماسليحاتى ۇيىمداستىرىلدى. وعان ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار جونىندەگى ورىنباسارى گەنەرال-مايور مۇحامەتقالي ساتوۆ, ىشكى ىستەر ورگاندارى مەن ۇلتتىق ۇلان ارداگەرلەرى كەڭەسىنىڭ توراعاسى ميليتسيا گەنەرال-مايورى ومىرزاق بولسامبەكوۆ, ۇلتتىق ۇلان «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور تالاپكەر امريەۆ, «گەنەرال پانفيلوۆ قورىنىڭ» قۇرىلتايشىسى, داڭقتى ديۆيزيا كومانديرىنىڭ نەمەرەسى الۋا بايقاداموۆا قاتىستى.
جيىندى اشقان مۇحامەتقالي ساتوۆ: «قازاقستاندىقتار ۇلى وتان سوعىسىنىڭ باسىنان اياعىنا دەيىن مايداننىڭ العى شەبىندە بولدى. سۇراپىل باستالعاندا برەست قامالىن مىڭنان اسا جەرلەستەرىمىز قورعاسا, جەڭىس كۇنى گەورگي بۋلاتوۆپەن بىرگە راقىمجان قوشقارباەۆ رەيحستاگتىڭ توبەسىنە تۋ تىكتى. رەسپۋبليكامىزدىڭ 1 ميلليون 200 مىڭنان اسا تۇرعىنى سوعىسقا قاتىسىپ, سول ساربازداردىڭ تەڭ جارتىسىن استامى قان مايداننان ورالمادى. اسقان ەرلىگى ءۇشىن 528 جاۋىنگەرگە كەڭەس وداعىنىڭ باتىرى اتاعى بەرىلسە, بۇل اتاق تالعات بيگەلدينوۆ, لەونيد بەدا, يۆان پاۆلوۆ جانە سەرگەي لۋگانسكيگە ەكى رەتتەن بۇيىردى. پۋلەمەتشى مانشۇك مامەتوۆا, مەرگەن ءاليا مولداعۇلوۆا, ۇشقىش حيۋاز دوسپانوۆا سىندى ارۋلارىمىزدىڭ دا ەرلىگىن كەيىنگى ۇرپاق اڭىز قىلىپ ايتۋدا. قاسيەتتى ەلىمىز بەن جەرىمىزدى باسقىنشىلاردان قورعاپ, كەلەشەك ۇرپاققا بەيبىت ءومىردى امانات ەتۋ ءۇشىن اتا-اپالارىمىز, اعا-تاتەلەرىمىز جاۋ اسكەرىمەن ايانباي ايقاستى. ودان بولەك, قازاقستان حالقىنىڭ تىلداعى ەرلىگىن دە ەرەكشە اتاپ وتۋگە ءتيىسپىز. سوعىس وتى ءورشىپ تۇرعان جىلدارى ەڭكەيگەن قارتتان ەڭبەكتەگەن بالاعا دەيىن تاڭنىڭ اتىسىنان كۇننىڭ باتىسىنا دەيىن قارا جۇمىسقا جەگىلدى. ولاردىڭ دا ۇلى جەڭىسكە وزدەرىنىڭ ولشەۋسىز ۇلەستەرىن قوستى. بۇنىڭ بارلىعى دا بۇگىنگى ۇرپاقتىڭ جادىندا», – دەپ تەبىرەنە سويلەدى.
سول سەكىلدى ايتۋلى جيىنعا قاتىسۋشى ارداگەرلەر ۇلى وتان سوعىسى كەزىندەگى قازاقستاندىق جاۋىنگەرلەردىڭ كوزسىز ەرلىگى جانە تىل ەڭبەككەرلەرىنىڭ ەرەن ەڭبەگى جايىندا بايانداي كەلە, وسى تاقىرىپقا بايلانىستى بىرقاتار قىزىقتى دەرەكتەردى العا تارتتى.
ال ەستافەتانىڭ وزىنە كەلەر بولساق, ونىڭ ماقساتى – ۇلى وتان سوعىسىندا وتانىن جانقيارلىقپەن قورعاعان قازاقستاندىق جاۋىنگەرلەردىڭ ەرلىگىنە قۇرمەت كورسەتۋ; ەسىمدەرىن ەل ەسىندە ساقتاۋ; مايدان دالاسىندا قازا تاپقان ءار سولداتتىڭ ەرلىگىنە باس يۋ; جاستاردىڭ, ىشكى ىستەر ورگاندارى قىزمەتكەرلەرى مەن ۇلتتىق ۇلان اسكەري قىزمەتشىلەرىنىڭ بويىنا وتانسۇيگىشتىك قۇندىلىقتاردى ءسىڭىرىپ, پاتريوتيزمگە تاربيەلەۋ; اسكەري بورىشتارىن ۇلگىلى اتقارۋعا ىقپال ەتۋ; قازاقستان حالقىنىڭ باتىرلىق تاريحىنا قۇرمەتپەن قاراۋ.
وسىلايشا, ۇلى وتان سوعىسىنداعى جەڭىستىڭ 75 جىلدىعىنا ارنالعان ء«بىز – جەڭىستىڭ مۇراگەرىمىز!» اتتى ەستافەتاسى باستالدى.
