«بارىس ارەنادا» ءتورت كوماندا ءوزارا كۇش سىناسادى. اتاپ ايتساق, جولىمىز ۋكراينا, نيدەرلاند جانە پولشا قۇرامالارىمەن قيىسادى. وسىلاردان وزعان جاعدايدا عانا ءبىزدىڭ جىگىتتەر وليمپيادا جولداماسى ءۇشىن جارىستى جالعاستىرادى. سول ماقساتقا قول جەتكىزۋ ءۇشىن اندرەي سكابەلكانىڭ شاكىرتتەرى ەش ايانىپ قالماسى انىق جانە دە ول جوسپاردى جۇزەگە اسىرۋعا تولىق مۇمكىندىگىمىز بار. ولاي دەۋگە نەگىز, ۇزدىكتەر تىزىمىندە جوعارىدا اتالعان كوماندالاردىڭ بارلىعىنان جەرلەستەرىمىز جوعارى تۇر. ماسەلەن, حالىقارالىق شايبالى حوككەي فەدەراتسياسىنىڭ رەيتينگىندە قازاقستان 19-ورىندى يەلەنۋدە. پولشا بىزدەن ءۇش, ۋكراينا التى ساتى تومەن تۇر. ال نيدەرلاند 28-ورىندى قاناعات تۇتۋدا.
6 اقپاندا وتانداستارىمىز ۋكراينامەن شەبەرلىك بايقاسادى. ءبىرىنشى ديۆيزيون كوماندالارى اراسىنداعى الەم چەمپيوناتىندا ءبىز ولاردى ەكى رەت جەڭگەنبىز. ءوز تاريحىندا ۋكراينالىقتار وليمپياداعا ءبىر رەت قانا قاتىستى. كەلەسى كۇنى نيدەرلاندپەن كەزدەسەمىز. قىزعالداقتار ەلى وكىلدەرىنىڭ سپورتتىڭ بۇل تۇرىندە جەڭىسپەن ورىلگەن باي تاريحى جوق. سوندىقتان دا بۇل جولى دا سان سوقتىرۋ ايتارلىقتاي قيىندىق تۋعىزا قويماس. 9 اقپاندا پولشاعا قارسى وينايمىز. ءتۇرلى جارىستاردا پولياكتارمەن بىرنەشە مارتە جولىمىز قيىستى. ول باسەكەلەردىڭ دەنى قازاقستاندىقتاردىڭ پايداسىنا شەشىلدى. سوڭعى رەت ايتۋلى ەلدىڭ وكىلدەرىن 6:1 ەسەبىمەن ويسىراتا ۇتتىق. ونىڭ ۇستىنە, ولار وليمپيا ويىندارىنا سوڭعى رەت سوناۋ 1992 جىلى قاتىستى. سودان كەيىن قاتارىنان جەتى رەت تورتجىلدىقتىڭ باستى باسەكەسىنەن شەت قالدى.
ۋكراينا, نيدەرلاند جانە پولشاعا قاراعاندا قازاقستاننىڭ جاعدايى الدەقايدا جاقسى. 1998 جىلى ناگانو وليمپياداسىندا حوككەيشىلەرىمىز شيرەك فينالعا دەيىن جەتسە, 2006 جىلى تۋريندە توعىزىنشى ورىنعا تابان تىرەدى. ولارعا قاراعاندا الەم چەمپيوناتتارىنا دا ءجيى قاتىسىپ ءجۇرمىز. سونداي-اق ازيا ويىندارى (4 التىن+2 كۇمىس) مەن دۇنيەجۇزىلىك ۋنيۆەرسيادادا (1 التىن+4 كۇمىس+1 قولا) التى رەتتەن جەڭىس تۇعىرىنا كوتەرىلدىك.
ەگەر نۇر-سۇلتانداعى سىناقتان سۇرىنبەي وتسەك, ىرىكتەۋ ءتۋرنيرىنىڭ نەگىزگى بولىگىندە كۇش سىناسۋ قۇرمەتىنە يە بولامىز. بۇل باسەكەلەر سلوۆاكيا, لاتۆيا جانە نورۆەگيادا وتەدى.
