پارلامەنت ءماجىلىسى ماقۇلداعان «قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» عارىش ايلاعىندا «بايتەرەك» عارىش زىمىران كەشەنiن قۇرۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن ءبولۋ كۇن تارتىبىندەگى ەكىنشى ماسەلە بولدى. جوعارعى پالاتانىڭ حالىقارالىق قاتىناستار, قورعانىس جانە قاۋىپسىزدىك كوميتەتى وسى زاڭ جوباسىنا پىسىقتاۋ جۇمىستارىن جۇزەگە اسىراتىن جانە قورىتىندى ازىرلەۋ بويىنشا باس كوميتەت بولىپ بەلگىلەندى.
بيۋرو وتىرىسىندا سونىمەن قاتار سەناتتىڭ 26 جەلتوقساندا وتەتىن كەزەكتى وتىرىسىنىڭ كۇن تارتىبىنە 11 ماسەلە ەنگىزۋ تۋرالى ۇسىنىس قارالدى.
وتىرىس بارىسىندا سەنات توراعاسى داريعا نازارباەۆا بالا اسىراپ الۋ تۋرالى زاڭعا تۇزەتۋلەر ەنگىزۋ تۋرالى ماسەلە كوتەردى. كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىنىڭ توراعاسى ۆلاديمير ۆولكوۆتىڭ ايتۋىنشا, بۇگىنگى تاڭدا زاڭ جوباسى كوميتەتتە بارلىق جاۋاپتى ورگاندارمەن جانە قوعامدىق ۇيىمدارمەن بىرلەسىپ قارالۋدا.
«جۇمىستىڭ وسى جەرىندە ۇلكەن ولقىلىق بار. وتباسىنان پاتروناتتىق تاربيەگە نەمەسە قامقورلىققا كەتكەن بالالارعا ەشقانداي مونيتورينگ جۇرگىزىلمەگەن. بۇل بالالارعا مەملەكەت نازار اۋدارماي وتىر. ولار بالالار ۇيىندە بولعاندا مەملەكەت باقىلاي الادى, جۇرتشىلىق مونيتورينگ جۇرگىزەدى, جاۋاپكەرشىلىك بار. بالالار وتباسىنان كەتىپ قالعان جاعدايدا ءومىرى قالاي قالىپتاساتىنىن ەشكىم بىلمەيدى. بۇل فاكتىنى ەسكەرۋ كەرەك», - دەدى داريعا نازارباەۆا.
بيۋرودا پارلامەنت سەناتىنىڭ رەگلامەنتىنە وزگەرىستەر مەن تولىقتىرۋلار تۋرالى ماسەلەنى وتىرىستىڭ كۇن تارتىبىنە ەنگىزۋ جونىندە ۇسىنىس قارالدى. قازىرگى ۋاقىتتا رەگلامەنت 182 تارماقتان تۇرادى. ەندى 55 تۇزەتۋ ەنگىزۋ جوسپارلانىپ وتىر.
سەنات توراعاسى جوعارعى پالاتانىڭ رەگلامەنتى تۋرالى, پارلامەنتكە كەلىپ تۇسەتىن زاڭ جوبالارىنىڭ ساپاسى مەن ولاردى دايىنداۋ مەرزىمدەرى تۋرالى ماسەلەنى كوتەرە وتىرىپ, ۇكىمەتتىڭ پارلامەنتتەگى وكىلى ەرمەك امانشاەۆقا: «زاڭ جوباسىن قاراۋ مەرزىمى بويىنشا ماسەلە وتە وتكىر كۇيىندە قالىپ وتىر. ءار جىل سايىن قاراشا ايىنىڭ سوڭى مەن جەلتوقساندا زاڭدار تۇسە باستايدى. بۇل جوبالاردى ءبىز شۇعىل تۇردە قاراستىرا باستايمىز. ول دۇرىس ەمەس. بۇل زاڭنىڭ ساپاسىنا اسەر ەتەدى», - دەدى ول.
ە.امانشاەۆتىڭ اقپاراتى بويىنشا, قاڭتار ايىنان ماۋسىم ايىنا دەيىن ۇكىمەت زاڭ جوبالاۋ جۇمىستارىن دايىنداۋ جوسپارىنىڭ 30%-ىن ورىندادى. سوندىقتان بۇگىنگى كۇنى پرەمەر-ءمينيستردىڭ تاپسىرماسى بويىنشا ۇكىمەت جۇمىسىنىڭ رەگلامەنتىنە وزگەرىستەر ەنگىزىلدى.
پالاتا باسشىسى ۇكىمەتكە زاڭ جوبالاۋ جۇمىستارىنىڭ جوسپارىن كەلىسۋدى جانە پارلامەنتكە الدىن الا زاڭ بەرۋدى ۇسىندى. «ۇستىمىزدەگى جىلى قارالاتىن زاڭدار كەم دەگەندە ەكى اي بۇرىن ءتۇسۋى كەرەك. دەپۋتاتتار زاڭ جوباسىن ساپالى ءارى مەرزىمىندە قاراپ ۇلگەرۋى ءۇشىن», - دەپ اتاپ ءوتتى د.نازارباەۆا.
بيۋرو مۇشەلەرى وتىرىس بارىسىندا قازاقستان رەسپۋبليكاسى پارلامەنتى سەناتىنىڭ 2020 جىلعا ارنالعان نەگىزگى ءىس-شارالار جوسپارىن بەكىتتى.
