شارانىڭ اشىلۋىنا قازاقستانداعى ەرازمۋس+ ۇلتتىق باعدارلاماسى كەڭسەسىنىڭ ديرەكتورى شايزادا تاسبولاتوۆا, نارحوز ۋنيۆەرسيتەتىنىڭ رەكتورى ەندريۋ ۆاحتەل, كاتالونيا ساياسي ۋنيۆەرسيتەتىنىڭ كوورديناتورى ۆينچەنس فەرناندەس قاتىستى.
فورۋم ۋنيۆەرسيتەتتەردى ينتەرناتسيونالداندىرۋ جولدارىن قۇرۋ, حالىقارالىق جانە مادەنيارالىق تۇسىنىستىك, يننوۆاتسيالىق تەحنولوگيالاردى قولدانۋ ارقىلى ينتەرناتسيونالداندىرۋدى دامىتۋدىڭ جوعارى ساپالى ستراتەگياسىن جاساۋ ماقساتىندا قولعا الىنعان. حالىقارالىق كونفەرەنتسيا اياسىندا وتاندىق جانە شەتەلدىك ماماندار جوو-لاردى ينتەرناتسيونالداندىرۋ جونىندە بايانداما جاسادى, سونداي-اق «ينتەرناتسيونالدىرۋدىڭ ستراتەگيالىق جوسپارىن ازىرلەۋ» جانە «شەتەلدىك ستۋدەنتتەر مەن وقىتۋشىلار ءۇشىن «WELCOME» جاعدايلارىن جاساۋ» تاقىرىبىندا ەكى سەكتسياعا بولىنگەن دوڭگەلەك ۇستەل ۇيىمداستىرىلدى.
جيىننىڭ اشىلۋىندا ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ حالىقارالىق بايلانىستار جانە يننوۆاتسيالار جونىندەگى پرورەكتورى اقبوتا نيازقىزى شەتەلدىك قوناقتارعا شارانى ۇيىمداستىرۋشىلاردىڭ ءبىرى سانالاتىن ۋنيۆەرسيتەتتىڭ تاريحىنا قىسقاشا توقتالىپ ءوتتى. «ۋنيۆەرسيتەتىمىز 1996 جىلى ەلباسى ن.نازارباەۆتىڭ بۇيرىعىمەن قۇرىلدى. جاس جوعارى وقۋ ورنى بولعانىنا قاراماستان, حالىقارالىق رەيتينگتەردە الدىڭعى قاتاردان كورىنىپ كەلەدى. ال جوعارى ءبىلىمدى ينتەرناتسيونالداندىرۋ ۋنيۆەرسيتەتىمىزدى دامىتۋدىڭ باستى باعىتى سانالادى. بۇل بويىنشا جۇمىستاردى تۇراقتى جانە جۇيەلى تۇردە جۇرگىزىپ كەلەمىز», دەدى ا.نيازقىزى. ونىڭ مالىمدەۋىنشە, اتالعان جوو الەمدەگى 25 ەلدىڭ ستۋدەنتتەرىنە «Alma mater», ياعني ءبىلىم بەرەتىن ورىن بولىپ تۇر. «حالىقارالىق ۇيىمدارمەن ارىپتەستىكتە جۇزەگە اسىرىلعان جوبالار جەتەرلىك. سونىڭ ىشىندە ايرىقشا اتاپ وتەتىنىمىز – ەرازمۋس+ باعدارلاماسى. ۋنيۆەرسيتەتىمىز جوعارى ءبىلىمدى ينتەرناتسيونالداندىرۋدا جوعارى ناتيجەگە جەتكىزگەن بۇل باعدارلاماعا 2015 جىلدان باستاپ قاتىستى. وسى ۋاقىت ىشىندە 200-دەن اسا ادام باعدارلاماعا قاتىسىپ, ەۋروپانىڭ 36 ەلىندە تاعىلىمدامادان ءوتتى», دەدى پرورەكتور.
ال حالىقارالىق ءبىلىم بەرۋ جونىندەگى امەريكالىق كەڭەستىڭ وكىلى ماقسات قوشقارباەۆ جوعارى ءبىلىمدى ينتەرناتسيونالداندىرۋدا شەتەلدىك ۋنيۆەرسيتەتتەرمەن بىرلىكتە جۇمىس ىستەۋدىڭ ماڭىزىنا توقتالدى. «قازاقستاندىق جوو-لاردىڭ امەريكا ۋنيۆەرسيتەتتەرى اراسىنداعى ارىپتەستىك ارقىلى بىرقاتار جوبا ىسكە اسىرىلىپ, ەلىمىزدىڭ جاستارى ءۇشىن گرانتتار قاراستىرىلدى. ءبىزدىڭ كەڭەس ستۋدەنتتەردىڭ حالىقارالىق دارەجەدە ءبىلىم الىپ, الەمدىك ستاندارتتارعا ساي مامان بولۋىن قامتاماسىز ەتۋمەن عانا ەمەس, پروفەسسورلار مەن وقىتۋشىلاردىڭ ءوزارا تاجىريبە الماسۋىنا, سونىمەن قاتار رەيتينگى جوعارى عىلىمي جۋرنالدارعا عالىمداردىڭ ماقالاسىن جاريالاۋعا جاعداي جاسايدى», دەيدى م.قوشقارباەۆ.
