وقيعا مىقتىكول كولىندە بولعان. ءوز باسىن قاتەرگە تىگىپ, ءتىلسىز جاۋمەن ارپالىسقان ازاماتتىڭ ەرلىگى ەلەۋسىز قالعان جوق. اقمولا وبلىستىق توتەنشە جاعدايلار جونىندەگى دەپارتامەنت باسشىسىنىڭ العىس حاتىمەن ماراپاتتالدى.
وبلىستا ۇزىن-ىرعاسى 750-گە جۋىق وزەن-كولدەر مەن سۋ قويمالارى بار. ولاردىڭ باسىم بولىگىندە شومىلۋعا تىيىم سالىنعان. مىقتىكول دە وسىنداي تىيىم سالىنعان كولدەردىڭ قاتارىندا. دەگەنمەن قارا قارعانىڭ ميى قاينايتىن ىستىقتا كولگە شومىلۋشىلاردىڭ قاتارى از ەمەس. دەنيس سىتنيك سۋعا باتىپ بارا جاتقان بوزبالانى بايقاپ قالعان. كوپ ويلانباستان, باتىپ بارا جاتقان ازاماتتى قۇتقارىپ, العاشقى كومەك كورسەتكەن. قازىرگى ۋاقىتتا اجالدان امان قالعان ەلامان بولتابەكتىڭ جاعدايى جاقسى.
– كۇن ىستىق بولعان سوڭ سۋعا تۇسۋگە بارىپ ەدىم. جاعالاۋداعى ادامداردىڭ جانۇشىرا ايعايلاپ تۇرعانىن ەستىدىم. قاراسام, بىرەۋ سۋعا باتىپ بارا جاتىر ەكەن. الگى كىسىنى ارەڭ دەگەندە سۋ تۇبىنەن تاۋىپ, قارمانىپ جاعاعا جەتەلەدىم. ءساتىن سالعاندا مەديتسينا قىزمەتكەرلەرىنىڭ جولىعا كەتكەنى. ايتەۋىر كورەتىن جارىعى بار ەكەن, امان قالدى. مەن ءوز ارەكەتىمدى ەرلىك دەپ ەسەپتەمەيمىن, – دەيدى دەنيس سىتنيك.
بيىل وبلىستا 26 ادامنىڭ سۋعا كەتكەندىگىن ايتا كەتەلىك. وتكەن جىلمەن سالىستىرعاندا 7 ادامعا كوپ. ءبىر ايتا كەتەرلىگى, وقىس وقيعانىڭ كوپشىلىگى شومىلۋعا رۇقسات ەتىلمەگەن وزەن-كولدەردە بولعان.
– رۇقسات ەتىلمەگەن ايماقتارداعى توتەنشە جاعدايلاردىڭ الدىن-الۋ ماقساتىندا شومىلۋ ناۋقانى باستالعالى 1400-گە جۋىق رەيد جۇرگىزدىك. ەرەجەلەردى بۇزعان 390 ادام اكىمشىلىك جازاعا تارتىلدى. سونداي-اق 25 مىڭ ادامدى قامتىعان ينتەراكتيۆتى جۇمىستار جۇرگىزىلدى, – دەيدى وبلىستىق توتەنشە جاعدايلار جونىندەگى دەپارتامەنتى جاساعىنىڭ باستىعى اسحات اكەلجانوۆ.
ماۋسىم باستالعالى قۇتقارۋشىلار 92 ادامدى اجال اۋزىنان امان الىپ قالعان. ولاردىڭ 21-ءى كامەلەتكە تولماعاندار.
اقمولا وبلىسى
