يپپوتەراپيا ەمدەۋ ءتاسىلى الميساقتان بەلگىلى. ءتىپتى عىلىمي تۇرعىدا جان-جاقتى دالەلدەنگەن دەپ ايتۋعا دا بولادى. مۇنداي شارالار شەتەلدەردە تابىستى قولدانىلۋدا. اسىلىندا اتقا مىنگەن ادامنىڭ ومىرتقا سۇيەكتەرىنىڭ اراسى اشىلىپ, بارلىق بۇلشىق ەتتەرى ۇزدىكسىز قوزعالىسقا ءتۇسىپ, اعزاعا جاعىمدى اسەر ەتەتىندىگى داۋسىز.
پوليتسيا قىزمەتكەرلەرىنىڭ ايتۋلارىنا قاراعاندا, «چەركەز» جانە «ريچارد» اتتى جىلقىلار بالالاردىڭ ەڭ سۇيىكتى كولىكتەرى. تالايدىڭ تاقىمى ءتيىپ كوندىككەن, ۇركۋدى, الا قاشۋدى بىلمەيتىن قويدان قوڭىر, جۋاس جانۋارلار الشاڭ باسقان اياڭىنان جاڭىلمايدى. بالالار اتتانار جاعىنان كەلىپ ۇزەڭگىگە اياقتارىن سالىپ ۇمتىلعاندا دا ماڭقيىپ تۇرا بەرەدى. العاشقى بەتتە قالا بالالارى قاراداي ۇركىپ, جولاعىلارى كەلمەگەنىمەن, بىرتە-بىرتە اتقا ءمىنۋدىڭ قىزىعىن ۇعىنا باستاعان. بۇرىنعىلار «جىلقى ۇستىندە جەلىك بار» دەپ تەگىن ايتتى دەيسىز بە.
– سىرقات بالالاردىڭ ەمدەلىپ, قاتارعا قوسىلىپ كەتكەنىن كورۋدىڭ ءوزى ءبىر باقىت,–دەيدى كوكشەتاۋ قالالىق پوليتسيا باسقارماسىنىڭ باستىعى جانات ەشىموۆ,–ايتكەنمەن بۇل ءبىر كۇندىك قانا شارا ەمەس, باسقارما وسىنداي شەشىم قابىلداپ, «مەيىرىم» بالالاردى دامىتۋ ورتالىعى جانە №4 ارنايى مەكتەپ-ينتەرناتىنىڭ باسشىلىعىمەن ءوزارا كەلىسىمگە كەلىپ وتىر. الداعى ۋاقىتتا سىرقات بالالار اپتاسىنا ەكى مارتە اتقا ءمىنىپ, سەرۋەندەي الادى.
بۇل شارۋا اعىمداعى جىلدىڭ ماۋسىم ايىنان باستاپ قولعا الىنعان. ازىرگە 16 ساباق وتكىزىلىپتى. ول ساباقتاردا سال اۋرۋى تۋرالى تۇسىنىك بەرىلەدى. ءارى اتقا ءمىنۋدىڭ تيىمدىلىگى دە ايتىلادى. يگى ىستەن ناتيجە شىعىپ جاتسا, الداعى ۋاقىتتا اتقۇمارلاردى كوپتەپ تارتپاق.
كوكشەتاۋ قالاسى
