سوڭعى ءۇش ايدا ۇكىمەت ادام كاپيتالىن دامىتۋدىڭ جالپى ستراتەگياسى اياسىندا ءۇش نەگىزگى قۇجاتتى قابىلدادى. ءبىرىنشى قۇجات ادام كاپيتالىن دامىتۋدىڭ جالپى ستراتەگياسىنىڭ بولىگى رەتىندە ەڭبەك زاڭناماسىنا وزگەرتۋلەر ەنگىزۋ بويىنشا بىرقاتار تۇزەتۋلەردى قامتيدى. وسى ستراتەگيادا قاراستىرىلعان شارالاردىڭ ءبىرى ەڭبەك قاتىناستارىن فورماليزاتسيالاۋعا باعىتتالعان. 2020 جىلعا قاراي «ەلەكتروندىق ەڭبەك كەلىسىمشارتتارى» اقپاراتتىق جۇيەسى ىسكە قوسىلادى دەپ بولجانۋدا.
ا. سارباسوۆتىڭ ايتۋىنشا, 17 مىڭعا جۋىق جۇمىس بەرۋشى اتالعان پيلوتتىق جوباعا قوسىلعان. 700 مىڭنان استام ەلەكتروندى ەڭبەك كەلىسىمشارتى ەلەكتروندى جۇيەگە ەنگىزىلگەن.
«بۇل جۇمىستىڭ تۇپكى ماقساتى – ازاماتتارىمىزدىڭ ەڭبەك قاتىناستارىنا قاتىسۋىن ارتتىرۋ. وسى جۇيە ارقىلى ءبىز قانشا ازامات ەڭبەك قاتىناستارىمەن قامتىلعانىن, ولاردىڭ ەڭبەك قىزمەتتەرىنىڭ قانداي ەكەنىن, جۇمىس ۋاقىتىنىڭ رەجيمى قانداي ەكەنىن كورەتىن بولامىز. بۇل شارالار بىزگە بەلگىلەنگەن كورسەتكىشتەرگە, سونىڭ ىشىندە جۇمىس ورىندارىن اشۋ ينديكاتورلارىنا تيىمدىرەك قول جەتكىزۋگە مۇمكىندىك بەرەدى», دەدى ۆيتسە-مينيستر.
ەكىنشى قۇجات قىزمەتكەرلەرگە ءتيىستى ەڭبەك جاعدايلارىن جاساۋعا اكىمشىلىك جاۋاپكەرشىلىكتى كۇشەيتۋدى قاراستىرادى. ا. سارباسوۆتىڭ ايتۋىنشا, بۇگىندە جالاقى تولەۋدە تەڭ جاعدايلار جاساۋ ءۇشىن جاۋاپكەرشىلىك قويىلعان. بارلىق باسقا ەڭبەك جاعدايلارى ءۇشىن مۇنداي جاۋاپكەرشىلىك جوق.
قر ەڭبەك جانە حالىقتى الەۋمەتتىك قورعاۋ مينيسترلىگى اتالعان اكىمشىلىك قۇقىقبۇزۋشىلىقتىڭ قۇرامىن ناقتىلاۋ بويىنشا جۇمىستار جۇرگىزۋدى جوسپارلاپ وتىر. قابىلدانعان شارالار جۇمىس بەرۋشىلەردى, ەڭ الدىمەن شەتەلدىك جۇمىس كۇشىن تارتاتىن كومپانيالاردى ءتيىمدى مەملەكەتتىك باقىلاۋعا مۇمكىندىك بەرۋى كەرەك. تامىز ايىندا وسىنداي كاسىپورىندارعا تالداۋ جاسالادى. ۇلتتىق ەڭبەك نارىعىن قورعاۋعا باعىتتالعان ءتيىستى شەشىم قابىلدانادى.
ءۇشىنشى قۇجات اياسىندا مينيسترلىك ەلىمىزدىڭ جالدامالى جۇمىسشىلارىنىڭ جارتىسىنان كوبىن قامتيتىن كاسىپوداقتارمەن جۇمىستى كۇشەيتۋدى جوسپارلاپ وتىر.
ء«بىز جۇمىسشىلاردىڭ ەڭبەك قۇقىقتارىن قورعاۋدىڭ تيىمدىلىگىن ارتتىرۋعا باعىتتالعان زاڭ جوباسى اياسىندا بىرقاتار شارالاردى ۇسىنامىز. وندا قاۋىپسىز ەڭبەك جاعدايلارىن جاساۋ شارالارى, دەنساۋلىقتى قامتاماسىز ەتۋ جانە ءومىردى ساقتاۋ ماسەلەلەرى قاراستىرىلعان», دەدى ا. سارباسوۆ.
سوڭعى ءۇش جىلدا قازاقستاندا وندىرىستىك جاراقاتتانۋ 7 پايىزعا تومەندەگەنى ايتىلدى. كاسىپتىك سىن-تەگەۋرىندەردى ازايتۋ جونىندەگى جۇمىس جالعاسادى.
ا. سارباسوۆ, سونداي-اق, وسى جىلدىڭ مامىر ايىندا ۇجىمدىق ەڭبەك داۋلارىن, ەڭبەك جانجالدارى دەپ اتالاتىن جاعدايلاردىڭ الدىن الۋعا باعىتتالعان ءىس-شارالار جوسپارى قابىلدانعانىن حابارلادى. جوسپاردا مەملەكەتتىك ورگاندار, جۇمىس بەرۋشىلەر جانە كاسىپوداقتار اراسىنداعى ءىس-قيمىلداردىڭ ناقتى الگوريتمى قاراستىرىلعان. وسى شارالاردى ىسكە اسىرۋ اياسىندا جۇمىس بەرۋشىلەر مەن قىزمەتكەرلەر اراسىنداعى ءوزارا ارەكەتتەسۋ رەيتينگى جوعارىلايدى دەپ كۇتىلۋدە.
