29 شىلدەگە قاراي قۇرىلىسشىلار ارىس قالاسىنداعى 2707 ءۇيدى تاپسىردى. تاعى 2344 ۇيدە نەگىزگى قالپىنا كەلتىرۋ جۇمىستارى اياقتالدى. مۇندا شاتىرى جوندەلىپ, تەرەزەلەرى ورناتىلدى, كەيبىر نىسانداردا كوسمەتيكالىق جوندەۋ جۇمىستارىن جۇرگىزۋگە قالدى.
7785 قۇرىلىسشى قالانى قالپىنا كەلتىرۋ جۇمىستارىن جالعاستىرۋدا. ءبىر اي ىشىندە ولاردىڭ قاتارى كۇن سايىن بىرنەشە ونداعاننان ەكى جۇزگە دەيىن تولىقتىرىلدى.
كەڭ كولەمدى قۇرىلىس جۇمىستارىنا ەلىمىزدىڭ بارلىق وڭىرلەرى, سونداي-اق رەسپۋبليكالىق ماڭىزى بار قالالار قاتىسۋدا. قر يندۋستريا جانە ينفراقۇرىلىمدىق دامۋ مينيسترلىگى ءبىرىنشى ۆيتسە-مينيستر قايىربەك وسكەنباەۆتىڭ باسشىلىق ەتۋىمەن توتەنشە جاعدايدان كەيىنگى العاشقى كۇندەردەن باستاپ ارىس قالاسىن قالپىنا كەلتىرۋ بارىسىن قاداعالاپ, باقىلاۋ جۇمىستارىن جۇرگىزىپ جاتىر.
