قازاقستان • 23 شىلدە، 2019

قىزمەتكەرلەردىڭ سىرقاتتىلىق دەمالىسى سالدارىنان قازاقستاندىق كومپانيالار جىلىنا 636،3 ملرد تەڭگەدەن ايىرىلۋى مۇمكىن

159 رەت كورسەتىلدى

ادامداردىڭ جۇمىستا ءجيى بولماۋى ولاردىڭ كاسىبي قىزمەتىنە كەرى اسەرىن تيگىزىپ قانا قويماي، سونىمەن قاتار، جۇمىس بەرۋشىگە ەكونوميكالىق شىعىن كەلتىرەتىنى ايان.

ماسەلەن، 2019 جىلدىڭ ءبىرىنشى توقسانىندا قازاقستاندا مەديتسينالىق قىزمەت كورسەتۋ كولەمى، جالپى العاندا، 306،6 ميلليون تەڭگەنى قۇراعان. ونىڭ ىشىندەگى، 7% نەمەسە 21،4 ميلليون تەڭگە كاسىپورىندار قارجىسىنان تولەندى. سالىستىرمالى تۇردە الساق، 2018 جىلدىڭ وسى مەرزىمىندە قازاقستاندا مەديتسينا قىزمەتتەرىنە 254،4 ميلليون تەڭگە جۇمسالسا، ونىڭ ىشىندەگى 6،6%-دى (16،7 ملن تەڭگە) كاسىپورىنداردىڭ قارجىسى قۇرايدى.

2019 جىلعى ءبىرىنشى توقساندا جالپى قىزمەت كورسەتەتىن دارىگەرلەردىڭ قىزمەتىنە 5،7 ملن تەڭگە جۇمسالىپتى. ساراپشىلار ەگەر قىزمەتكەرلەر مەديتسينالىق تەكسەرۋدەن تۇراقتى ءوتىپ جۇرەتىن بولسا، مەديتسينالىق قىزمەتتەرگە جۇمسالاتىن قارجىنى قىسقارتۋعا بولادى، دەپ ەسەپتەيدى. ويتكەنى دەر كەزىندە چەك-اپتان، ياعني تولىق مەديتسينالىق تەكسەرۋدەن ءوتۋ قىزمەتكەرلەر اراسىنداعى سىرقاتقا بايلانىستى دەمالىستى قىسقارتۋعا مۇمكىندىك بەرەدى.

قازاقستاندا 2019 جىلعى ءبىرىنشى توقساندا جالپى قىزمەت كورسەتەتىن دارىگەرلەردىڭ قىزمەتىنە شاعىن كاسىپورىندار جۇمساعان شىعىن كولەمى 1،7 ملن تەڭگەنى، ورتا كاسىپورىنداردىڭ شىعىنى 1،2 ملن تەڭگەنى، ءىرى كاسىپورىنداردىڭ شىعىنى 2،7 ملن تەڭگەنى قۇرادى. دەنساۋلىق ساقتاۋ سالاسىنا جۇمسالعان شىعىندار بويىنشا، ايماقتار اراسىندا اتىراۋ (1،4 ملن تەڭگە)، شىعىس قازاقستان (1،1 ملن تەڭگە) جانە قاراعاندى (899 مىڭ تەڭگە) وبلىستارى كوش باستاپ تۇر.

گارۆارد مەديتسينا مەكتەبىنىڭ مالىمەتتەرى بويىنشا، يممۋنيتەتى قالىپتى ەرەسەك ادام، ورتاشا ەسەپپەن، جىلىنا 3 رەت اۋىرادى ەكەن. قازىرگى تاڭدا قازاقستاندا جۇمىس ىستەيتىن حالىق سانى – 9،2 ميلليون ادام. 2019 جىلعى ءبىرىنشى توقساندا ايلىق ورتاشا ەڭبەكاقى 168 489 تەڭگەنى قۇرادى. ماسەلەن، 10 قىزمەتكەر جۇمىس ىستەيتىن كاسىپورىن، ەگەر ءار قىزمەتكەر جىلىنا 3 رەت ەڭبەككە جارامسىزدىعى بويىنشا دەمالىس، ياعني «بولنيچنىي» الاتىن بولسا، ءۇش كۇندىك «بولنيچنىيعا» اقى تولەۋ ءۇشىن جىلىنا، شامامەن، 691 650 تەڭگە جوعالتادى ەكەن. ەگەر وسى ەسەپتەۋلەردى ەڭبەككە جارامدى حالىققا قولداناتىن بولساق، وندا قازاقستاندىق كومپانيالار جىلىنا 636،3 ملرد تەڭگەگە دەيىنگى سومادان ايىرىلۋى مۇمكىن.

دەر كەزىندە سىرقاتتىڭ الدىن الۋ جانە مەديتسينالىق تەكسەرۋدەن ۋاقتىلى  ءوتۋ بۇل شىعىنداردى بىرنەشە ەسە قىسقارتا الادى.

الماتى

سوڭعى جاڭالىقتار

شالقار كولىنىڭ ماسەلەسى شەشىلدى

ەكولوگيا • بۇگىن، 16:00

دوللار قىمباتتاي باستادى

قارجى • بۇگىن، 11:47

ۇقساس جاڭالىقتار