بەرەكەلى ءىستىڭ باسى-قاسىندا جۇرگەن ازاماتتىڭ ءبىرى – باقىتبەك اباتوۆ. يگىلىكتى ءىستى ەلوردادا وتىرىپ اتقارۋ قيىن بولعاندىقتان, ول ارنايى اۋىلعا كەلىپتى. بۇعان دەيىنگى فۋتبول الاڭىن سالۋ جۇمىستارى جەڭىلدەۋ بولسا, قۇرىلىس نىسانىن سالۋ الدەقايدا كۇردەلى جانە شارۋاسى كوپ. باقىتبەك مەشىتكە قاجەتتى قۇرىلىس زاتتارىن ساتىپ الۋ مەن جەتكىزۋ سەكىلدى ءتۇرلى شارۋالاردى تىڭدىرىپ ءجۇر.
مەشىتتىڭ قۇرىلىسى 16 ماۋسىمدا باستالعان. قازىر قابىرعالارى تۇرعىزىلىپ, توبەسى جابىلعان. 168 شارشى مەتردى الىپ جاتقان عيمارات بارلىق تالاپتارعا ساي سالىنادى. بۇل ءۇشىن اۋىلدىڭ جاناشىر ازاماتتارى 9 ملن تەڭگە اقشا جيناپ ۇلگەرگەن. قۇرىلىس ماتەريالدارىن نۇر-سۇلتان جانە قوستاناي قالالارىنان الدىرتۋ كەزىندە ترانسپورتتىق ماسەلەلەر تۋىنداعان. بىراق ساۋاپتى ىسكە قارجىلاي جانە باسقا دا ۇلەس قوسىپ جاتقان ادامداردىڭ كومەگىنىڭ ارقاسىندا جاعداي تەز رەتكە كەلۋدە. ەندىگى جۇمىس مەشىتتىڭ كۇمبەزىن كوتەرىپ, ىشكى جانە سىرتقى ارلەۋ جۇمىستارىن ءبىتىرۋ.
– اۋىلدا شامامەن مىڭعا جۋىق ادام تۇرادى. جىل سايىن حالىق سانى كوبەيىپ كەلەدى. جاستاردىڭ دا دىنگە دەگەن كوزقاراسى كوڭىل قۋانتادى. سوندىقتان جۇرتشىلىققا ارناپ قۇلشىلىق ءۇيىن سالۋدىڭ ءمانى زور. جانىندا تۇرعان ەسكى نامازحانانى جوندەپ, مەشىتتىڭ قاجەتىنە پايدالانۋ ويدا بار. ونىڭ ءبارى الداعى ۋاقىتتىڭ ەنشىسىندە. ەڭ باستىسى, كەلەسى ايدا مەشىتتى سالىپ بىتىرەمىز, – دەيدى باقىتبەك اباتوۆ.
قاراسۋلىقتار وسى قارقىنىن جوعالتپاسا, قىركۇيەككە دەيىن 200 ادام سىياتىن جاڭا مەشىت حالىقتىڭ قولدانىسىنا بەرىلەدى.
جانبولات كەنجەعۇل,
«Egemen Qazaqstan»
