فوتو: Polisia.kz
رەسپۋبليكا كولەمىندە 1-31 ءساۋىر ارالىعىندا «بەكىرە» جەدەل-پروفيلاكتيكالىق ءىس-شاراسى وتكىزىلىپ جاتىر. وسى شارا شەڭبەرىندە پاترۋلدىك پوليتسيا باتالونىنىڭ قىزمەتكەرلەرى كۇدىكتى اۆتوكولىكتى نازارعا العان.
تەكسەرۋ ماڭعىستاۋ وبلىسى پوليتسيا دەپارتامەنتىنىڭ جەدەل باسقارۋ ورتالىعىنداعى بەينەباقىلاۋ كامەرالارى ارقىلى تىركەلگەن. جەدەل باسقارۋ ورتالىعىنىڭ ينسپەكتورى الماتوۆ ر. دەر كەزىندە ارەكەت ەتىپ, كۇدىكتىنى ۇستاۋعا مۇمكىندىك بەردى.
اقتاۋ قالاسىنداعى ماەك ماڭىنداعى اينالما جولدا توقتاتىلعان كولىكتى تەكسەرۋ كەزىندە شامامەن 40 كەلى (9 دانا) زاڭسىز تاسىمالدانعان قىزىل بالىق انىقتالىپ, تاركىلەندى.
اتالعان فاكتى بويىنشا قىلمىستىق كودەكستىڭ 339-بابى (سيرەك كەزدەسەتىن جانە جويىلىپ كەتۋ قاۋپى تونگەن جانۋارلارمەن زاڭسىز اينالىسۋ) بويىنشا قىلمىستىق ءىس قوزعالدى.
بۇل وقيعا تابيعي بايلىقتاردى قورعاۋ جانە زاڭسىز اينالىمعا قارسى كۇرەستىڭ ماڭىزىن تاعى ءبىر مارتە كورسەتىپ وتىر. قۇقىق قورعاۋ ورگاندارى مۇنداي قۇقىق بۇزۋشىلىقتارعا توسقاۋىل قويۋ جۇمىستارىن كۇشەيتۋدى جالعاستىرادى.
