5-6 ماۋسىم كۇندەرى وتكەن جارىستاردا قازاقى تازى Club Show 2026, ENCI Winner 2026 جانە World Dog Show 2026 كورمەلەرىنە قاتىستى. بارلىق ۇسىنىلعان يتتەر «وتە جاقسى» دەگەن باعا الىپ, وتاندىق كينولوگتاردىڭ ەڭبەگىن دالەلدەدى.
Club Show 2026 كورمەسىندە لاشىن ۇزدىك تۇقىم وكىلى اتانسا, ENCI Winner 2026 حالىقارالىق جارىسىندا پەرس جەڭىمپاز بولدى. پەرس ءوز جاس ساناتىنداعى باسقا تازى تۇقىمدارىمەن باسەكەگە ءتۇسىپ, ءتورتىنشى ورىنعا يە بولىپ, تاريحي ناتيجە كورسەتتى.
World Dog Show 2026 كورمەسىندە لاشىن تاعى دا ۇزدىك تۇقىم وكىلى اتانىپ, چەلسي مەن تابيعات «جاس الەم چەمپيونى», ال لاشىن مەن رەيا «الەم چەمپيونى» اتاقتارىن جەڭىپ الدى. سونىمەن قاتار بىرنەشە قازاقى تازى يتاليا چەمپيونى جانە جاس يتاليا چەمپيونى اتاقتارىنا يە بولدى.
قازاقستان العاش رەت بەدەلدى TOP Dog 2026 حالىقارالىق شوۋىنا قاتىسىپ, وندا قازاقى تازى داستەر تانىستىرىلدى. ارەنادا قازاقستاننىڭ مەملەكەتتىك تۋى كورسەتىلىپ, ەلىمىزدىڭ اتاۋى الەمدىك كينولوگيالىق قاۋىمداستىق الدىندا جاريالاندى.
بۇل جەتىستىكتەر قازاقى تازىنىڭ حالىقارالىق دەڭگەيدە تانىمال بولا باستاعانىن كورسەتتى. 2024 جىلى حالىقارالىق كينولوگيالىق فەدەراتسيا قازاقى تازىنى الدىن الا مويىنداپ, قازاقستاندى تۇقىمنىڭ شىققان ەلى رەتىندە بەكىتكەن بولاتىن. بولونياداعى تابىستى ونەر كورسەتۋ قازاقى تازىنىڭ تولىق حالىقارالىق مويىندالۋىنا جاسالعان ماڭىزدى قادام بولدى.
