فوتو: istockphoto.com
رەيسىن كۇتىپ وتىرعان شەتەلدىك ازامات اۆتوۆوكزال ماڭىنداعى ورىندىقتا وتىرىپ, ۇيىقتاپ كەتكەن. ويانعان كەزدە جول سومكەسىنەن اقشاسى مەن تۋريست ءۇشىن ەڭ ماڭىزدى شەتەلدىك تولقۇجاتى جوعالعانىن بايقاعان. قۇجاتسىز ونىڭ كاناداعا ورالۋى قيىنعا سوعۋى مۇمكىن ەدى.
«مەن بىردەن «102» نومىرىنە حابارلاستىم. ماعان مىندەتتى تۇردە كومەكتەسەتىنىنە سەنىمدى بولدىم. بىرنەشە مينۋتتان كەيىن وقيعا ورنىنا پوليتسيا قىزمەتكەرلەرى كەلدى. مەن بولعان جاعدايدى ايتىپ بەردىم. ولار مەنى سابىرعا شاقىرىپ, جوعالعان زاتتاردىڭ تابىلاتىنىن ايتتى», دەيدى ليۋ فەنگا.
جەدەل ىزدەستىرۋ شارالارى بارىسىندا ەكى كۇدىكتى انىقتالىپ, ۇستالدى. ۇرلانعان تولقۇجات پەن اقشا تاركىلەنىپ, تولىق كولەمدە زاڭدى يەسىنە قايتارىلدى. وسىلايشا كانادا ازاماتى ساپارىن ەش كەدەرگىسىز جالعاستىرا الدى.
اتالعان دەرەك بويىنشا قىلمىستىق ءىس قوزعالدى. قازىرگى ۋاقىتتا ۇستالعانداردىڭ وڭىردە بۇعان دەيىن جاسالعان وسىعان ۇقساس قىلمىستارعا قاتىسى بار-جوعى تەكسەرىلىپ جاتىر.
