ساپار بارىسىندا پرەمەر-مينيستر الدىمەن «قازاقستاندىق اگرو-يننوۆاتسيالىق كورپوراتسياسى» جاۋاپكەرشىلىگى شەكتەۋلى سەرىكتەستىگىندە بولدى. بۇل كاسىپورىندا استىقتى ايماق ءۇشىن اسا قاجەتتى ءارتۇرلى اۋىل شارۋاشىلىعى تەحنيكالارى جينالادى. قۋاتتى تەحنيكالاردىڭ تىركەمەلەرى جەرگىلىكتى جەردە جاسالادى. جوبانىڭ قۇنى 4,7 ميلليارد تەڭگە. 2016 جىلى پايدالانۋعا بەرىلگەن كاسىپورىننىڭ ءار جىل سايىن 1500 دانا تەحنيكا شىعارۋعا مۇمكىندىگى بار. قازىرگى كۇنى كاسىپورىن شىعارعان تەحنيكالارعا ەلىمىزدىڭ كوپتەگەن وڭىرلەرىنەن سۇرانىس تۇسۋدە.
پرەمەر-مينيستر كاسىپورىنداعى الۋان ءتۇرلى تەحنيكا ۇلگىلەرىمەن تانىسىپ, شەتەلدىك اۋىل شارۋاشىلىعىنىڭ وسى زامانعى اسا قۋاتتى تەحنيكالارىنا باسەكەلەس بولا الاتىن قابىلەت-قارىمىن باعامدادى. مۇنان سوڭ وبلىس ورتالىعىندا سالىنىپ جاتقان «كوكشەتاۋ» فورۋم-ورتالىعىنىڭ قۇرىلىس الاڭىندا بولدى. «اق جەلكەن» قوناق ءۇي كەشەنىندە بولعان كەزىندە وبلىس اكىمى ەرمەك مارجىقپاەۆ قالانىڭ باس جوباسىنا بايلانىستى قوپا كولىن جاعالاي سالىناتىن زاماناۋي قۇرىلىس جوسپارىمەن ەگجەي-تەگجەيلى تانىستىردى. كول جاعالاۋى اباتتاندىرىلىپ, كوپقاباتتى ۇيلەرمەن قاتار, الەۋمەتتىك-تۇرمىستىق قىزمەت كورسەتەتىن سانالۋان نىساندار بوي كوتەرمەك. كەنەسارى كوشەسىنەن باستاۋ الاتىن كەڭ داڭعىل جاعالاۋدى جاناي ءوتىپ, ۆاسيلكوۆكا شاعىن اۋدانىنا دەيىن سوزىلادى. بۇل جوبا قالا كوركىن كىرگىزۋمەن قاتار, باسپانا ماسەلەسىن شەشۋگە وڭ اسەر ەتپەك.
جەرگىلىكتى جەردە ءونىم ءوندىرۋ وتە ماڭىزدى. قالاداعى «دۆا كيتا» جاۋاپكەرشىلىگى شەكتەۋلى سەرىكتەستىگى جيھاز جاساۋمەن اينالىسادى. 2003 جىلدان باستاپ جۇمىس ىستەپ كەلە جاتقان كاسىپورىن 2015 جىلى وسى زامانعى وزىق تەحنولوگيامەن جۇمىس ىستەۋگە مۇمكىندىك بەرەتىن جاڭا قۇرال-جابدىقتارىن ساتىپ الىپ, جاڭعىرۋ ساتىسىنان وتكەن بولاتىن. بۇگىنگى كۇنى كاسىپورىننىڭ بۇيىمدارى ءوز ەلىمىزدە جانە رەسەيدىڭ ساۋدا نۇكتەلەرىندە سۇرانىسقا يە.
مۇنان سوڭ پرەمەر-مينيستر اسقار مامين «كاماز-ينجينيرينگ» اكتسيونەرلىك قوعامىندا بولىپ, كاسىپورىننىڭ تىنىس-تىرشىلىگىمەن تانىستى. ەلىمىزدەگى كولىك شىعارۋ وندىرىسىنە قوماقتى ۇلەس قوسىپ وتىرعان كاسىپورىننىڭ جىلدىق قۋاتى ءۇش مىڭ كولىككە تەڭ. بۇل كۇندە ءوندىرىس قۋاتىن بارىنشا ارتتىرىپ وتىرعان كاسىپورىن 2005 جىلدان بەرى جۇمىس ىستەيدى. كاسىپورىن شىعارعان كولىكتەردى قازاقستاننىڭ كەز-كەلگەن جەرىنەن كەزدەستىرۋگە بولادى. بۇگىندە 700-دەن استام ادام جۇمىس ىستەيتىن كاسىپورىنداعى ورتاشا جالاقى 150 000 تەڭگە.
ساپار سوڭىندا وبلىستىق اكىمدىكتە ءوڭىردىڭ الەۋەتىن ارتتىرۋ ماسەلەلەرىن جان-جاقتى تالقىلاعان كەڭەس وتكىزىلدى.
