ەل نازارىن وزىنە اۋداراتىن جاعىمدى جاڭالىقتىڭ تۇساۋكەسەرىندە حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعىنىڭ باسشىسى ءراپىل جوشىباەۆ پەن قازاقستانداعى بۇۇ دامۋ باعدارلاماسىنىڭ تۇراقتى وكىلى ۆيتالي ۆرەميش اق جول تىلەدى.
اۆتوشەرۋ الدىندا IGTIC الاڭىندا ورتالىق جانە جەرگىلىكتى مەملەكەتتىك ورگانداردىڭ, اۆتوكولىك كومپانيالارى مەن حالىقارالىق ۇيىمداردىڭ, ءىسكەرلىك ورتا وكىلدەرىنىڭ قاتىسۋىمەن دوڭگەلەك ۇستەل ءوتىپ, بالامالى كولىك ءتۇرىنىڭ جەتىستىكتەرى قولمەن قويعانداي ءتۇسىندىرىلدى. بۇل باسقوسۋعا مۇددەلى ۇيىمداردىڭ وكىلدەرى قاتىستى. قولجەتىمدى تەحنولوگيانىڭ ەڭ ءۇزدىگىن پايدالانا وتىرىپ, حالىقارالىق جاسىل تەحنولوگيالار جانە ينۆەستيتسيالىق جوبالار ورتالىعى قازاقستاندا جەڭىل كولىكتەردى عانا ەمەس, سونىمەن بىرگە جۇك ەلەكترموبيلدەرىن شىعاراتىن ءوز ءوندىرىسىن قالىپتاستىرۋعا ىنتالى. بۇل دەگەنىڭىز, الدىمەن مىڭداعان جاڭا جۇمىس ورنى. وعان قوسا, ومىرشەڭ بيزنەستىڭ دامۋى.
ەلەكتركارلار كورمەسىنە وتاندىق ءوندىرىستىڭ ونىمدەرى اۆتوموبيل تۇرلەرىمەن بىرگە امەريكالىق Tesla, نەمىستىڭ BMW جانە Smart Fortwo ED, جاپوندىق Lexus, بريتاندىق Jaguar ءجانە قىتايدىڭ Ankai كومپانيالارىنىڭ وكىلدەرى قاتىستى. جۇرت نازارىن Jrun ەلەكتركارلار كومانداسىنىڭ NU Team ستۋدەنتتەر جوباسى اۋداردى. كولىكتىڭ ءار بولشەگى مۇقيات ەسەپتەلىپ, ءتيىمدى جاسالعان ەكەن. قۇراستىرۋشى ينجەنەرلەرى مەن كونسترۋكتورلارى – نازارباەۆ ۋنيۆەرسيتەتتىڭ ءتورتىنشى كۋرس ستۋدەنتتەرى. NURIS كومانداسىنىڭ قولداۋىمەن ستۋدەنتتەر ءبىر جىل ىشىندە اۋەلى جوبالاپ, سودان سوڭ جيناپ ۇلگەرگەن. سينگاپۋردە ەلەكتركارلار كاتەگورياسى بويىنشا وتكەن بايقاۋدا 14-ورىن الىپتى.
بۇگىنگى تاڭدا ەلەكترموبيلدەر ەلگە تاڭسىق ەمەس. 2016 جىلدان باستاپ قوستانايدا قىتايلىق ارىپتەستەرمەن بىرلەسىپ شىعارا باستادى. ءسوز اراسىندا JAC iEV7S مودەلىنىڭ قازاقستاندا شىعارىلا باستاعانىن, ەۋرازيالىق وداقتىڭ كولىكتىڭ وسى ءتۇرى بويىنشا رەسمي قۇپتاۋىنا يە بولعانىن ايتا كەتكەن ءلازىم. بىرلەسە شىعارۋدىڭ وزىندىك ءمانى دە بار. 2018 جىلى الەمدە ەلەكترموبيل تۇرلەرىن شىعارۋدان قىتاي كوش باستاپ كەلەدى. ولاردا 1 200 000 وسىنداي كولىك تۇرلەرى شىعارىلىپ, ساتىلعان.
