ايماقتار • 11 ماۋسىم، 2019

قازاقستاننىڭ ءسۇت وداعى وتاندىق بالمۇزداق كومپانياسىنىڭ ساپاسىن كوتەرۋگە سەپتەسەدى

قازاقستاننىڭ ءسۇت وداعى ەلىمىزدە ءبىرىنشى بولىپ بالمۇزداقتى ەكسپورتقا شىعارۋعا قول جەتكىزگەن «شين-لاين» كومپانياسىن قاتارىنا الدى.

ايناش ەسالى

وداققا قوسىلۋ ەكى تاراپتىڭ دامۋ ستراتەگياسىنا نەگىزدەلگەن. ءبىر جاعىنان، قازاقستاننىڭ ءسۇت وداعىنىڭ باسىم مىندەتى وتاندىق شيكىزاتتىڭ جەتىسپەۋشىلىگىن تولىقتىرۋ جانە وتاندىق ءونىمنىڭ باسەكەگە قابىلەتتىلىگىن ارتتىرۋ بولىپ تابىلادى. ەكىنشى جاعىنان «شين-لاين» كاسىپورنى قازاقستاننىڭ بالمۇزداق نارىعىنىڭ پوزيتسيالارىن نىعايتۋ سالاسىندا قسو-نا ءوز تاجىريبەسىن ۇسىنۋعا دايىن. بۇدان بىلاي مۇنداي سالالىق بىرلەستىككە كومپانيانىڭ مۇشەلىگى جەرگىلىكتى نارىق قاتىسۋشىلارى ءۇشىن ۇلكەن مۇمكىندىكتەر اشادى.

ويتكەنى «شين-لاين» كومپانياسى وتاندىق يندۋستريانى دامىتۋدا بەلسەندى ۇستانىمعا ۇمتىلىپ وتىرعانى بەلگىلى.

– قازاقستاننىڭ ءسۇت وداعى ءسۇت ونىمدەرىنىڭ قازاقستاندىق تۇتىنۋشىلارىن قازاقستاندىق ءوندىرىس ونىمدەرىن تاڭداۋعا ىنتالاندىرۋعا جانە قازاقستاندىق نارىقتى جوعارى ساپالى جانە زاڭدى تۇردە شىعارىلعان تاۋارلارمەن تولىقتىرۋعا كۇش-جىگەرىن جۇمسايدى. بيزنەسىنىڭ 70% بالمۇزداقپەن بايلانىستى «شين-لاين» كومپانياسى ءبىزدىڭ بىرلەستىگىمىزدىڭ تۇتاس سەكتسياسىنىڭ نەگىزىن قالاۋشى بولىپ تابىلادى جانە ءوز تاجىريبەسىن، ساراپتاماسىن ەنگىزە الادى، قازاقستانداعى بالمۇزداق ءوندىرىسىنىڭ قاۋىپسىزدىگى مەن ساپاسىنا نازار اۋدارا الادى، – دەدى قازاقستاننىڭ ءسۇت وداعى اتقارۋشى ديرەكتورى ۆلاديمير كوجەۆنيكوۆ.

ەندىگى جەردە قازاقستاندىق ءسۇت وداعى مەن «شين-لاين» جازعى ماۋسىمنىڭ باسىندا تۇتىنۋشىلاردىڭ نازارىن ساۋدا-ساتتىق شارتتارىنا، ونىڭ ىشىندە ساتىپ الىناتىن ونىمدەرگە، ساقتاۋ مەرزىمىنە، قاپتاماعا اۋدارادى. سەبەبى كوبىنەسە ساقتاۋ شارتتارى مەن تەمپەراتۋرالىق رەجيم بۇزىلۋىمەن ساتىلاتىن ورامسىز ونىمدەردىڭ ساپاسى وزەكتى بولىپ تابىلادى. ەگەر ءسۇت ونىمدەرى ءۇشىن تەمپەراتۋرا -6-دان -4 گرادۋسقا دەيىن قاجەت بولسا، وندا -20 بالمۇزداق جازعى ىستىقتا ەڭ قولايلى جاعداي بولىپ تابىلادى. قاپتالماعان، گەرمەتيكالىق ەمەس وراماسى بار جانە انىق ەمەس ءماتىنى بار ونىمدەر، ءوندىرۋشى مەن قۇرامى كورسەتىلمەگەن، قۇنى تومەندەتىلگەن ءونىم – تۇتىنۋشىنى ەلەڭ ەتكىزۋى ءتيىس.

– قاپتاما – كومپانيا جاۋاپكەرشىلىگى مەن تەحرەگلامەنتكە باعىنۋدىڭ كورىنىسى. نارىقتىڭ بارلىق قاتىسۋشىلارى ءونىمدى تالاپتارعا سايكەس، ءونىمنىڭ دۇرىس اتاۋىن، شيكىزاتتىڭ قۇرامىن تاڭبالاۋى قاجەت. قاپتاماداعى شيكىزات قۇرامى مازمۇندى تولىق اشىپ، دۇرىس تەرميندەردى، كەدەن وداعى ەلدەرىنىڭ تىلدەرىن، ءماتىندى باسۋدا جاقسى باسپا ساپاسىن پايدالانۋى ءتيىس، مۇنىڭ بارلىعى تۇتىنۋشىعا دۇرىس تاڭداۋ جاساۋعا سەپتەسەدى، – دەدى ۆلاديمير كوجەۆنيكوۆ.

«شين-لاين» كومپانياسى سونداي-اق رەسەيدىڭ بالمۇزداقشىلار وداعىنا كىرگەنى تۋرالى مالىمدەدى. وسىعان بايلانىستى بۇگىنگى كۇنى وتاندىق كومپانيانىڭ رەسەيلىك وداققا كىرۋدەگى ارتىقشىلىقتارىنىڭ ءبىرى كورشى ەل نارىعىن يگەرۋ بولىپ تابىلادى. بۇدان بىلاي قازاقستاندىق وكىلدىك رەسەيلىك كونفەرەنتسيالاردا، كورمەلەردە، سەمينارلاردا ەستىلىپ، كورىنىس تابادى.

الماتى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز