بالالاردى قورعاۋ كۇنى مەرەكەسىنىڭ شالقىعان شاتتىعى تارقاماي, ىلە وسىنداي الەۋمەتتىك قامقورلىقتى ايگىلەيتىن وقيعانىڭ ورىن الۋى ەلىمىزدە وتباسىلىق قۇندىلىقتاردى ساقتاۋ جانە قاناتتى قامقورلىق كورسەتۋدىڭ جارقىن مىسالى ىسپەتتى. سالتاناتتى راسىمگە جينالعان جاماعاتتىڭ قۋانىشىندا شەك جوق. ءبىر-بىرىنەن ءسۇيىنشى سۇراپ, قۇتتى بولسىن ايتىپ, اقجارىلقاپ تىلەكتەرىن جەتكىزىپ جاتتى.
الدىمەن ءسوز العان وبلىس اكىمى ەرمەك مارجىقپاەۆ كوپشىلىكتى مەرەكەلەرىمەن قۇتتىقتاي كەلىپ, ەلباسى نۇرسۇلتان نازارباەۆتىڭ تاۋەلسىزدىكتىڭ العاشقى جىلدارىنان باستاپ ءاربىر قازاقستاندىقتىڭ جاعدايىن جاقسارتۋعا ايرىقشا كوڭىل ءبولىپ كەلگەندىگىن ەكپىن تۇسىرە ايتىپ ءوتتى. قاۋمالاعان قاۋىمعا وبلىس اكىمى ءدال وسىنداي قامقورلىقتىڭ التىن ءتىنى ۇزىلمەيتىندىگىن, الداعى ۋاقىتتا دا جالعاسا بەرەتىندىگىن جەتكىزدى. قازىر بۇل ماسەلەگە ەل پرەزيدەنتى قاسىم-جومارت توقاەۆ ەرەكشە ءمان بەرىپ وتىر. وسى ورايدا, مەملەكەتتىك شاراپاتى مول باعدارلامالار ءتۇزىلىپ, يگىلىكتى ىستەر جۇزەگە اسىرىلۋدا. اقمولا وبلىسىندا دا سوڭعى جىلدارى قۇرىلىس جۇمىستارى قارقىندى جۇرگىزىلۋدە. جەر-جەردە تۇرعىن ۇيلەر بۇرىنعىمەن سالىستىرعاندا كوپ سالىنعان سوڭ بۇگىنگىدەي جان جادىراتار جاقسى ءىستى ساتىمەن ساباقتاۋعا مول مۇمكىندىك تۋىپ وتىر. سوڭعى ەكى جىلدا «نۇرلى جەر» باعدارلاماسىن جۇزەگە اسىرۋ اياسىندا جالعا جانە نەسيەگە بەرىلەتىن 11 كوپقاباتتى ءۇي تۇرعىزىلىپ, 8350 وتباسى تۇرعىن ءۇي جاعدايىن جاقسارتتى. وبلىس ورتالىعىندا دا ورالىمدى شارۋالار جۇزەگە اسىرىلۋدا. سوڭعى بەس جىلدىڭ ىشىندە جاڭادان بوي كوتەرگەن سارىارقا شاعىن اۋدانىندا 37 كوپقاباتتى ءۇي تۇرعىزىلىپ, ەكى جۇزگە جۋىق پاتەرگە مۇقتاج وتباسىلار قونىس تويىن تويلادى.
– مەملەكەتتىڭ وسى ءبىر قامقورلىعىنا انا رەتىندە ەت جۇرەگىڭ ەلجىرەيتىندىگى ءسوزسىز, – دەيدى ون بالانىڭ اناسى سۆەتلانا سادۋاقاسوۆا, –قۋانىشتان اۋزىما ءسوز تۇسپەي تۇر. ايتار العىسىم شەكسىز. 14 جىل بويى كەزەكتە تۇرىپ ەدىم.
پاتەرگە قول جەتكىزىپ, كول-كوسىر قۋانىشقا كەنەلگەن قالا تۇرعىنىنىڭ ءبىرى رومان چەپ. ول 2013 جىلى بالالار ۇيىنەن ۇلكەن ومىرگە جولداما العان ەكەن. بۇگىندە ءوزى ەكى بالانىڭ اكەسى. جاڭا پاتەرگە يە بولعان روماننىڭ دا الەۋمەتتىك كومەك تۇرعىسىنداعى مەملەكەت ساياساتىنا دەگەن ريزاشىلىعىن تىلمەن ايتىپ جەتكىزۋ مۇمكىن ەمەس. التى بالا باعىپ وتىرعان ەركىن بالتاباەۆتىڭ وتباسى دا كوپتەن كۇتكەن ارماندارى ورىندالىپ, قۋانىشقا كەنەلىپ قالدى. ءدال وسى كۇنى 70 وتباسى جاڭادان بوي كوتەرگەن, سىڭعىراپ تۇرعان جاڭا ۇيدە قونىس تويىن تويلاپ, توبەلەرى كوككە ءبىر-اق ەلى جەتپەي قالدى.
سالتاناتتى راسىمنەن كەيىن وبلىس اكىمى باستاعان رەسمي توپ پايدالانۋعا بەرىلگەن پاتەرلەردى ارالاپ كوردى. جاڭا پاتەر يەلەرى وزدەرى دە بىزدەردە مىناداي بار, مىناداي بار دەپ, كەلگەندەرگە قۇراق ۇشىپ قارسى الىپ, كورسەتىپ جاتىر. تۇرعىن ءۇيدىڭ الدىنداعى الاڭ اباتتاندىرىلعان, بالالار وينايتىن الاڭ جاسالىپتى.
كوپتەن بەرى ءۇي كەزەگىندە تۇرعان ادامدار بىرتىندەپ ءدال وسىلاي تۇرعىن ماسەلەسىن شەشەتىن بولادى.
