مۇگەدەكتەر ارباسىنا تاڭىلعالى ون جىلدان استام ۋاقىت وتكەن رامازان مۇقاتاەۆ جايدارى قارسى الدى. الگى كوڭىلدەگى كۇدىك ءاپ-ساتتە تارقاپ كەتكەن. بۇرىننان ەتەنە جاقىن ادامداي اماندىق-ساۋلىقتان سوڭ قاۋقىلداسىپ قالدىق. اقجارقىن, كىشىپەيىل, جايدارى جان ەكەن. اۋەلگى تاقىرىپ قازىرگى كاسىبىنە اۋعان.
– بۇرىن تىگىن ماشينالارىن ءجوندەۋ ءبىرتۇرلى قىزىق بولىپ كورىنەتىن. ءبىر-بىرىنە ۇقسامايتىن ءتۇرلى ماشينالاردىڭ قۇرىلىسىن, قاپتاعان ۇساق تەتىكتەرىنىڭ قىزمەتىن ۇعۋ, قيسىنىن ءتۇسىنۋ كوڭىلىمدى باۋراپ تۇراتىن. سىرىن ۇققىم كەلگەن. ول تۇستا اۋەسقويلىق ەدى, – دەيدى شەبەر, – تىگىن ماشيناسىنىڭ سان ءتۇرى بار عوي. اياقپەن, قولمەن جۇرگىزەتىن, كوبىنە ەلەكتر قۋاتىمەن جۇرگىزىلەتىن ماشينالار. نەگىزىنەن, رەسەيدىڭ توبىل قالاسىنداعى زاۋىتتان شىققان. كەيىن قىتايدىڭ ماشيناسى كوبەيدى. قازىر ءبىر وڭدى جەرى – الەۋمەتتىك جەلىنىڭ كومەگى زور. ءبىرىنشى رەت كەزدەسىپ تۇرعان تۇرلەرىن سودان قاراپ الامىز. ەڭ الدىمەن اقاۋىن تابۋ كەرەك. ودان كەيىنگىسى وڭاي. قوسالقى بولشەكتەردى تاپسىرىس ارقىلى الدىرامىز.
سولتۇستىك قازاقستان وبلىسىنىڭ ايىرتاۋ اۋدانىنا قاراستى ەلەتسكي ەلدى مەكەنىندە تۋىپ-وسكەن رامازان ورتا مەكتەپتى بىتىرگەننەن كەيىن تسەلينوگراد قالاسىنداعى ينجەنەرلىك-قۇرىلىس ينستيتۋتىن ءبىتىرگەن. ەلەتسكي نەگىزىنەن تىڭگەرلەردىڭ مەكەنى. جەرگىلىكتى ۇلت وكىلدەرى ساۋساقپەن سانارلىق. بىراق كەيىپكەرىمىز انا ءتىلىن كوركەمدەپ, كەستەلەپ ءسويلەيدى ەكەن. جەتىستىگىنىڭ جايىن سۇراعانبىز,
– اجەمنىڭ باۋىرىندا ءوستىم, – دەيدى شەبەر, – ەڭبەكقور جان ەدى. قولىنان كەلمەيتىنى جوق. بالكىم, بويىمداعى ەڭبەككە دەگەن قۇشتارلىقتى, ۇلتىمىزدىڭ عاجايىپ سالت-ءداستۇرىنىڭ جۇقاناسى سول كىسىدەن جۇققان-اۋ دەپ توپشىلايمىن. ەرتەرەكتە تۇڭعىش پەرزەنتتى اكە-شەشەسىنىڭ قولىنان الىپ, اتاسى مەن اجەسى باۋىرىنا سالدى عوي. سول دۇرىس ەدى.
– ەسكى جارانىڭ اۋزىن تىرنادى دەمەڭىز, دەنساۋلىعىڭىزعا زيان كەلگەن وقيعا استاناداعى قۇرىلىستا جۇمىس ىستەپ جۇرگەن كەزىڭىزدە بولدى ما؟ – دەپ سارىمايدان قىل سۋىرعانداي جانىنا تيگىزبەي سۇرادىق.
جاڭا عانا جاز گ ۇلىندەي جايناپ وتىرعان قاباققا بولار-بولماس كىربىڭ ءتۇستى. كوكىرەگى قارس ايرىلارداي تەرەڭ كۇرسىنگەن.
مانا العاش ءسوز ساباقتاعان كەزدە تىگىن ماشينالارىن جوندەۋ ءجاسوسپىرىم كەزىنەن بەرى قىزىعىپ ىستەيتىن, اڭسارى اۋىپ تۇراتىن, اۋەسقويلىعى باسىم شارۋام ەدى دەگەن بولاتىن. كەيىن ارباعا تاڭىلعان سوڭ كادىمگىدەي كاسىپكە اينالعان.
– تۇتىنۋشىلارىڭىز كوپ ەمەس شىعار. كەلىن-كەپشىك ينە ساباقتاۋدى ۇمىتقالى قاشان؟ زاۋدە ءبىر كيىم قىسقارتۋ قاجەت بولسا, ورتالىقتا تىگىن تسەحتارى سامساپ تۇر عوي. سولاردىڭ قىزمەتىنە جۇگىنەمىز, – دەدىك ءبىز تىگىنشىلىك جايلى باستاۋىش ءبىلىمىمىزدى نەگىزگە الىپ.
تىرشىلىك ءۇشىن تىرنەكتەپ, تىربانىپ جۇرگەن جاننىڭ تابىسىن سۇراۋ ابەستەۋ ەدى. تەك ماناعى ءبىز قىزىققان ءۇيدى اۋەلى جالداپ تۇرىپ, كەيىن ساتىپ العانىن ەستىگەندە, كوڭىل توعايىپ قالدى.
ءۇيدىڭ سىرتى قانداي اسەم بولسا, ءىشى دە قۇرقىلتايدىڭ ۇياسىنداي جىپ-جىلى ەكەن. بۇرىن دا ىدىس-اياق سىلدىرلاماعان, ال قول ارباعا تاڭىلعاننان بەرى ىنتىماق-بىرلىك ءتىپتى ارتا تۇسكەندەي. كوزىنىڭ اعى مەن قاراسىنداي ەكى قىزى جەلكىلدەپ ءوسىپ كەلەدى.
رامازاننىڭ ءبىر ويى ءتىپتى قىزىق ەكەن. تىگىن ماشيناسىنىڭ قۇجىناعان تەتىكتەرىن قوعام مۇشەلەرىنە ۇقساتادى. ايتالىق, تىگىن ماشيناسىنىڭ بار تەتىگى مۇلتىكسىز جۇمىس ىستەپ تۇرسا, ءجىپ تە ۇزىلمەيدى, تىگىس تە ءتۇزۋ تۇسەدى. قوعام دا سولاي, ونىڭ ءار مۇشەسى قالتقىسىز قىزمەت ەتكەندە عانا ءبىرتۇتاس جاسامپاز الەمگە اينالادى. بەلدەن كەلەتىن بەينەتتى كەشىپ جۇرسە دە, جاستاردىڭ تاربيەسىنە ءوز ۇلەسىن قوسىپ جاتىر ەكەن. وبلىس ورتالىعىنداعى ۇستەل تەننيسىمەن اينالىساتىن ءمۇمكىندىگى شەكتەۋلى جانداردىڭ جاتتىقتىرۋشىسى. ايتۋىنا قاراعاندا, باسىم كوپشىلىگى جاستار. وبلىستىق قۇراما كوماندانىڭ مۇشەلەرى. ەڭبەك ەتۋ, سپورتپەن اينالىسۋ تاعدىر تالكەگىنە ۇشىراعان ادامداردىڭ كوكىرەگىندەگى ومىرگە دەگەن قۇشتارلىقتى ارتتىرا ءتۇسپەك. ال شەبەر بولسا, ولاردىڭ بويىنداعى جاسۋ, قامىعۋ ءتارىزدى كەيبىر اقاۋلاردى تۇزەتىپ, ءتۇزۋ جولعا سالماق.
كوكىرەگىندە كوپ ارمان ءبۇر جارىپ وتىرعان قايسار جىگىتتىڭ ۇيىنەن ءارى تاڭىرقاپ, ءارى رازى بولىپ اتتاندىق. جىگىتتىك مىنەزىنە, ەرگە ءتان ەرلىك قيمىلىنا!
