بوگەنباي قۇتتىقادام ۇلى 1761 جىلى زەرەندى وڭىرىندە دۇنيەگە كەلگەن. بار عۇمىرى ەل ىشىندەگى ىنتىماقتى نىعايتۋعا باعىتتالعان, تۋعان جەرىن كەلىمسەكتەردىڭ تابانىمەن تاپتاتپاۋعا تىرىسقان قاجىرلى كۇرەسكەرلىكپەن وتكەن. توپىراق تا وسى وڭىردەن بۇيىرىپتى.
ۇلى ابىلايدى كوزى كورگەن, كەنەسارى حانعا ۇزەڭگىلەس سەرىك بولعان ءاز-بوگەنباي بابامىزدىڭ تاپقىرلىعى مەن جاۋجۇرەكتىگى جايلى اڭىز كوپ. ءبىر-بىرىمەن ساباقتاسىپ جاتاتىن ەستەلىكتەردىڭ نەگىزگى تاقىرىبى ءبيدىڭ دانالىعى مەن ەرلىگى. قازىرگى كۇنى ارۋاقتى بيدەن تاراعان ۇرپاق زەرەندى اۋدانىنىڭ ايدابول, ارىدەگى ساندىقتاۋ وڭىرىندە تامىر جايعان. تەكتىدەن تاراعان تەگىن بولا ما؟ ەرجۇرەكتىگىمەن, ەل قورعاعان ەرلىگىمەن ەسىمدەرى ەل ەسىندە ساقتالعان جارىلعاپ, شاۋىپكەل, تولەباي باتىرلار تۋرالى ەل ىشىندەگى كونەكوز قاريالار كۇنى بۇگىنگە دەيىن اۋىزدارىنىڭ سۋى قۇرىپ ايتىپ وتىرادى.
ءبيدىڭ مازارى زەرەندى اۋىلىنان وڭتۇستىك باعىتقا قاراي 25 شاقىرىم جەردە. ايدابول وزەنىنىڭ وڭ قاباعىنا سالىنعان. بوگەنباي بي 105 جاسىندا دۇنيەدەن وتكەن. بولاشاقتى بولجاي بىلگەن كورەگەندىگىنىڭ ارقاسىندا كوزى تىرىسىندە اۋليە اتانعان ادام. 2006 جىلى زەرەندى اۋدانىنىڭ ازاماتتارى ءوز ەلىندە ءاز-بوگەنباي بي مەن ءاز-توعاي ۇلى باتىرلارعا ارناپ بيىكتىگى 7 مەترگە جۋىق مازار تۇرعىزدى. قازىر تامىلجىعان كوركەم تابيعاتتىڭ اياسىنداعى ەڭسەلى مازار كيەلى جەر ساناتىندا.
اقمولا وبلىسى,
زەرەندى اۋدانى
