ءسال ىقشامداپ ايتقاندا, اكادەميا مىندەتى جاس تولقىندى ءوز وتانىن سۇيۋگە, ونىڭ وتكەنى مەن بۇگىنىن سارالاي سالماقتاپ, ساناعا سىڭىرۋگە ىقپال ەتەدى. وتانعا ادال بولۋعا, دامۋى مەن كوركەيۋىنە ءوز ۇلەسىن قوسۋعا تاربيەلەيدى.
فورۋمدا العاشقى ءسوزدى ءبىلىم جانە عىلىم ۆيتسە-ءمينيسترى ەلميرا سۋحانبەرديەۆا ساباقتادى. ونىڭ ايتۋىنشا, پاتريوتيزم – رۋحاني جاڭعىرۋدىڭ بەرىك ىرگەتاسى.
– ەلباسى نۇرسۇلتان نازارباەۆ ءۇستىمىزدەگى جىلدى جاستار جىلى دەپ جاريالاۋىنىڭ زور ماڭىزى بار, – دەدى ول. – كەلەشەك جاستاردىڭ قولىندا. جاي عانا جاستار ەمەس, ءبىلىمدى دە بىلىكتى, قارىمدى دا قابىلەتتى جاس تولقىن ماڭگىلىك ەلدىڭ مۇراتىن جۇزەگە اسىراتىن بولادى. ولار ەكونوميكادا دا, رۋحاني دۇنيەدە دە الەمدەگى ەڭ دامىعان وركەنيەتتى ەلدەرمەن يىق تىرەستىرۋى كەرەك. ءبىز قازىردىڭ وزىندە الەمدەگى دامىعان ەلۋ ەلدىڭ ورتاسىنان ويىپ تۇرىپ ءوز ورنىمىزدى الدىق. ەندىگى ارادا سول جەتىستىكتى ءارى قاراي دامىتاتىن جاس تولقىن.
«ەل بولاشاعى – ءبىزدىڭ قولىمىزدا» اتتى الەۋمەتتىك جوبا تانىستىرىلدى. « ۇلى دالا ۇرپاعى – جاساي بەرسىن ماڭگىلىك» ايدارىمەن پاتريوت كوشباسشىلاردى توپتاستىرۋعا ارنالعان جۇمىس تۇرلەرى جۇرگىزىلدى. اسەرشىل جاستار ءۇشىن فورۋمعا كەلگەن قوناقتاردىڭ تۇلعالىق ءبىتىمى دە زور اسەر ەتتى. ماسەلەن, عارىشكەر, حالىق قاھارمانى ايدىن ايىمبەتوۆ ورتاعا شىققان كەزدە جاستاردىڭ قوشەمەتىندە شەك بولعان جوق.
بەلگىلى ەسترادا ءانشىسى تامارا اسار باستاعان ونەر ادامدارى فورۋمنىڭ قىزعىلىقتى وتۋىنە اتسالىستى. بۇگىنگى جاستار دا كەز كەلگەن ورتانى كوركەيتەتىن, شىرايىن كەلتىرەتىن ونەردى بويىنا سىڭىرگەن تولقىن. تاربيەلەرى دە ءتالىمدى.
– ءبىزدىڭ مەكتەپتە دە ءدال وسىنداي تاقىرىپتاردا تاربيە ساعاتتارى وتكىزىلەدى, – دەيدى پاۆلودار قالاسىنداعى №35 مەكتەپتىڭ وقۋشىسى دايىر الكەەۆ. – ءبىز بۇل جولى سول ءبىلىمىمىزدى تەرەڭدەتىپ, رۋحاني كوكجيەگىمىزدى بايىتا تۇستىك. وتاندى ءسۇيۋ ءۇشىن ونىڭ وتكەنىن بىلگەن جاقسى. وسى دالانى كوزىنىڭ قاراشىعىنداي قورعاعان باتىر بابالارىمىزدىڭ ەرلىك ءىسىن ويىمىزعا توقىساق, وتكەنگە قۇرمەت ارتا تۇسەدى. ءارى قازاقتىڭ باتىر, ونەرلى, دانا حالىق ەكەندىگىن ۇققان سايىن جاس جۇرەگىڭدى ماقتانىش سەزىمى كەرنەيدى.
