بۇدان بىرەر جىل بۇرىن ساۋلە اۋىلىمەن كورشىلەس قونعان قويتاس ەلدى مەكەنى ۇدەرە كوشىپ كەتكەن بولاتىن. كوشكەن ەلدىڭ جۇرتىندا قالعان ۇلى وتان سوعىسى جاۋىنگەرلەرىنە ارنالعان ەسكەرتكىشتى سول ەلدىڭ ازاماتى, كەيىن ساۋلەگە كوشىپ كەلگەن ساتاي ايباتىروۆ جاڭا قونىسىنا كوشىرىپ اكەلىپ ورناتتى. اتالارىنا دەگەن قۇرمەت, ارۋاققا دەگەن تاعزىم. ونەگەلى ىسكە وسى ەلدىڭ اپتال ازاماتتارىنىڭ ءبىرى ايتمۇحامبەت عابباسوۆ باستاعان اۋىل ادامدارى جۇمىلا كىرىسىپ, ۇيىمشىلدىق تانىتتى. اسىرەسە, بۋراباي اۋداندىق ەلەكتر جەلىلەرى بولىمشەسىنىڭ باسشىسى ازامات ارعىنباەۆتىڭ ەڭبەگىن ەرەكشە اتاپ وتكەن ءلازىم. سونداي-اق, ەل ازاماتتارى تەمىربەك سماعۇل, نۇرلان ساعىناەۆ, قۋانىش ساعىمباەۆ ءتارىزدى ازاماتتار دا بىرلىكتەرىنىڭ بەكەم ەكەندىگىن اڭعارتتى.
ەسكەرتكىشتىڭ اشىلۋ سالتاناتىن وتكىزۋگە سەلولىق وكرۋگ اكىمى ءۋاليحان بوستانوۆ پەن اۋىل تۇرعىندارى بىرلەسىپ قاراجات جينادى. ەل ىشىندەگى جامبىل جاقىپوۆ, بولاتبەك تىلەۋكەنوۆ, رايىس حاميدۋللين ءتارىزدى كاسىپكەرلەر قوماقتى كومەك كورسەتتى. ەسكەرتكىشتىڭ ماڭايى اباتتاندىرىلىپ, گۇل شوقتارى قويىلدى.
اشىلۋ سالتاناتىندا ءسوز سويلەگەن اۋدان اكىمى ەرمەك نۇعىمانوۆ كەيىنگى ۇرپاققا ۇلگى-ونەگە بولاتىن ءدال وسىنداي ەڭسەلى ءىستى ەڭسەرۋ ەل ازاماتتارىنىڭ مىقتى اۋىز بىرلىگىن كورسەتەتىندىگىن, بۇل ەڭ الدىمەن ەل قورعاعان ەرلەردىڭ ارۋاعىنا دەگەن قۇرمەت ەكەندىگىن تەرەڭنەن تولعاپ تەبىرەنە ايتىپ بەردى. ارۋاقتارعا باعىشتالىپ قۇران وقىلدى, مايدانگەرلەر ەرلىگىن پاش ەتەتىن مازمۇندى كونتسەرت قويىلدى.
ەندىگى ارادا ساۋلەدەگى مايدانگەردىڭ ابزال ەسىمدەرى جازىلعان ءايبات ەسكەرتكىش جاس قۇراقتاي جايقالىپ ءوسىپ كەلە جاتقان جاس ۇرپاقتىڭ كوكىرەگىنە ساۋلەسىن شاشىپ تۇراتىن بولادى.
ءبىرجان سال اۋدانى,
اقمولا وبلىسى.
