ايماقتار • 10 ءساۋىر، 2019

بۇركىتتەردىڭ سانىن الۋعا ارنالعان ەكسپەديتسيا جولعا شىقتى

720 رەت كورسەتىلدى

10 ساۋىردە ساعات 7:00-دە الماتى وبلىسىنداعى بۇركىت بالاپاندارىن شىعاراتىن ورىندا جابايى تابيعاتتا مەكەندەيتىن بۇركىتتەردى ەسەپكە الۋعا ارنالعان ارنايى ەكسپەديتسيا باستالدى.

ەكسپەديتسيا «سۇڭقار» تالىمباعىنىڭ قولداۋىمەن جەتى جىل بويى جۇزەگە اسىرىلىپ كەلە جاتقان «ەفەس قازاقستان» كومپانياسىنىڭ «ۇلەسىڭدى قوس. تابيعاتتى امان ساقتاپ قال» اتتى جوباسىنىڭ ارالىق قورىتىندىسىن شىعارۋعا ارنالعان.

ورنيتولوگ سەرگەي شمىگالەۆ، كومەكشى-جۇرگىزۋشى ۆلاديمير يساەنكو جانە ەكىنشى جۇرگىزۋشى يگور سۆاستيننەن قۇرالعان سۇڭقار تالىمباعى ماماندارىنىڭ كومانداسى ارنايى كەرەك-جاراقتارىمەن جانە GPS-ناۆيگاتسيامەن جابدىقتالىپ، مەجەلەنگەن باعدار بويىنشا ەكى جول تالعامايتىن كولىكپەن جولعا شىقتى.

سەرگەي شمىگالەۆتىڭ جەتەكشىلىك ەتۋىمەن ەكسپەديتسيا بۇركىتتەر مەكەندەيتىن جەرلەرگە، سونىڭ ىشىندە «ءوز ۇلەسىڭدى قوس. تابيعاتتى امان ساقتاپ قال» بۇركىتتەردى قورعاۋ باعدارلاماسى اياسىندا قۇستاردى شىعارۋ مەكەندەرىندە بولىپ قايتادى.

قازاقستان اۋماعىندا مەكەندەيتىن بۇركىتتەردىڭ سانىن ەسەپتەۋ سوڭعى مارتە 2012 جىلى وتكىزىلگەن بولاتىن. جەتى جىل بويى وسىنداي ماقساتقا باعدارلانعان جۇمىس جۇرگىزىلمەگەن بولاتىن.

2012 جىلداعى ەسەپكە الۋدىڭ ناتيجەسى جانە ورنيتولوگتاردىڭ بىرقاتار باعالاۋى بويىنشا بۇركىتتەردىڭ پوپۋلياتسياسى ازايعان، ۇلكەن جانە كىشى بوگىت ايماعىندا (الماتى وبلىسى) بار-جوعى 4-5 جۇپ قانا قالعان.

«ەفەس قازاقستان» كومپانياسىنىڭ قازاقستاندا 2012 جىلدان باستاپ جۇمىس جاساپ كەلە جاتقان «ۇلەسىڭدى قوس. تابيعاتتى امان ساقتاپ قال» اتتى جوباسى قازاقستاندىق بۇركىتتەر پوپۋلياتسياسىن تولىقتىرۋعا باعىتتالعان. وسى كەزەڭ ىشىندە «سۇڭقار» تالىمباعىندا 25 بۇركىت بالاپانى ءوسىرىلىپ، تابيعات اياسىنا جىبەرىلدى.

«بۇركىتتەر 5-6 جىلدان كەيىن كوبەيە باستايدى. قازىر 2013 جىلى ەركىندىككە جىبەرىلگەن قۇستاردى ەسەپتەۋ ءۇشىن قولايلى ۋاقىت. ءبىز 2013 جىلدان بەرى تابيعات اياسىنا جىبەرىلگەن بۇركىتتەردىڭ مەكەنىنە بارىپ قايتامىز. بۇل الماتى وبلىسى، جوڭعار الاتاۋ تاۋ سىلەمدەرى – ارقارلى جانە مالايسارى تاۋ قىرقاسى; ىلە الاتاۋ – ۇلكەن جانە كىشى بوگىت، تورعايعىر، سۇيعوتى، شارىننىڭ جوعارعى جاعى»، – دەيدى توپ جەتەكشىسى سەرگەي شمىگالەۆ.

ەكسپەديتسيا الماتى وبلىسى اۋماعىن قامتىماق. «سۇڭقار» ورتالىعىنىڭ ماماندارى قاتىسۋشىلاردىڭ قاۋىپسىزدىگىن قامتاماسىز ەتە وتىرىپ، جوسپار مەن جول باعدارىن دايىندادى. توپ قۇستاردى ەسەپكە الۋعا جانە فوتو-جانە بەينە تۇسىرىلىمدەردى جاساۋعا ارنالعان بۇكىل قاجەتتى تەحنيكامەن جابدىقتالعان.

2019 جىلدىڭ 10-12 ءساۋىر كۇندەرى ارقارلى جانە مالايسارى، 13-15 ءساۋىر كۇندەرى ۇلكەن جانە كىشى بوگىت، 16-17 ساۋىردە سۇيعوتى تاۋلارى، 18-20 ساۋىردە تورايعىر جانە شارىن جوعارعى جاعى تەكسەرىلەدى. ەكسپەديتسيا ۋاقىتى اۋا-رايى جاعدايلارىنا جانە جول باعىتىنىڭ قيىن بولۋىنا بايلانىستى ۇزارتىلۋى مۇمكىن.

كوماندا قايتقان سوڭ بىردەن «سۇڭقار» تالىمباعىندا باق-پەن كەزدەسۋ ءوتىپ، ەكسپەديتسيا قاتىسۋشىلارى تولىعىراق اقپاراتپەن بولىسەتىن بولادى.

الماتى

سوڭعى جاڭالىقتار

دوللار ارزاندادى

قارجى • كەشە

ۇقساس جاڭالىقتار