وسىعان وراي «استانا» كونتسەرت زالىندا استانا قالاسى مەملەكەتتىك اكادەميالىق فيلارمونياسىنىڭ ۇيىمداستىرۋىمەن اقىندى ەسكە الۋعا ارنالعان «مەن جالىنداپ وتەمىن» اتتى مۋزىكالىق ادەبي كەش ءوتتى.
«ەلوردادا 1998 جىلدان باستاپ حالىقارالىق شىعارماشىل جاستاردىڭ «شابىت» فەستيۆالى ءوتىپ كەلەدى. سوندا ءار جىل سايىن ەلىمىزدىڭ تۇكپىر-تۇكپىرىنەن كەلىپ, استانادا باس قوسقان بارشا بوزبالا اقىن مەن ءورىمتال قىزدار فاريزا اپامىزدىڭ الاقانىنىڭ جىلۋىن سەزىندى, مەيىرىم قۇشاعىنا بولەندى. اقىن اپامىز سول جاستاردى جانىنا جيناپ الىپ, ولەڭىن تىڭداپ, ەلوردانىڭ تورىندە ءبىر جۇما ەركەلەتىپ, ءوزى داستارقان جايىپ قوناق قىلاتىن. سونى قازىر قازاق پوەزياسىنداعى جولىن تاپقان اقىنداردىڭ بارلىعى ءالى كۇنگە دەيىن ىستىق ساعىنىشپەن ەسكە الادى. ال ول جىلۋدى سەزىنىپ ۇلگەرمەگەن جاس قالامگەرلەردىڭ كوڭىل تۇكپىرىندە ۇلكەن وكىنىش قالدى. فاريزا وڭعارسىنوۆانىڭ 80 جىلدىق مەرەيتويىنا وراي استانا قالاسىنان باستاۋ العان بۇگىنگى شىعارماشىلىق كەش اقىن اپامىزدىڭ ولمەيتىن عۇمىرى دەۋگە بولادى», دەدى جاستار اتىنان ءسوز الىپ, ادەبي كەشتىڭ شىمىلدىعىن اشىپ بەرگەن جازۋشىلار وداعىنىڭ استانا قالاسى فيليالىنىڭ توراعاسى, اقىن داۋلەتكەرەي كاپ ۇلى.
ولەڭىن ءومىر بويى ايالاپ وتكەن اقىن فاريزا وڭعارسىنوۆا ءوزىنىڭ وتتى جىرىمەن حالىقتىڭ ىستىق ىقىلاسىنا بولەنىپ, سەزىم جىلۋىمەن دە, مەيىرىم قۋاتىمەن دە وقىرمانىنىڭ جۇرەگىنەن ماڭگىلىك ورىن تابا بىلگەن قازاق پوەزياسىنداعى دارا قۇبىلىس. «فاريزا وڭعارسىنوۆا ازامات بوپ اشىنۋدى, پەندە بولىپ مۇڭدانۋدى, پەرزەنت بولىپ تەبىرەنىپ, پەرىشتە بولىپ قۋانۋدى قاز-قالپىندا جەتكىزە العان اسا سيرەك ليريك. ليريكتەردىڭ كوبىنە سونىڭ ءبىرى جەتسە, ءبىرى جەتپەيدى. ال بۇل اقىنعا ادامدىق كەسكىندەمەگە جاتاتىن بارلىق سەزىم گامماسىنىڭ ۇرىمتال تۇستارىن ۇتىمدى بەينەلەۋ سونشالىقتى وڭاي, سونشالىقتى جەڭىل. دۇنيە شەكسىز, ءومىر شەكتى. بۇل ءتۇپ قياناتتىڭ تۇبەگەيلى ەسەسىن كەلتە ءومىر ءسۇرىپ, كەسەكتى عۇمىر كەشەتىن تەك وسىنداي ەرەسەك تالانت, ەرەن ونەرمەن عانا قايتارا الماقشىمىز. ەندەشە, فاريزا ەرىكسىز باس يدىرەدى», دەپ تالانت تابيعاتىنا تامسانعان سۇڭعىلا سۋرەتكەر ءابىش كەكىلباەۆتىڭ بەرگەن بۇل باعاسى اقىننىڭ كۇللى شىعارماشىلىق قارىمىنا ولشەم بولاتىنداي.
ونىڭ ايقىن دالەلى پوەزيا پاتشايىمىنىڭ ولەڭدەرىن بۇگىندە كۇللى قازاق بالاسى ءسۇيىپ وقىپ, جاتقا ايتادى. فاريزا جىرىمەن اۋىزدانىپ, فاريزا ولەڭىمەن ەرجەتكەن جالىندى جاستارىمىزدىڭ قاراسىندا شەك جوق. سەبەبى اقىننىڭ ولەڭدەرىندە جۇرەكتىڭ سىرلى پەرنەسىن ءدوپ باساتىن ۇلتتىق رۋح, ءمولدىر ماحاببات, نازىك ليريكا, شەكسىز ساعىنىش بار. سول سىرشىلدىق تالاي سازگەردىڭ شابىتىنا قانات بايلاپ, نەبىر سۇلۋ اندەردى ومىرگە اكەلدى. شىعارماشىلىق كەشتە ورىندالعان «اينالايىن, ورالىم», «قيماستارىم», «ماحاببات وتى سونبەيدى» سىندى فاريزا وڭعارسىنوۆا ولەڭىنە جازىلعان اندەر مەن اقىن رۋحىنا ارنالعان كۇمبىرلى كۇيلەر سونىڭ ايعاعى. پوەزيا پاديشاسىنىڭ وتتى جىرى وقىلىپ, اسەم ءان مەن رۋحتى كۇيدەن شاشۋ شاشىلعان كونتسەرت اقىنىن ساعىنىپ كەلگەن ويلى وقىرمانىنا ەستەن كەتپەس اسەر سىيلاپ, تىڭداۋشىسىن رۋحاني قاناتتاندىرعانى ءسوزسىز.
نازەركە جۇماباي,
«ەگەمەن قازاقستان»
