ەكىنشى ورتا سالماقتاعى ايدوس ەربوسىن ۇلى بەلگيالىق يلياس اچەرگۋمەن ايقاستى. ءتورتىنشى راۋندتا قانداسىمىز نوكداۋن العانىمەن, ۇزىلىستەن كەيىن قارسىلاسى جەكپە-جەكتى جالعاستىرۋدان باس تارتتى. سونىڭ ناتيجەسىندە ايدوس جەڭىسكە جەتىپ, WBO Global نۇسقاسىنىڭ التىن بەلبەۋىن يەلەندى. بۇل – ەربوسىن ۇلىنىڭ كاسىپقوي رينگتەگى ونىنشى جەڭىسى!
ءبىرىنشى جارتىلاي ورتا سالماقتاعى نۇرسۇلتان جاناباەۆتىڭ دا بۇل ساپاردان قانجىعاسى مايلانىپ قايتتى. فيليپپين بوكسشىسى ارنەل تينامپايدى ۇپاي سانىمەن ۇتقان قازاق جىگىتى WBC Asia نۇسقاسى بويىنشا چەمپيوندىق ءتاجدى يەلەندى.
سونىمەن قاتار, قوس جەرلەسىمىز رەيتينگتىك باسەكەلەر وتكىزدى. جارتىلاي جەڭىل سالماقتاعى كونستانتين برۋسەنسكي ءوزىنىڭ تۇساۋكەسەر كەزدەسۋى بەل ورتاعا جەتپەي جاتىپ, داگير كاچاكاەۆتى ەسىنەن تاندىرسا, ءبىرىنشى اۋىر سالماقتاعى ءالي بالوەۆ نيگەريالىق افينني ابيودۋندى سەگىزىنشى راۋندتا سۇلاتىپ سالدى.
عالىم سۇلەيمەن,
«ەگەمەن قازاقستان»
