مينيستر وسى جىلدىڭ ەلىمىز ءۇشىن جەمىستى جىل بولعانىن اتاپ ءوتتى. «تاۋەلسىز قازاقستاننىڭ تاريحىندا 2018 جىل ۇلكەن بەتبۇرىستارمەن ەستە قالادى. ەڭ الدىمەن, بۇل – قازاقستاننىڭ بۇۇ قاۋىپسىزدىك كەڭەسىنە توراعالىق ەتۋى. ەلىمىزدىڭ توراعالىعى كەزىندە ءتۇرلى فورماتتا 30-عا جۋىق وتىرىس وتكىزىلىپ, سوعان سايكەس ماڭىزدى قارارلار قابىلداندى», دەدى د.اباەۆ.
ءمينيستردىڭ مالىمدەۋىنشە, ەكىنشى ەلەۋلى وقيعا – رەسپۋبليكالىق دەڭگەيدە جاڭا ميلليوندى قالانىڭ جانە تۇركىستان وبلىسىنىڭ مارتەبە الۋى. مەملەكەت باسشىسىنىڭ تۇركىستاندى تۇلەتۋ جونىندەگى بۇل شەشىمىن ەل جۇرتشىلىعى عانا ەمەس, تۇتاس تۇركى جۇرتى اسا ماڭىزدى قادام رەتىندە قابىلدادى. ال ءۇشىنشى مەگاپوليستىڭ قاتارعا قوسىلۋى دەموگرافيالىق ءوسىمنىڭ ناقتى كورسەتكىشى, بۇل قادام ەكونوميكالىق جانە ايماققا ينۆەستيتسيا تارتۋ تۇرعىسىنان تيىمدىلىگىن قازىردىڭ وزىندە كورسەتىپ وتىر.
تاعى ءبىر ماڭىزدى وقيعا – كاسپي ماڭى 5 مەملەكەتتەرى اراسىنداعى 20 جىلدىق كەلىسسوزدەردىڭ ناتيجەسىن كورسەتكەن «كاسپي تەڭىزىنىڭ قۇقىقتىق مارتەبەسى» تۋرالى كونۆەنتسياعا قول قويىلۋى. اتالعان ماڭىزدى قۇجات اقتاۋدا وتكەن بەسىنشى كاسپي سامميتىندە قابىلداندى. سول ساتتەگى سوزىندە: «كونۆەنتسيا «كاسپي تەڭىزىنىڭ كونستيتۋتسياسى» بولىپ سانالادى. مۇندا تەڭىز جاعاسىنداعى مەملەكەتتەردىڭ قۇقىقتارى مەن مىندەتتەرىنە, سونداي-اق ءوڭىردىڭ قاۋىپسىزدىگىنە, تۇراقتىلىعى مەن وركەندەۋىنە كەپىل بولۋعا قاتىستى بارلىق كەشەندى ماسەلەلەردى رەتتەۋ قاراستىرىلعان», دەگەن ەدى ەلباسى.
د.اباەۆ وسى جىلعى باستى الەۋمەتتىك قولداۋدىڭ وزەگى ەلباسىنىڭ ۇندەۋى بولعانىن ايتتى. پرەزيدەنتتىڭ بەس الەۋمەتتىك باستاماسىندا حالىقتىڭ تۇرمىسىن ودان ءارى جاقسارتۋدىڭ ناقتى باعىتتارى بەلگىلەندى. اتاپ ايتقاندا, وسى باستاما بويىنشا كوممۋنالدىق قىزمەتتەر ءتاريفى تومەندەيدى. 7 جىل بويى اسپانداپ تۇرعان ەلەكتر ەنەرگياسىنىڭ تاريفتەرىنە دە توسقاۋىل قويىلماق. بۇل – ۇلكەن تاۋەكەل. سونىمەن قاتار ەڭ تومەنگى جالاقى كورسەتكىشى ءبىر جارىم ەسەگە ءوستى. جانە كەلەسى جىلى زەينەتاقى مەن بىرقاتار الەۋمەتتىك جاردەماقىلار كوتەرىلەدى.
1 قاڭتاردان حالىقارالىق «استانا» قارجى ورتالىعىنىڭ رەسمي جۇمىسىن باستاۋى وسى جىلدىڭ ايشىقتى وقيعالارى قاتارىنان ويىپ ورىن الادى. قازاقستان ەكونوميكاسىنا سەرپىلىس اكەلۋدى كوزدەيتىن ورتالىق, رەسمي مالىمەت بويىنشا, از ۋاقىتتىڭ ىشىندە ءوزىن حالىقارالىق ارەنادا تانىتىپ ۇلگەرگەن. حالىقارالىق رەيتينگ اگەنتتىكتەرىنىڭ مالىمەتتەرىنە سايكەس, ورتالىق الەمدىك 100 قارجى ورتالىعىنىڭ ىشىندە 61-ورىنعا, شىعىس ەۋروپا مەن ورتالىق ازيا ءوڭىرى بويىنشا 2-ورىنعا يە بولعان.
حابار اراسىندا لاتىن ءالىپبيىنىڭ جاڭا نۇسقاسىن قابىلداۋ مەن « ۇلى دالانىڭ جەتى قىرى» ماقالاسىنىڭ جاريالانۋى دا جىلدىڭ ايشىقتى وقيعاسى رەتىندە اتالىپ ءوتتى.
حاباردى قورىتىندىلاي كەلە, مينيستر اقپارات جانە كوممۋنيكاتسيالار مينيسترلىگى ءۇشىن دە بيىل جەمىستى جىل بولعانىن جەتكىزدى. «تسيفرلى قازاقستان مەملەكەتتىك باعدارلاماسى اياسىندا اۋقىمدى جۇمىس باستالدى. Astana HUB حالىقارالىق IT-ستارتاپتار تەحنوپاركى قىسقا ۋاقىتتا اشىلدى. اۋىلدىق جەرلەردە 20 مىڭ كيلومەترلىك ءىرى وپتوتالشىقتى بايلانىس قۇرىلىسى باستالدى. بۇل ميلليون تۇرعىندى ساپالى ينتەرنەتپەن قامتاماسىز ەتۋگە مۇمكىندىك بەرەدى. ايماقتاردى انالوگتى حابار تاراتۋدان تولىق اجىراتۋ ارقىلى تسيفرلى حابار تاراتۋ جۇيەسىنە بىرتىندەپ كوشىرۋ باستالدى. مەملەكەتتىك قىزمەتتەردىڭ 60 پايىزدان استامى ەلەكتروندى فورماتقا كوشتى. وڭىرلەردە تسيفرلى جانە كوشى-قون حقكو-لار اشىلادى», دەيدى ول.
سونىمەن قاتار ءسوز اراسىندا بيومەتريالىق دەرەكتەردى پايدالانا وتىرىپ قىزمەتتەردى الۋعا ارنالعان جوبا ىسكە قوسىلعانىن, مەديا سالاسىندا اstana Media Week سەكىلدى اۋقىمدى شارالار مەن «تۇمار», «ۇركەر» سىندى باق قىزمەتكەرلەرىنە ارنالعان ۇلتتىق سىيلىقتار تابىستايتىن بايقاۋلار ۇيىمداستىرىلعانىن, قازاق تىلىندە «تاماشا» ويىن-ساۋىق تەلەارناسى اشىلعانىن جانە جوعارى رەيتينگ كورسەتىپ ۇلگەرگەن ۇزدىك 10 قازاقستاندىق تەلەحيكايا تۇسىرىلگەنىن تىلگە تيەك ەتتى.
ءسوز اراسىندا د.اباەۆ قوعامداعى ەلەۋلى ءىس رەتىندە اتاپ ايتۋعا تۇرارلىق وقيعانىڭ ءبىرى الماتىلىق ازاماتتىڭ ادامگەرشىلىك ارەكەتى ەكەنىن اتاپ ءوتتى. راۆيليا ناسيفۋلينا 10 جىل بويى جۇيەلىك اكىمشى رەتىندە جۇمىس ىستەپ, كومپيۋتەرلەردى جوندەۋمەن اينالىسقان. ال قازىر بۇزىلعان كومپيۋتەرلەر مەن نوۋتبۋكتاردى جيناپ, قايتا جوندەپ, تۇرمىسى تومەن وتباسىنداعى بالالارعا تاراتادى ەكەن. 10 ايدىڭ ىشىندە مۇگەدەك, قاتەرلى ىسىكپەن اۋىراتىن, جەتىم جانە تۇرمىسى تومەن وتباسىنداعى بالالارعا 70 كومپيۋتەر مەن نوۋتبۋك بەرگەن. ءسوز سوڭىندا سپيكەر: «وسىنداي ازاماتتار ادامدى تاڭداندىرادى, شابىتتاندىرادى, ىزگىلىككە سەنۋگە شاقىرادى», دەيدى.
ايدانا شوتبايقىزى,
«ەگەمەن قازاقستان»
