ءبىز ايتىپ وتىرعان تۇركىستان وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ «№8 ارناۋلى الەۋمەتتىك قىزمەتتەر كورسەتۋ ورتالىعىندا» مۇگەدەك جاندارعا جان-جاقتى قامقورلىق جاسالىپ, جاقسى كوڭىل-كۇي سىيلاۋ ماقساتىنداعى ءتۇرلى ءىس-شارا ءجيى وتكىزىلىپ تۇرادى. ال نەگىزى شىمكەنت قالاسىنداعى اتالعان ورتالىقتا جىل كولەمىندە 960 مۇمكىندىگى شەكتەۋلى جان وڭالتۋدان وتەدى ەكەن. ءار اي سايىن ستاتسيونارلىق-ساناتوريالىق رەجىمدە اۋدانداردان – 45, شىمكەنت قالاسىنان 30 مۇگەدەك كۇندىزگى بولىمدە قابىلدانادى. وسى ارادا ايتا كەتەلىك, ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە, سوڭعى بەس جىلدا ەلىمىزدە مۇگەدەكتىگى بار ادامداردىڭ سانى 7,5%-عا ۇلعايعان. سول سەبەپتەن دە بولار, ورتالىق قىزمەتىن الۋعا نيەتتىلەر قاتارى كوبەيە تۇسكەن جانە ولار بۇل مۇمكىندىكتى ۇزاق كۇتۋگە ءماجبۇر. ورتالىقتىڭ ولارعا بەرەرى مول, مىسالى دارىگەرلەردىڭ نۇسقاۋلارى بويىنشا ەم الادى, دەنە شىنىقتىرۋ جاتتىعۋلارىن جاسايدى, سونداي-اق ءتۇرلى ءدارى-دارمەكتەردى, دارۋمەندەردى قابىلدايدى. سپورتتىق ەستافەتالىق توپتىق ويىندارعا دەنساۋلىقتارىنا قاراي قاتىسادى. باسقا دا مادەني ءىس-شارالارعا قاتىسۋ ءۇشىن ارنايى كولىك قىزمەتى ۇسىنىلادى. وزدىگىنەن ەڭبەك ەتۋگە كومەكتەسەدى. ەڭبەكپەن ەمدەۋ ارقىلى ومىرگە دەگەن كوزقاراسىن جاقسارتىپ, قىزىعۋشىلىقتارىن وياتادى. مونشاقتان, بيسەرمەن ءارتۇرلى بۇيىم جاساۋدى ۇيرەنەدى. تىگىن ماشيناسىمەن جۇمىس ىستەپ, قۇراق كورپەشەلەر, جاستىقتار, كويلەكتەر تىگەدى جانە جوعالتقان تۇرمىستىق داعدىلارىن قايتا قالپىنا كەلتىرەدى. قىزمەت الۋشىلاردىڭ ءوز قولدارىنان جاساعان بۇيىمدارىنان كورمە ۇيىمداستىرىلادى. ءوزىن-ءوزى قامتاماسىز ەتۋ جانە ماتەريالدىق جاعدايلارىن جاقسارتۋعا قاتىستى باعىت-باعدار, كەڭەس بەرىلەدى.
– ەلباسى ن.نازارباەۆ جولداۋىندا «مۇمكىندىگى شەكتەۋلى تۇلعالارعا ارنالعان «كەدەرگىسىز ورتا» قالىپتاستىرۋعا زور ءمان بەرىلۋى ءتيىس» ەكەنىن اتاپ كورسەتتى. جالپى, مەملەكەت باسشىسى مۇگەدەكتەر ماسەلەسىنە ەرەكشە ءمان بەرىپ كەلەدى. سونىڭ ناتيجەسىندە مەملەكەت تاراپىنان كورسەتىلىپ جاتقان قولداۋ- كومەكتەر كوپ. ءوزىن كەم سەزىنبەۋى ءۇشىن ورتالىق قىزمەتىن پايدالانۋشى جاندارعا وتباسىلىق كاسىپكەرلىكتى اشۋ جانە دامىتۋ ءۇشىن «اتامەكەن» قورىنىڭ وبلىس بويىنشا ايماقتىق فيليالى بيزنەس ساباقتارىن جۇرگىزەدى. وندا كاسىپكەرلىك جولدارى جان-جاقتى تۇسىندىرىلەدى. قىزمەت الۋشىلارعا جەڭىلدىكتەر, جاردەماقىلار, وتەماقىلار مەن باسقا دا تولەمدەردى الۋعا كەڭەس بەرىلەدى. ورتالىق ءى, ءىى توپتاعى مۇمكىندىگى شەكتەۋلى ازاماتتارعا وڭالتۋ قىزمەتتەرىن كورسەتەدى. ول قىزمەتتەردى العان سوڭ دەنساۋلىقتارىندا وڭ وزگەرىس بولىپ, جەكە كاسىپ اشقاندارى دا بارشىلىق. ومىرگە دەگەن قۇلشىنىسى ارتىپ, العىسىن ءبىلدىرىپ جاتقاندارى دا از ەمەس. كەزىندە مەكەمەدە وڭالتۋدان وتكەن ەرمەك قالىمبەتوۆ ءتۇرلى سپورتتىق جارىستاردا جوعارى دەڭگەيدە ونەر كورسەتىپ, قولاربا جارىسىنان ازيا چەمپيونى اتاندى. كەنتاۋ قالاسىنان كەلىپ, وڭالتۋدان وتكەن ايدوس قاليەۆ بۇگىندە كوپتەگەن مادەني ءىس-شارادا كونتسەرتتىك باعدارلامالارمەن ونەر كورسەتۋدە. ال مۇمكىندىگى شەكتەۋلى بورىبەك جىلقىباەۆ قولدىڭ ۇساق موتوريكاسىن جاقسارتۋ ماقساتىندا ءىرى مونشاقتاردان ءارتۇرلى بۇيىم جاساپ, مەكەمەمىزدىڭ اتىنان قولونەر شەبەرلەرى كورمەلەرىنە قاتىسىپ ءجۇر», دەيدى «№8 ارناۋلى الەۋمەتتىك قىزمەتتەر كورسەتۋ ورتالىعى» كوممۋنالدىق مەملەكەتتىك مەكەمەسىنىڭ ديرەكتورى گۋليا جازىحباەۆا. سونداي-اق مۇمكىندىگى شەكتەۋلى ازاماتتاردىڭ الەۋمەتتىك مارتەبەسىن كوتەرۋ, تاريحي جادىگەرگە سۇيىسپەنشىلىگىن ارتتىرۋ, ولكەسىن تانىتۋ, پاتريوتتىق سەزىمىن ودان ءارى قالىپتاستىرۋ ماقساتىندا اي سايىن وڭىردەگى مۇراجايلارمەن تانىسۋىنا مۇمكىندىك جاسالادى ەكەن. «بۇل مەكەمەگە 2012 جىلدان بەرى كەلىپ ەم الۋدامىن. ەمنىڭ بارلىق ءتۇرى قاراستىرىلعان. ورتالىققا كەلگەن كۇننەن باستاپ جاقسى كوڭىل-كۇيدە جۇرەمىز. دەنساۋلىقتى نىعايتۋعا ارنالعان ەمدىك پروتسەدۋرالاردى كورسەتەتىن مامانداردىڭ كاسىبي بىلىكتىلىگى جوعارى دارەجەدە, وڭالتۋ ورتالىعىنىڭ قىزمەتكەرلەرىنە ايتار العىسىم شەكسىز», دەيدى ءى توپ مۇگەدەگى ەراحان سەيتبەكوۆ.
جوعارىدا ايتىپ وتكەنىمىزدەي, ورتالىق قىزمەتىنە مۇقتاج جاندار كوپ. الايدا ونى قالاعان مەزگىلىندە قابىلداۋ مۇمكىن بولماي وتىر. ونىڭ ءبىر سەبەبى – ورتالىق ورنالاسقان عيمارات تارلىق ەتۋدە. بۇل ءوز كەزەگىندە مۇمكىندىگى شەكتەۋلى جانداردىڭ ەمىن-ەركىن قوزعالىسىنا دا كەرى اسەرىن تيگىزۋدە. ياعني تالاپقا ساي تيپتىك عيمارات قاجەت. بۇل ورايدا ەڭبەك جانە حالىقتى الەۋمەتتىك قورعاۋ ءمينيسترى ءمادينا ابىلقاسىموۆانىڭ «استانا, الماتى, شىمكەنت قالالارىنىڭ اكىمدەرى وڭالتۋ كومەگىنىڭ قولجەتىمدىگىن جاقسارتۋ ءۇشىن قوسىمشا وڭالتۋ ورتالىقتارىن اشۋ جونىندەگى قاجەتتى شارالار قابىلداۋى قاجەت» دەگەن مالىمدەمەسى كوڭىلگە سەنىم ۇيالاتادى. مينيسترلىك مالىمەتىنە قاراعاندا, ەلىمىزدە 192 قالپىنا كەلتىرۋ ەمى جانە مەديتسينالىق وڭالتۋ ۇيىمدارى جۇمىس ىستەيدى. ولاردىڭ 129-ى مەملەكەتتىك جانە 63-ءى جەكەمەنشىك ۇيىمدار. وتكەن جىلدىڭ قورىتىندىسى بويىنشا بەكىتىلگەن نورماتيۆ 25-كە تەڭ بولعان كەزدە حالىقتىڭ وڭالتۋ توسەكتەرمەن قامتاماسىز ەتىلۋى 10 مىڭ ادامعا شاققاندا بارلىعى 1,4 توسەكتى قۇراعان. ياعني وڭالتۋ جانە قالپىنا كەلتىرۋ ەمدەرىمەن قامتاماسىز ەتۋدىڭ جەتكىلىكسىز ەكەنى بايقالادى. ءمينيستردىڭ مالىمدەۋىنشە, 18,7 ملرد تەڭگە سوماسىندا 5 جەرگىلىكتى مەملەكەتتىك – جەكەمەنشىك ارىپتەستىك جوبالارى جوسپارلانىپ وتىر.
ءيا, ۋاقىت وتە تالاپقا ساي عيمارات سالىنىپ, قوسىمشا وڭالتۋ ورتالىعى دا اشىلار. ەڭ باستىسى, بۇگىندە مۇمكىندىگى شەكتەۋلى جاندار وڭالتۋ ورتالىعىندا ەم قابىلداي ءجۇرىپ, جانىن ءجىتى تۇسىنەتىن, ءوزى سەكىلدى تاعدىرلاس, مۇڭداس جانداردى تاۋىپ, جاقىن ارالاسۋ, دوستاسۋ ارقىلى دا قوعامنىڭ بەلسەندى مۇشەسى ەكەنىن سەزىنۋدە.
عالىمجان ەلشىباي,
«ەگەمەن قازاقستان»
تۇركىستان وبلىسى
