ەلىمىزگە قاجەتتى 700-گە كاسىپتىك مامانداردى دايارلايتىن وڭىرارالىق ورتالىقتىڭ قۇرىلىسىن جۇرگىزۋگە 2009 جىلى ءبىلىم جانە عىلىم مينيسترلىگى تاپسىرىس بەرگەن-ءدى. قۇرىلىسقا رەسپۋبليكالىق بيۋدجەتتەن 4,5 ملرد تەڭگە بولىنگەن.
مينيسترلىكتىڭ جوسپار بويىنشا كەشەننىڭ قۇرىلىسى 17 ايدا, 2010 جىلدىڭ سوڭىندا اياقتالۋعا ءتيىس-ءتى. كەزىندە ورتالىقتىڭ اياقتالماعان قۇرىلىسى جايلى گازەتىمىزدە جازدىق.
جوبا بويىنشا ورتالىق 14 بولىكتەن, ياعني, 14 جەكە عيماراتتان تۇرادى. ارقايسىسى 240 ورىندىق ەكى جاتاقحانا, 100 ورىندى قوناق ءۇي, سپورت عيماراتى, اكىمشىلىك كورپۋسى, 3 وقۋ عيماراتى, 2 شەبەرحانادان تۇرادى.
سول كەزدەگى ءبىلىم جانە عىلىم مينيسترلەرى دە, اكىمدەر دە اۋىسىپ ۇلگەردى. بىراق, ورتالىقتىڭ تومەنگى قاباتتارى ءىشى سۋعا تولىپ, سول قالپى ىسكە قوسىلمادى.
ورتالىقتىڭ كەشەندەرى قاتەلىكپەن تۇرعىزىلعانى, درەناجدىق جۇيەلەرى جاسالماعانى, كەشەننىڭ سىز باتپاقتى جەردە سالىنعانى كەيىن بارىپ قانا انىقتالادى.
سودان 2012 جىلى نىساننىڭ قۇرىلىسى توقتاتىلدى. 2016 جىلى قاراۋسىز قالعان ورتالىقتىڭ قۇرىلىس ماتەريالدارى ۇرلانا باستايدى.
ءسويتىپ, بۇكىل كەشەندى كۇزەتۋ وبلىس ورتالىعىنداعى س. تورايعىروۆ اتىنداعى مەملەكەتتىك ۋنيۆەرسيتەتكە تاپسىرىلدى.
بۇدان كەيىن ءبىلىم جانە عىلىم مينيسترىلىگى ەلىمىزدە ەنەرگەتيكا سالاسى ءۇشىن مامانداردى دايىندايتىن وقۋ ورىندارى جەتكىلىكتى, سوندىقتان, كەشەن ەندى جەرگىلىكتى اكىمدىكتىڭ قاراۋىنا الىنسىن دەپ تە شەشىم شىعارادى.
بىلتىر كەشەندە جوندەۋ جۇمىستارى باستالىپ, جوندەۋ جۇمىستارىن جۇرگىزەتىن «پورتال-پۆ» جشس قۇرىلىستى سۋ باسۋ قاۋپى باسىلعانىن جەتكىزدى.
وكىنىشكە وراي, كوكتەمدە ورتالىقتىڭ جەرتولەسى قايتا سۋعا تولا باستايدى.
بۇكىل وڭىرگە اتى بەلگىلى قىرۋار قارجى بولىنگەن قايران قۇرىلىستىڭ «قۇردىمعا كەتىپ بارا جاتقان» جاعدايى ءالى جالعاسۋدا.
ال, جۋىردا ء«Eرتىس» تەلەارناسىندا وتكەن تىكەلەي ەفيردە ەكىباستۇز قالاسىنىڭ اكىمى نۇرجان اشىمبەتوۆ قۇرىلىسى ۇزاققا سوزىلعان ورتالىقتى ءبىلىم جانە عىلىم مينيسترلىگى جەرگىلىكتى بيۋدجەتكە تاپسىرعانىن ءمالىم ەتتى.
- نىسان وبلىستىڭ كوممۋنالدىق مەنشىگىندە. وتكەن جىلى جەراستى سۋلارىن جويۋ بويىنشا جۇمىس جۇرگىزىلدى. قازىر دە جۇمىس جالعاسۋدا. مەردىگەرمەن ەكى جىلدىق كەلىسىمشارت جاسالعان. ورتالىق قۇرىلىسى 2019 جىلى اياقتالماق, -دەدى.
فاريدا بىقاي,
«ەگەمەن قازاقستان»
پاۆلودار وبلىسى
