سۋرەتتەردى تۇسىرگەن ەرلان ومار
جيىندى اقپارات جانە كوممۋنيكاتسيالار ءمينيسترى داۋرەن اباەۆ اشتى.
«ەلباسى نۇرسۇلتان نازارباەۆ وتاندىق مەديا سالاسىن دامىتۋعا ءاردايىم ايرىقشا كوڭىل ءبولىپ وتىرادى. وسىمەن ەكىنشى رەت ءوتىپ وتىرعان Astana Media Week ەلىمىزدە عانا ەمەس, ايماقتا دا مەديا نارىقتى قالىپتاستىرۋعا جانە ودان ارى دامىتۋعا سەرپىن بەرەدى دەپ سەنەمىن. ويتكەنى ەلوردامىزدىڭ تورىندە قازاقستاندىق بۇقارالىق اقپارات قۇرالدارى وكىلدەرىنەن بولەك, شەتەلدىك ارىپتەستەر دە ءوز ويلارىن ورتاعا سالادى. بۇل شارانىڭ نەگىزگى ماقساتى - وتاندىق مەديا نارىقتى جان-جاقتى دامىتۋ عانا ەمەس, مادەني جانە اقپاراتتىق بايلانىستاردى دا تەرەڭدەتۋ. بايلانىسى مىقتى مەملەكەتتىڭ قورعانىسى دا قۋاتتى», دەدى د.اباەۆ اپتالىقتىڭ سالتاناتتى اشىلۋ راسىمىندە.
مينيستر قۇتتىقتاۋ سوزىنەن كەيىن «كونتەنت-ماركەت» دەپ اتالاتىن كورمە حولىن ارالادى. مۇندا قازاقستاندىق جانە شەتەلدىك تەلەارنالار مەن پروداكشن كومپانيالاردىڭ ونىمدەرى تانىستىرىلدى.
اتالعان شاراعا وتاندىق جانە شەتەلدىك مەديايندۋستريانىڭ 60 توپ-مەنەدجەرى مەن 50-دەن اسا پروداكشن كومپانيالار قاتىسىپ جاتىر. جيىن بارىسىندا مەديا سالاسىندا كەزدەسەتىن پروبلەمالار تالقىلانىپ, ءتۇرلى ۇسىنىس-پىكىرلەر ايتىلادى.
«Astana Media Week» مەديا-اپتالىعى 3 كۇنگە سوزىلادى. ءار كۇنى مەديا سالاسىنداعى سەرىكتەستىك قاتىناستار مەن حالىقارالىق ىنتىماقتاستىقتىڭ دامۋىنا ەلەۋلى ۇلەس قوساتىن ءتۇرلى باعىتتاعى شارالار جوسپارلانعان. بۇگىنگى شاراعا رەسپۋبليكالىق جانە وڭىرلىك تەلەارنالار, ەلىمىزدىڭ بارلىق وڭىرلەرىندەگى پروداكشن-كومپانيالار, جەتەكشى ۆەندينگتىك كومپانيالار قاتىستى. جاڭا تەلەباعدارلامالاردىڭ, رەاليتي-شوۋلاردىڭ, مۋلتفيلمدەردىڭ, كوركەم فيلمدەر مەن دەرەكتى فيلمدەردىڭ تۇساۋكەسەرى رەتىندە پيتچينگ جۇرگىزىلەدى. قازاقستان مەدياسىنىڭ ءبىرىنشى باسشىلارىمەن تەت-ا-تەت كەزدەسۋ بارىسىندا پروداكشن-ستۋديالار وزدەرىنىڭ ايرىقشا بەينە كونتەنتتەرىن ۇسىنادى. مۇنداي فورماتتاعى ءتيىمدى قاتىناس مەديا نارىقتىڭ زاماناۋي دامۋىنىڭ ەڭ وزەكتى ماسەلەلەرىنىڭ ءتۇيىنىن تابادى دەپ جوسپارلانۋدا.
مەديااپتانىڭ ەكىنشى كۇنىندە جاڭا كونۆەرگەنتتى فورمالارعا ءوتۋ كەزىندەگى قيىندىقتار مەن مۇمكىندىكتەردى تالقىلاۋ ماقساتىندا قازاقستان بۇقارالىق اقپارات قۇرالدارىنىڭ وڭىرلىك فورۋمىن وتكىزەدى. سونداي-اق وتاندىق ماسس-مەديا قىزمەتىنە قاتىستى زاڭناما سالاسىنداعى رەفورمالار تالقىلانادى.
ال ءۇشىنشى كۇنى «Select Communication Group» كومپانياسىنىڭ ۇيىمداستىرۋىمەن Astana Digital فورۋمى وتەدى. بۇل كۇنى ساندىق ماركەتينگ قۇرالدارى, كريپتوۆاليۋتا نارىعى سەكىلدى تاقىرىپتاردا حالىقارالىق دەڭگەيدەگى سپيكەرلەر ءسوز سويلەيدى.
مارجان تىلەۋبەك,
«ەگەمەن قازاقستان»
