كىندىك كەسىپ, توپىراعىنا اۋناپ وسكەن تۋعان جەرىنە قامقورلىق جاساۋدى قالىپتى جانە شىنايى پاتريوتتىق بورىشقا اينالدىرعان, كادۋىلگى مىندەتتى ءىس سانايتىن ازاماتتار قىزىلجار وڭىرىندە از ەمەس. اققايىڭ اۋدانىندا ورنالاسقان «دايىندىق» جانە «پولتاۆكا» اگروقۇرىلىمدارىنىڭ باسشىلارى ءبىرجان شايمەردەنوۆ پەن ەلتاي زىكىرين اتامەكەنىن تۇلەتىپ, مادەنيەتى مەن سالت-ءداستۇرىنىڭ جاڭعىرۋىنا,تۇرعىنداردىڭ ءومىر ساپاسىن جاقسارتۋعا بەلسەنە اتسالىسىپ كەلەدى. بۇل ەكى ازاماتتىڭ «رۋحاني جاڭعىرۋ» باعدارلاماسى اياسىندا دا اتقارعان ىستەرى قىرۋار. سولاردىڭ ءبىرى 28 ميلليون تەڭگە قاراجات ءبولىپ, جانسۇگىر باتىرعا ارناپ بيىكتىگى 15 مەترگە جەتەعابىل ءزاۋلىم كەسەنە تۇرعىزۋى دەر ەدىك. سانالى عۇمىرىن بالا تاربيەسىنە ارناعان ارداگەر ۇستاز مولداحمەت سۇراعانوۆ كوز مايىن تاۋىسىپ قوجابەرگەن, بوگەنباي باتىرلاردىڭ جاساعى قۇرامىندا قالماقتارعا قارسى جورىقتارعا قاتىسىپ, مىڭباسى بولعان, ەرجۇرەكتىلىمەن, شەشەندىگىمەن كوزگە تۇسكەن جانسۇگىر باۋبەك ۇلى جايلى كوپتەگەن دەرەكتەر جيناعان ەكەن. كوزى تىرىسىندە زيراتىن تۇزەپ, كورنەكتى بەلگى ورناتۋ ويىندا بولعانىمەن ول ارمانىنا جەتە الماي كەتكەن. اۋىل اقساقالىنىڭ اماناتىن جۇزەگە اسىرۋعا ءبىرجان جانە ەلتاي بەلسەنە كىرىسىپ, ارالاعاش اۋىلىنا تاقاۋ تۇستا استانا-پەتروپاۆل كۇرە جولىنىڭ بويىنا الىستان مەنمۇندالاپ كورىنەتىن اپپاق كەسەنەنى باس-اياعى ءتورت ايدىڭ ىشىندە تۇرعىزىپ بەردى. ءمارمار تاستار دا, قۇرىش قولدى شەبەرلەر دە اقتاۋدان ارنايى الدىرتىلدى.
نىساننىڭ اشىلۋ سالتاناتىندا اۋدان اكىمى داۋرەن بايتولەشوۆ, وبلىستىڭ وكىل يمامى كەنجەتاي قاجى بايكەمەل ۇلى, اۋداننىڭ قۇرمەتتى ازاماتى ءابۋ ءابىلماجىنوۆ, كەلەلى شارانى ۇيىمداستىرۋشىلاردىڭ ءبىرى سانسىزباي جۇمابەكوۆ, تاعى باسقالارى سويلەگەن سوزدەرىنە ء«بىر ادامنىڭ باتىلدىعى مىڭ ادامعا جول سالعان, ءبىر ادامنىڭ باتىرلىعى تۇتاس حالىقتىڭ اتىن شىعارعان» دەگەن تاريحي ماعىناسى تەرەڭ پايىمدى العا تارتا وتىرىپ جاۋگەرشىلىك زاماندا ەل قورعانى بولا بىلگەن, الىس-جاقىن اعايىننىڭ تاتۋلىعىن ويلاعان تۇلعانىڭ جۇرتشىلىق بىلە بەرمەيتىن ەل باسقارۋ, بيلىك ايتقان قاسيەتتەرى جايلى تەبىرەنە اڭگىمەلەدى. قىزىل يمپەريانىڭ سولاقاي ساياساتى كەزىنىڭ وزىندە سەكسەن, ەسكەندىر سەكىلدى اقساقالدار ۇلكەن وبانىڭ باسىنا بەلگى ورناتقان. پارلامەنت ءماجىلىسىنىڭ دەپۋتاتى اباي تاسبولاتوۆ قۇراستىرعان «ەسىمدەرى ەل ەسىندە» جيناقتا دا جانسۇگىر باتىردىڭ ەسىمى ەرەكشە اتالادى.
بابامىزدىڭ رۋحىنا قۇران باعىشتالىپ, اس بەرىلدى. بايگە, پالۋاندار بەلدەسۋى ۇيىمداستىرىلدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
اققايىڭ اۋدانى
