ءۇندىستان نارىعىنىڭ 90 پايىزعا جۋىعىن قۇس ەتىمەن قامتاماسىز ەتىپ وتىرعان الپاۋىت كومپانيا تۇركىستان وبلىسىنا ينۆەستيتسيا سالۋعا نيەتتى. وبلىس اكىمى جانسەيىت تۇيمەباەۆ كومپانيا وكىلدەرىمەن كەزدەسۋ بارىسىندا وڭىردە بىرنەشە قۇس فابريكاسى بارىن, قۇس شارۋاشىلىعىن دامىتىپ, كلاستەر قۇرۋعا اكىمدىك ءاردايىم قولداۋ كورسەتۋگە دايىن ەكەنىن اتاپ ءوتتى. ينۆەستورلار كەلەتىن بولسا, جەر جانە ينفراقۇرىلىم ماسەلەسىنە دە كومەك كورسەتىلەتىن بولادى. ال, «Venkateshwara Hatcheries Private Limited» (VH group) كومپانياسىنىڭ وپەراتسيالار جونىندەگى باس ديرەكتورى مۋرتۋزا الي يسمايل ماگدۋم كومپانيا قۇس وسىرۋمەن, جۇمىرتقا وندىرۋمەن قاتار جۇمىرتقا ۇنتاعىن دا كادەگە اسىراتىنىن, ارنايى زەرتتەۋ ورتالىقتارىندا قۇس شارۋاشىلىعىنا قاجەتتى ۆاكتسينا شىعارۋمەن دە اينالىساتىنىن ايتىپ ءوتتى.
1971 جىلى قۇرىلعان كومپانيانىڭ ءۇندىستاندا عانا ەمەس, اقش جانە ەۋروپا ەلدەرىندە بىرلەسكەن كاسىپورىندارى مەن جوبالارى بار. كومپانيا باسشىسى كەلىسسوزدەر ءساتتى اياقتالسا, تۇركىستان وبلىسىندا جۇمىس باستاۋعا دايىن ەكەنىن مالىمدەدى. وبلىس اكىمى جانسەيىت تۇيمەباەۆ وسى سالاعا جاۋاپتى ورىنباسارلارىنا ۇندىستاندىق ينۆەستورمەن ىسكەرلىك بايلانىستى ناقتىلاۋدى تاپسىردى.
عالىمجان ەلشىباي,
«ەگەمەن قازاقستان»
تۇركىستان وبلىسى
