كينو الەمى... سەزىنىپ, تۇيسىنە بىلگەن ادامعا ول جان راحاتى, تاربيە قۇرالى, وتكەن مەن بۇگىنگىنى, بولاشاقتى جالعاستىراتىن التىن كوپىر ەكەندىگى بەلگىلى.
ۇستىمىزدەگى جىلعى تامىز ايىنىڭ باس كەزىندە «ەل ارنا» تەلەارناسىنان ء«بىز وسىندا تۇرامىز» اتتى كينوتۋىندى كورسەتىلدى. ەرتەرەكتە كورگەنىمىز بولماسا, ۇمىتىپ-اق قالعانداي ەكەنبىز. ال مىنا كورىنىستەن كەيىن ونداعى وقيعالار سانامىزدا قايتا جاڭعىرعانداي بولدى. تانىس بەينەلەر – كينونىڭ كوريفەيى شاكەن ايمانوۆ, مەتر اكتەرلار فاريدا ءشارىپوۆا, ءاسانالى ءاشىموۆ ت.ب. وقيعا كەيىپكەرلەرى رەتىندە سول كەزدەگى وندىردەي جاس قالپىندا كوز الدىمىزدا ءوتىپ جاتتى. شىنىمىزدى ايتايىق, قاتتى اسەرلەندىك. ەسىمىزگە جاستىق شاعىمىز ءتۇستى. بۇل كينونىڭ قۇدىرەتى ەمەي نەمەنە؟! ونەردىڭ ۇلىلىعى دا وسىندا جاتقان جوق پا؟
بىزدەر بالالىق شاعىمىزدا «امانگەلدى», «مەنىڭ اتىم قوجا», ء«بىزدىڭ سۇيىكتى دارىگەر», «تاقيالى پەرىشتە» ت.ب. دا كينولەنتالاردى كورىپ وستىك. ولارداعى كەيىپكەرلەرگە ۇقساۋعا تىرىستىق.
كەيىنىرەك «قىز جىبەك», «اتاماننىڭ اقىرى», ء«ترانسسىبىر ەكسپرەسى», «باندىنى قۋعان حاميت» سەكىلدى فيلمدەر ومىرگە كەلدى. ءبىر عاجابى سول, جوعارىدا ايتقان شەدەۆرلەردى قانشاما رەت كورسەك تە جالىقپاي, جاڭا تاماشالاپ وتىرعانداي (قازىر دە سولاي) اسەرگە بولەنەمىز. تاپ وسىنداي دۇنيەلەر كوپتەپ تۇسىرىلە بەرسە ەكەن دەيسىڭ.
سوڭعى جىلدارى تۇسىرىلگەن «جاۋجۇرەك مىڭ بالا», ء«بىرجان سال», «قۇنانباي» سەكىلدى كوركەم فيلمدەر وتاندىق كينويندۋستريا سالاسىنا ولجا سالعان ورتاق قازىنامىز.
بارعا قاناعات دەپ ايتايىق, قازىر نە كوپ فيلم كوپ, شەتەلدىكىن ايتپاعاننىڭ وزىندە. ولاردى كوپسىنىپ وتىرعانىمىز جوق, تەك قانا كەيبىرىنىڭ ساپاسى مەن مازمۇنىنا كوڭىلىمىزدىڭ تولمايتىنى بولماسا.
وتاندىق تەلەسەريالداردىڭ دا ءوز كورەرمەندەرى بار. ءبىزدىڭ ايتقالى وتىرعانىمىز باسقا نارسە.
شەكتەن تىس كوپ نارسەنىڭ قادىرى بولمايتىنى بەلگىلى. وسى ورايدا قازىرگى تاڭدا كينو تۇسىرەتىن جەكەمەنشىك ستۋديالار كوبەيدى. كەيبىر وبلىس ورتالىقتارىندا اشىلعان نەمەسە اشىلىپ جاتقان وسىنداي ستۋديالاردى ايتپاعاننىڭ وزىندە, قالتالى كەيبىر ازاماتتارىمىز دا كينو تۇسىرەتىن بولىپ ءجۇر. ءتۇسىرسىن, تەك قانا ساپاسىنا ءمان بەرسىن, مازمۇنى مەن تاربيەلىك جاعىنا كوڭىل اۋدارسا بولعانى.
ال ونداي بيىك دەڭگەيدەگى, تالاپقا ساي دۇنيەلەر قانشا بولسا دا بىزگە كوپتىك ەتپەسى انىق.
كوڭىلدە ءبىر عانا قاۋىپ بار. كينونىڭ قۇنىن تومەندەتىپ الماس پا ەكەنبىز دەگەن...
ال, ءسىز قالاي ويلايسىز؟
كارىباي امزە ۇلى,
زەينەتكەر
تۇكىستان وبلىسى,
سوزاق اۋدانى
