ادىلبەك جاقسىبەكوۆ ەلىمىزدىڭ مەملەكەتتىك ورگاندارىنىڭ ءبىرىنشى باسشىلارى بىرقاتار شەت مەملەكەتكە بارىپ, ولاردىڭ قىلمىستىق پروتسەسس مودەلىن, سوت ءوندىرىسىن زەردەلەپ قايتقاندىعىن اتاپ ءوتتى. بيىلعى جىلدىڭ ماۋسىم ايىندا قازاقستاندىق دەلەگاتسيا گەرمانيادا بولىپ, قۇقىق قورعاۋ ورگاندارى مەن سوتتاردىڭ جۇمىستارىن ۇيىمداستىرۋ بارىسىمەن تانىسىپ قايتقان.
«ەندىگى ۋاقىتتا ءبىزدىڭ شاقىرۋىمىزبەن گەرمانيالىق ماماندار قازاقستانعا كەلىپ, وزدەرىنىڭ وڭ تاجىريبەلەرىمەن بولىسۋگە دايىن. شەتەلدىك ارىپتەستەرىمىزدىڭ جانە ولاردىڭ ۇلكەن تاجىريبەسىنىڭ ارقاسىندا ءبىز ءۇشىن ماڭىزدى بارلىق سۇراقتارعا جاۋاپ الامىز دەپ ويلايمىن», دەدى ادىلبەك جاقسىبەكوۆ.
ءوز كەزەگىندە ماينداعى فرانكفۋرت قالاسىنىڭ باس پروكۋرورى البرەحت شرايبەر گەرمانيادا پروكۋراتۋرا قىلمىستىق قۋدالاۋ ورگانى بولىپ سانالاتىنىن اتاپ ءوتتى.
«گەرمانيادا قىلمىستىق ءىس جۇرگىزۋ زاڭناماسىنىڭ تاريحى 140 جىلدان اسىپ جىعىلادى. بۇل قىلمىستىق ءىس جۇرگىزۋدىڭ ۇزاق مەرزىمدى قالىپتاسۋى سانالادى. بارلىق جەردەگىدەي, ءاربىر زاڭ سايكەسىنشە قوعامدىق وزگەرىستەرگە بەيىمدەلۋى ءتيىس. ءبىزدىڭ قىلمىستىق ءىس جۇرگىزۋ كودەكسىمىز دە ۇزاق جىلدار بويى كوپتەگەن وزگەرىستەرگە ۇشىرادى», دەدى البرەحت شرايبەر.
سونداي-اق, كەزدەسۋ بارىسىندا قىلمىستىق پروتسەستى ۇيىمداستىرۋدىڭ پروگرەسسيۆتى حالىقارالىق ستاندارتتارى, سونىمەن قاتار قازاقستاننىڭ قۇقىق قورعاۋ جۇيەسىن جاڭعىرتۋ جونىندەگى تاسىلدەر تالقىلاندى.
