ورتالىق ازيا باسشىلارى تۇرىكمەنستاننىڭ تۋريستىك ايماعى اۆازدا حالىقارالىق ارالدى قۇتقارۋ قورىنىڭ سامميتىنە جينالدى. جيىنعا قازاقستان پرەزيدەنتى نۇرسۇلتان نازارباەۆ, وزبەكستان پرەزيدەنتى شاۆكات ميرزيوەۆ, تاجىكستان پرەزيدەنتى ەمومالي راحمون, قىرعىزستان پرەزيدەنتى سوورونباي جەەنبەكوۆ, تۇرىكمەنستان پرەزيدەنتى گۋربانگۋلى بەردىمۇحامەدوۆ قاتىستى.
سامميت بارىسىندا قاتىسۋشى تاراپتار ارال تەڭىزىن قۇتقارۋ, ونداعى ماسەلەلەر جانە وڭىردەگى ەكولوگيالىق احۋالدى جاقسارتۋعا قاتىستى ماسەلەلەردى تالقىلادى. سونداي-اق جيىندا ارال اپاتىنىڭ سالدارىن جويۋ, سۋدىڭ لاستانۋى, ەكولوگيالىق جاعدايدى جاقسارتۋ مەن وسى باعىتتاعى ورتالىق ازيا مەملەكەتتەرىنىڭ ارەكەتى ءسوز بولدى. جالپى, ارال اپاتىنىڭ سالدارىمەن كۇرەسۋ ءۇشىن 2013-2017 جىلدار ارالىعىندا 500-دەن استام جوبا جۇزەگە استى.
بۇدان بولەك, سامميتتە ورتالىق ازيا مەملەكەتتەرىنىڭ باسشىلارى حالىقارالىق ارالدى قۇتقارۋ قورىن رەفورمالاۋ تۋرالى باستامانى قولدادى. «ارالدى قۇتقارۋعا كومەك كورسەتۋ بويىنشا باعدارلامانى ورىنداۋدى قايتا قاراپ شىعۋ قاجەت. سونداي-اق تۇسكەن قاراجاتتىڭ قايدا جۇمسالعانىن دا ءبىلۋ كەرەك. 20 جىل بويى قوردا بىردە-ءبىر گيدروەنەرگەتيكالىق جوبا قارالعان جوق. الايدا ۇيىم ارال تەڭىزىن ساقتاپ قالۋ جونىندەگى قارجىلىق-نەسيەلىك جوبا رەتىندە قۇرىلعان بولاتىن», دەدى سامميتتە ءسوز سويلەگەن قىرعىزستان پرەزيدەنتى سوورونباي جەەنبەكوۆ.
ەستەرىڭىزدە بولسا, قىرعىزستان ۇيىمعا مۇشەلىگىن ۋاقىتشا توقتاتقان بولاتىن. الايدا ارالدى قۇتقارۋ قورىنداعى وڭ وزگەرىستەر ولاردىڭ پىكىرىن وزگەرتىپ, مۇشەلىگىن جالعاستىرۋعا مۇمكىندىك بەرمەك.
ورتالىق ازيا مەملەكەتتەرىنىڭ پرەزيدەنتتەرى ارال تەڭىزىن ساقتاپ قالۋ ماسەلەسىن تالقىلاۋ ءۇشىن تۇرىكمەنستانعا جينالدى. Vesti.ru اگەنتتىگىنىڭ حابارلاۋىنشا, سامميت بارىسىندا ارال تەڭىزىن قۇتقارۋدىڭ ماڭىزدى جولدارى تالقىلانعان.
اگەنتتىككە سۇحبات بەرگەن حالىقارالىق ارالدى قۇتقارۋ قورى اتقارۋ ديرەكتسياسىنىڭ ديرەكتورى بولات بەكنياز تەڭىزدەن تۋىنداعان ماسەلە ورتالىق ازيانى تۇگەل قامتيتىنىن ايتادى. سوندىقتان ارال ماسەلەسىن بىرلەسە وتىرىپ شەشۋ قاجەت.
جيىن بارىسىندا ءسوز سويلەگەن ەلباسى نۇرسۇلتان نازارباەۆ تا تۇيتكىلگە قاتىستى ءوز كوزقاراسىن ءبىلدىردى. «جيىرما جىل بۇرىن قابىلدانعان شەشىمدەر قازىر ەسكىردى. قوردىڭ باسقارۋشى ورگاندارىن قايتا سۇزگىدەن وتكىزۋ قاجەت. عىلىمي تۇرعىدا وتە ورىندى ۇسىنىستار ايتىلدى. سولاردى ەسكەرۋ كەرەك», دەدى ن.نازارباەۆ.
Vesti.ru اگەنتتىگىنىڭ پايىمداۋىنشا, وسى سامميت ماسەلەنى تۇبەگەيلى شەشۋگە جول اشپاق. ماسەلەن, بۇعان دەيىن ءامۋداريا مەن سىرداريا سۋى ەگىستىك پەن ماقتا سۋارۋعا كەتىپ, ارالعا جەتپەيتىن. ەندىگى جەردە ورتالىق ازيا ەلدەرى وزەن سۋىن ءتيىمدى پايدالانىپ, تامشىلاتىپ سۋارۋ سەكىلدى ءادىس قولدانباق. سونىمەن قاتار جيىن قورىتىندىسى بويىنشا تەڭىز تابانىنا تۇزدى توپىراققا شىدامدى وسىمدىكتەر ەگۋ تۋرالى كەلىسىم جاسالدى.
سامميتتە ءسوز سويلەگەن تۇرىكمەنستان پرەزيدەنتى گۋربانگۋلى بەردىمۇحامەدوۆ ارال تەڭىزىنىڭ ماسەلەسىن الەمدىك دەڭگەيگە كوتەرۋدى ۇسىندى. Vesti.ru ورتالىق ازيا مەملەكەتتەرىنىڭ تۇيتكىلگە قايتا ورالىپ, بىرلەسە جۇمىس ىستەۋىن جوعارى باعالادى.
تۇرىكمەنستاندا حالىقارالىق ارالدى قۇتقارۋ قورىنا مۇشە مەملەكەتتەردىڭ 12-ءى ءسامميتى ءوتتى. جيىنعا ورتالىق ازيا مەملەكەتتەرىنىڭ باسشىلارى تۇگەلدەي قاتىستى.
سامميت باستالماستان بۇرىن تۇرىكمەنستان باسشىسى گۋربانگۋلى بەردىمۇحامەدوۆ قازاقستان پرەزيدەنتى نۇرسۇلتان نازارباەۆپەن, تاجىكستان پرەزيدەنتى ەمومالي راحمونمەن, وزبەكستان پرەزيدەنتى شاۆكات ميرزيوەۆپەن ەكىجاقتى كەزدەسۋ وتكىزگەن.
Azathabar.com سايتىنىڭ مالىمەتىنە سۇيەنسەك, ارال تەڭىزىنىڭ تارتىلۋىنان تۋىنداعان تۇيتكىلدەر تۇرىكمەنستاننىڭ سولتۇستىك اۋداندارىنا وراسان زيان تيگىزىپ وتىر. ماسەلەن, داشوگۋز ءۋالاياتىندا تازا اۋىز سۋ قات. سونداي-اق ەگىستىك جەرلەر تۇز تاتىپ كەتكەن. تەڭىزدەن كوتەرىلگەن تۇزدى داۋىل دۇركىن-دۇركىن ەلدى ابىگەرگە تۇسىرەدى. مامىردا بولعان وسىنداي بوران ەكى كۇن بويى توقتاماعان.
شولۋدى دايىنداعان
اباي اسانكەلدى ۇلى,
«ەگەمەن قازاقستان»
