سونداي-اق ەكى ەل كاسىپكەرلەرى اراسىندا وتكەن بيزنەس-فورۋمدا تاراپتاردىڭ مۇمكىندىكتەرى بارىنشا سارالانىپ, ناقتى شارالار قابىلداندى. اتاپ ايتقاندا, كورشىلەر بوزويداعى بۇرىنعى وتكىزۋ پۋنكتىن قايتا اشىپ, جولدى جوندەپ, بەسقالانىڭ ارزان كوكونىسىن اقتوبە ارقىلى رەسەيگە, ءتىپتى ءارى قاراي ەۋروپاعا شىعارۋعا مۇمكىندىك الادى. ءارى اقتوبەدەن ەت, ۇن ونىمدەرىن تاسيدى.
تاۋەلسىزدىك جىلدارى اقتوبە وبلىسىنا كوشىپ كەلگەن 42 920 ادامنىڭ 36 220-سى وزبەكستاننان, ال ونىڭ 90 پايىزى قاراقالپاق ەلىنەن قونىس اۋدارعاندار. قازىر ولار ءوسىپ-ءونىپ, 42 260 ادامعا جەتىپ وتىر. ساپار بارىسىندا بەردىبەك ساپارباەۆ جەرگىلىكتى قازاقتارمەن كەزدەسىپ, «نۇرلى كوش» باعدارلاماسى تۋرالى جان-جاقتى باياندادى. اقتوبە وبلىسىنا كوشىپ كەلۋشىلەرگە بارىنشا قامقورلىق كورسەتىلەتىنىن اتاپ ءوتتى.
وسى رەتتە بەردىبەك ماشبەك ۇلى ق.جۇبانوۆ اتىنداعى اقتوبە مەملەكەتتىك ۋنيۆەرسيتەتى قاراقالپاقستانداعى قانداستارىمىزدىڭ بالالارىن وقۋعا جەڭىلدىكپەن قابىلداۋعا دايىن ەكەندىگىن تىلگە تيەك ەتتى. وقۋعا قابىلدانعان ستۋدەنتتەر 1-كۋرستا تولىقتاي وقۋ اقىسىن تولەۋدەن بوساتىلادى. قالعان كۋرستاردى 50% جەڭىلدىكپەن وقيدى. سونداي-اق قاراقالپاقستاندىق تۇلەكتەردىڭ جول شىعىنىن قىسقارتۋ ءۇشىن قۇجاتتار نوكىستە قابىلدانادى.
كەزدەسۋ سوڭىندا قاراقالپاقستانداعى قازاق ۇلتتىق مادەنيەت ورتالىعىنا «اقتوبە – قۇتتى مەكەن» كىتابى, ا.جۇبانوۆ تۋرالى كىتاپتار, «100 جاڭا وقۋلىق» اياسىندا شىعارىلعان وقۋلىقتار, تانىمدىق كىتاپتار سىيعا تارتىلدى. ويتكەنى قاراقالپاقستانداعى 725 مەكتەپتىڭ 171-ءى قازاق تىلىندە وقىتادى. ساپار سوڭىندا دەلەگاتسيا نوكىستەگى سورشا قورىمىندا جاتقان قازاقتىڭ ۇلى اقىنى تولەگەن ايبەرگەنوۆتىڭ باسىنا بارىپ, دۇعا باعىشتادى.
بازارباي يمانوۆ,
دۇنيەجۇزى قازاقتارى قاۋىمداستىعى اقتوبە وبلىسى فيليالىنىڭ باسشىسى
