بىرنەشە جىل بۇرىن يليا يلينمەن سۇحباتتاستىق. وليمپيادا مەن الەم چەمپيوناتىندا ولجا سالىپ جۇرگەن كەزى. بۇكىل حالىق تولاعايدىڭ رەكوردتارىنا ءتانتى بولىپ, الاقانىنا سالدى. بىراق كوك تۋىمىزدى جەلبىرەتكەن باتىرىمىزعا تيەسىلى سىياقىسى بەرىلمەدى. مەملەكەتتەن الۋى ءتيىس شاكىرتاقىسىنان, ۇستەمە قارجىسىنان قاعىلدى. ەشبىرىنە قولى جەتپەي ءجۇردى.
اراعا بىرنەشە اي سالىپ, باقىت سارسەكباەۆتىڭ وسى سياقتى داۋعا ىلىككەنى بەلگىلى بولدى. الماتى قالاسىنان الۋى ءتيىس بولعان پاتەردىڭ كىلتىن بىلعارى قولعاپ شەبەرى ءبىرشاما ۋاقىت ۋىسىنا تۇسىرە المادى. بۇل ماسەلە تىلشىلەردىڭ باقىلاۋىندا بولىپ, پاتەرىنە ءتۇبى قول جەتكىزدى, ايتەۋىر ەلەنا حرۋستالەۆا ۆانكۋۆەردە كۇمىس ولجالاپ, ەل ابىرويىن اسقاقتاتتى. كەيىننەن وعان سىيعا بەرىلگەن پاتەر دە الماتىدا بولماي شىقتى. وبلىستىڭ اتىنان جارىسقا قاتىسقاندىقتان, باسپانا قاسكەلەڭنەن قاراستىرىلىپتى. ەلەنا قىز «الماتىدا جاتتىعامىن, ەلدىڭ اتىنان جارىسقا قاتىستىم, وسى شاھاردان ءبىر پاتەر السام دەپ ەدىم, ول دا بۇيىرمادى. وليمپياداعا وبلىستىڭ اتىنان ەمەس قازاقستاننىڭ اتىنان قاتىسقان سەكىلدى ەدىم» دەپ ويىن بۇكپەستەن, اشىق جەتكىزدى.
ودان كەيىن دە وسى تاقىلەتتەس تالاي ماسەلە كوتەرىلدى. سپورتشىلار تىلشىلەردەن كومەك سۇراپ, ۇزاق ۋاقىت بويى ۇكىمەتتىڭ بەرەشەگىن بەرمەي جۇرگەنىن ايتتى. ال ءتيىستى مەكەمەلەر, مينيسترلىكتەر, سپورت كوميتەتى بۇل ءىستى شەشۋدە اسىقپايدى. بەرىلەتىن سىياقى ءتۇبى بەرىلەدى-اۋ, بىراق سوزىلىپ سيىرقۇيىمشاقتانىپ كەتەتىنى بار. تاعايىندالعان قارجىنى الامىن دەگەندە كەلەسى وليمپيادا دا باستالۋعا شاق قالادى. قۇزىرلى ورىندارعا شىعىپ, سپورتشىلاردىڭ قۇقىعىن قورعاماق بولىپ بۇل ماسەلەگە تالاي ارالاستىق تا. بىراق كوپتەگەن قول قويىلۋى ءتيىس قۇجاتتار, تولتىرىلۋى ءتيىس حاتتامالار, رەسميلەنگەن راسىمدەر – بارلىعى دا شىدامدى تاۋىسىپ جىبەرەدى.
ايتپاعىمىز, بۇكىل ەل بولىپ حالىقارالىق جارىستاردا تاقىمىمىزدى قىسىپ وعلاندارىمىزدىڭ جولىنا قارايمىز. ابىرويىمىزدى اسقاقتاتىپ, ءانۇرانىمىزدى شىرقاتسا توبەمىز كوككە جەتەدى. ساڭلاقتارىمىزدىڭ جەڭىسىنە بوركىمىزدى اسپانعا اتىپ قۋانامىز. الايدا, سول سپورتشىلارىمىزدى باعالاي الدىق پا؟ ءبىرشاماسى ارينە, دىتتەگەن ماقساتىنا جەتتى. بىراق قانشاماسى ءالى دە قىزمەتسىز, سىياقىسىز, باسپاناسىز ءجۇر.
دەنيس تەننىڭ قازاسىنان كەيىن «قولدا بار التىنىمىزدى نەگە باعالاي المايمىز» دەپ جانۇشىرا جازىپ جاتىرمىز. «اكىمدى كورگەندە, اقىندى ولگەندە قۇرمەتتەيتىن ەلمىز» دەگەن ءسوزدىڭ شىنىمەن دە راس بولعانى ما؟ ايتپەسە, الماتىنىڭ قاق ورتاسىندا, تاپا تال تۇستە وليمپيادانىڭ قولا جۇلدەگەرى تۇرماق, قاراپايىم قالا تۇرعىنىنا ەشكىم تيىسپەۋى ءتيىس ەدى عوي. تۇسكى ساعات ۇشتە, كۇن جارىقتا دەنيس تەندى تانىماي, پىشاق سۇققان قاندى قول قاراقشىلاردىڭ ءىسى اقىلعا سىيمايدى. ءبىزدىڭ ەلدە وليمپيادادا ولجا سالعان جالعىز مانەرلەپ سىرعاناۋشى دەنيس تەن عانا ەدى عوي. ودان باسقا ەشكىم مۇز ۇستىندە ول سەكىلدى ورنەك سالماعان ەدى. ەندى مۇنداي دەڭگەيدەگى سپورتشى قاشان شىعارى دا بەلگىسىز. قانشا جىل بويى ەڭبەكتەنىپ, ەل اتىن شىعارىپ, بەينەتىنىڭ راحاتىن كورەتىن جاسقا كەلىپ قالعان سپورتشى قاپيادا قازا تاپتى.
ەلىمىزدە نورۆەگياداعىداي وليمپيادانى 7-8 مارتە جەڭگەن سپورتشىلار جوق. سكانديناۆياداعى الاقانداي ەلدە وليمپيادانى باعىندىرعان 500-گە جۋىق سپورتشى بار. ال بىزدە قىسقى سپورتتا مەدال الىپ, تانىمال بولعاندار ساناۋلى. سميرنوۆ, پولتورانين, تەن... اينالدىرعان 2-3 ادامدى كوشەدە تانىماي, ولارعا قوقان-لوققى كورسەتۋ قوعامنىڭ ەلشىلدىكتەن ادا ەكەندىگىن كورسەتپەي مە؟ كەزىندە باقتيار ارتاەۆ پەن ەرماحان يبرايموۆتەرگە دە قول كوتەرگەندەر بولدى. قايسىبىرىن ايتايىق.
قۇندىلىقتارىن باعالاي المايتىن قوعامدا ءومىر ءسۇرىپ جاتىرمىز, وكىنىشكە قاراي. «التىننىڭ قولدا باردا قادىرى جوق» دەگەندەي, تالاي سپورتشىمىز شەتەل اسىپ وزگە ەلدەردىڭ قورجىنىنا مەدال سالدى. ەسىمدەرىن ەل بىلەدى. ال, «جانىم قازاق» دەپ ەل ابىرويىن اسقاقتاتقان بەكزات سپورت – مانەرلەپ سىرعاناۋدان شىققان تۇڭعىشىمىز دەنيس تەندى دە ساقتاي المادىق. وليمپيادا چەمپيونى بەكزات ساتتارحانوۆ دا ماڭدايىمىزعا سىيماي كەتكەن ەدى...
مانەرلەپ سىرعاناۋ سپورتشى ءۇشىن ەرتە باستالىپ, ەرتە اياقتالاتىن ونەر. مۇندا 6 جاسىنان جاتتىعۋعا كىرىسىپ, 13-14 جاسىندا حالىقارالىق ارەناعا شىعادى. 13 جاسىندا وليمپياداعا قاتىسىپ, جۇلدە العان سىرعاناۋشىلار جەتەرلىك. 16 جاسىندا ەكىنشى وليمپياداسىنا قاتىسقاندار دا بار. دەنيستىڭ دە ەكى وليمپياداعا قاتىسقانى بەلگىلى. وكىنىشتىسى, دەنيس سپورتتىق عۇمىرىن اياقتاي الماي كەتتى...
ەرمۇحامەد ماۋلەن,
«ەگەمەن قازاقستان»
