وتكەنگە زەر سالساق, قازاق سپورتىنداعى قايعىلى وقيعالار وسىمەن عانا شەكتەلمەيتىنىنە كوز جەتكىزەمىز. توقسانىنشى جىلدارداعى ەلدەگى ەكونوميكالىق داعدارىس كوپتەگەن سپورتشىلاردىڭ تەرىس جولعا تۇسۋىنە اسەر ەتتى. ءدال سول كەزدەرى «رەكەت», «رازبوركا», «كيللەر» جانە تاعى دا باسقا سوزدەردى كۇن سايىن ەستىپ جۇردىك. تاپسىرىسپەن ادام ءولتىرۋ, ءىز-ءتۇسسىز جوعالىپ كەتۋ, اقشا بوپسالاۋ, كەپىلدىككە كىسى الۋ, ءدۇيىم جۇرتتىڭ كوز الدىندا سوققىعا جىعۋ سەكىلدى قىلمىستىڭ ءتۇر-ءتۇرىنىڭ ناعىز ورشىگەن تۇسى دا سول. وكىنىشكە قاراي, سول ءبىر جامان ءۇردىس بۇگىنگە دەيىن جالعاسۋدا. ءبىز بۇگىنگى ماقالامىزدا ادام قولىنان قازا تاپقان اتاقتى سپورتشىلار مەن بىلىكتى باپكەرلەر جايىندا اڭگىمەلەۋدى ءجون كورىپ وتىرمىز.
1995 جىل. الماتىداعى تولە بي جانە ياساۋي كوشەلەرىنىڭ قيىلىسىندا تۇرعان «مەرسەدەستىڭ» ىشىنەن كيكبوكستان اسا اۋىر سالماقتاعى قازاقستاننىڭ بىرنەشە دۇركىن چەمپيونى ەرحان سادىقوۆتىڭ دەنەسى تابىلدى. ءبىراز ۋاقىتتان سوڭ قىلمىسقا قاتىسى بار كۇدىكتى ۇستالدى. ول ءوزىنىڭ دوسى ەكەن. قۇرداسىنىڭ كۇننەن-كۇنگە داۋلەتى تاسىپ, تاسى ورگە دومالاي باستاعانىن كورە الماعان جەندەت ءوزىنىڭ جەكە كولىگىندە ەش الاڭسىز وتىرعان ەرحانعا تاپانشا كەزەنگەن. قازىر سول جەردە كىشكەنتاي قۇلپىتاس تۇر. سىرتى شىنجىرمەن قورشاۋلى. قۇلپىتاستا بوكسشىنىڭ بىلعارى قولعابى بەينەلەنگەن. تاسقا ويىلىپ تۇرىپ جازىلعان جازۋدى وقىعان ادام بالاسىنىڭ ەت-جۇرەگى ەلجىرەمەۋى مۇمكىن ەمەس: «و, تاعدىر! ەرحان ەرسايىن ۇلى. 1973 تۋعان. 1995 جىلى قايتىس بولدى».
1996 جىل. سول جىلى ەلدى دۇرلىكتىرگەن ەكى بىردەي وقيعا بولدى. كسرو-عا ەڭبەك سىڭىرگەن سپورت شەبەرى مۇرات جەكسەمبەكوۆتىڭ الماتىداعى پاتەرىنە ەنگەن جاۋىز جيىرما جەردەن پىشاق سالىپ, 55 جاستاعى ازاماتتى اسقان ايۋاندىقپەن ءولتىردى. ءيا, جەكسەمبەكوۆتى جانكۇيەرلەر جاقسى بىلەدى. ول كوگالداعى حوككەيدىڭ حاس شەبەرى ەدى. مۇرات وڭ قولمەن دە, سول قولمەن دە كەرەمەت سوققى جاساي بىلەتىن. سپورتتىڭ بۇل تۇرىندە ونداي امبەباپ ويىنشىلار سيرەك ەدى. الماتىنىڭ داڭقتى «دينامو» كلۋبىنىڭ كاپيتانى بولعان قانداسىمىز 18 رەت وداق بىرىنشىلىگىنىڭ جەڭىمپازى اتاندى.
ءدال سول جىلى شىمكەنتتە پروفەسسور, پەداگوگيكا عىلىمدارىنىڭ دوكتورى, پەداگوگيكا عىلىمدارى اكادەمياسىنىڭ اكادەميگى, وڭتۇستىك قازاقستان وبلىسىنداعى ىرگەلى جوعارى وقۋ ورنىنىڭ ءبىرىنىڭ ىرگەتاسىن قالاۋشى ماردان ساپارباەۆ كيللەردىڭ قولىنان قازا تاپتى. عىلىم مەن سپورتتى ۇشتاستىرا بىلگەن ازامات كەزىندە گرەك-ريم كۇرەسىنەن كسرو سپورت شەبەرى اتانسا, ودان كەيىن كوپتەگەن مىقتى شاكىرت تاربيەلەدى. باسشىلىق قىزمەت اتقارعان جىلدارى ماردان مىرزا وڭتۇستىك ءوڭىرى سپورتىن دامىتۋعا وراسان زور ەڭبەك ءسىڭىردى. وكىنشتىسى, 54 جاستاعى ازاماتقا وق اتقان قاندىقول قاراقشى تابىلعان جوق.
1998 جىل. ءساۋىر ايى بەل ورتاعا جەتكەن تۇستا قازاقستان رەسپۋبليكاسى تاەكۆوندو فەدەراتسياسىنىڭ پرەزيدەنتى بەكسەيىت تۇلكيەۆتىڭ قاراقشىلار قولىنان قازا تاپقانى جايىندا جايسىز حابار جەر جاھاندى شارلادى. الماتىداعى ءۇيىنىڭ ماڭىنا جەتىپ, كولىگىن تۇراققا قويىپ جاتقاندا تۇتقيىلدان شىعا كەلگەن بازبىرەۋ اتاقتى سپورتشىعا پىشاق سالدى. قىلمىسكەر سول كۇيى ۇستالماي كەتتى.
بەكسەيىت تۇلكيەۆ فەنومەن ەدى. ول جەكپە-جەك ونەرىنىڭ بىرنەشە ءتۇرىن ەركىن مەڭگەردى. دوسى مۇزبالاق مۇستافا وزتۇرىكپەن بىرگە ەلىمىزدىڭ ءار ايماعىندا تاەكۆوندونىڭ دامۋىنا ولشەۋسىز ۇلەس قوستى. ءوزى سول ۇيىمدى باسقاردى. ال ونىڭ سۋرەتشىلىك شەبەرلىگى جايىندا اڭگىمە تىپتەن بولەك. بەكسەيىتتىڭ «3امانداستار», «اكە», «اتا-بابا جەرى», «سۋرەتشىنىڭ ءتۇسى», «اجە», «اكەنى مايدانعا شىعارىپ سالۋ», ء«تۇسىرۋ الاڭى» سەكىلدى كەسكىندەمەلىك تۋىندىلارى كوپشىلىككە تانىمال.
2000 جىل. 3 مامىردا ورالدا ءتۇن بەل ورتادان اۋعان تۇستا سامبودان الەم چەمپيونى, الەم كۋبوگىنىڭ يەگەرى 37 جاستاعى اسقار شايحيەۆ ءوز ءۇيىنىڭ ىرگەسىنە كەلىپ, تاكسيدەن تۇسكەلى جاتقان ەدى. سول مەزەتتە بەتىن تۇمشالاپ الىپ, ماكاروۆ تاپانشاسىمەن قارۋلانعان جەندەت وعان وق جاۋدىردى. اتىلعان وقتىڭ تورتەۋى دە ساڭلاققا ءدال ءتيدى. كيللەر كولىكتى اينالىپ, تاپانشانى جۇرگىزۋشىنىڭ ماڭدايىنا كەزەدى. بىراق شۇرىپپەنى باسپادى. جۇرگىزۋشى مەن ونىڭ سەرىگى امان قالدى. اسقاردىڭ دا ولىمىنە كىنالى ادام تابىلمادى. بۇل دا تاپسىرىسپەن جاسالعان قىلمىس ەكەنى ەش كۇمان تۋعىزبايدى. ەل اراسىندا «كيللەر رەسەيگە ءوتىپ كەتتى» دەگەن دە اڭگىمەلەر ايتىلۋدا. وسىلايشا, الاش جۇرتى تاعى ءبىر اسىل ازاماتىنان ايىرىلدى...
2001 جىل. اقپان ايىنىڭ ايازىندا قاراعاندى قالاسىندا ورىن العان وقيعا ەسكە تۇسسە, ءالى دە جانىڭ تۇرشىگەدى. سول كەشتە «وفسايد» ءدامحاناسىندا قوناقتار بەيقام دەمالىپ وتىرعان. ءبىر مەزەتتە باسا-كوكتەپ كىرگەن ون شاقتى جىگىت قوناقتاردىڭ ءبىرازىن سىرتقا شىعارىپ جىبەرىپ, ءبىرازىن ىشتە قالدىرادى. سودان ولار وتىرعان جەرگە «كالاشنيكوۆ» اۆتوماتىمەن وق جاۋدىرادى. ءبىراز ۋاقىت وتە قىلمىس ورنىنا جەتكەن پوليتسەيلەر ءدامحانانىڭ ىشىنەن بەس ادامنىڭ ءمايىتىن تابادى. جان ءتاسىلىم ەتكەندەر اراسىندا بوكستان كسرو جانە ازيا چەمپيونى, اتلانتا وليمپياداسىنا قاتىسۋشى 29 جاستاعى بەكتاس ابۋباكىروۆ تا بار ەدى.
12 تامىزدا تاپاداي تال تۇستە قول كۇرەسىنەن الەم چەمپيونى ۆياچەسلاۆ ءچيۆانيندى ءۇيىنىڭ ىرگەسىندە بەلگىسىز بىرەۋ اتىپ ءولتىردى. كيللەر وقيعا بولعان جەردەن لەزدە ءىزىن سۋىتىپ ۇلگەرەدى. 44 جاستاعى سپورتشى سول جەردە جان ءتاسىلىم ەتتى. تابانى كۇرەكتەي 17 جىل وتسە دە قىلمىسقا قاتىسى بار ەشكىم ۇستالمادى. جالپى ءچيۆانيننىڭ ءومىرى شىتىرمان وقيعالارعا تولدى. 1974-1987 جىلدارى ارالىعىندا ول الاياقتىق, بوپسالاۋ جانە باسقا دا قىلمىس تۇرلەرىمەن اينالىسىپ, ءۇش رەت تەمىر تورعا توعىتىلدى. اسىرەسە, ۆياچەسلاۆتىڭ قانداي اككى الاياق بولعانىن قۇقىق قورعاۋ ورگاندارى زەينەتكەرلەرىنىڭ اۋزىنان سان مارتە ەستىگەنبىز. بۇل جايىندا فيلم دە ءتۇسىرىلدى, ءباسپاسوز بەتتەرىندە بىرنەشە ماقالا جارىق كوردى.
2002 جىل. 14 ماۋسىمدا قازاق جانكۇيەرلەرى قارا جامىلدى. الماتىداعى كوپ قاباتتى ۇيلەردىڭ بىرىندە ورنالاسقان پاتەرىنىڭ قاسىنا جەتكەن تۇستا جەندەت ايگىلى بوكسشى, داڭقتى باپكەر ءابدىسالان نۇرماحانوۆقا تۋ سىرتىنان وق اتتى. 66 جاستاعى ابىز اقساقال سول جەردە جان ءتاسىلىم ەتتى. بوكس ونەرىن سەرىك ەتكەن قاسيەتتى تۇركىستاننىڭ تۇلەگى اسا اۋىر سالماقتا جۇدىرىقتاسىپ, بيىك بەلەستەردى باعىندىرعان تۇڭعىش قازاق. گانەفو ويىندارىندا توپ جارىپ, كسرو چەمپيوناتى مەن كسرو حالىقتارى سپارتاكياداسىندا جۇلدەگەرلەر قاتارىنان بىرنەشە رەت كورىنگەن نار تۇلعالى ازامات كوپتەگەن حالىقارالىق جارىستا دا جاسىنداي جارقىرادى. كەڭەس وداعى باپكەرلەرى ىشتارلىق تانىتپاعاندا نۇرماحانوۆتىڭ باعىندىرار بەلەستەرى ودان دا بيىك بولاتىنى داۋسىز ەدى. كەيىننەن باپكەرلىكتىڭ قامىتىن كيىپ, تالاي تالانتتى جاستىڭ توماعاسىن سىپىردى.
1996 جىلى قازاقستان قۇراماسىن اتلانتا وليمپياداسىنا باستاپ اپارىپ, زور تابىسقا قول جەتكىزدى. سول جىلدىڭ جازىندا بولعان وقيعادان سوڭ بارشا حالىق «قازاقتىڭ اسا قادىرلى اقساقالىن ولىمگە قيعان كىم ەكەن؟», دەپ قاتتى قايعىردى. كوپ ۇزاماي قىلمىسكەرلەر قولعا ءتۇسىپ, ءتيىستى جازالارىن الدى. قۇزىرلى ورگاندارعا سەنسەك, الماتى قالاسى اۋەزوۆ اۋدانىنداعى ۋاقىتشا اۆتوتۇراقتاردىڭ باستىعى قىزمەتىن اتقارىپ جۇرگەن ءابدىسالان نۇرماحانوۆتىڭ ىزىنە ۆلاديمير كونەۆ ەسىمدى قاراقشى تۇسكەن ەكەن.
ول كەزىندە بەسسايىسپەن اينالىسىپ, سپورت شەبەرى دارەجەسىنە دەيىن جەتكەن. سول كەزدەرى كونەۆ ابەكەڭ باسشىلىق ەتەتىن تۇراقتاردىڭ بىرىندە ناپاقاسىن تاۋىپ جۇرگەن. باستىعىن توناپ, مول ولجاعا كەنەلۋدى ماقسات تۇتقان ول سىبايلاسىمەن بىرگە استىرتىن جوسپارىن جۇزەگە اسىرادى. كەمىندە 50 مىڭ اقش دوللارىن قالتاعا باسامىز دەگەن ويمەن قازاق بوكسىنىڭ قارا نارىن ولتىرگەن ولار 200 مىڭ تەڭگەنى ولجالاۋمەن شەكتەلگەن كورىنەدى.
2004 جىل. سەمەيدەگى «پولكوۆنيك» ارالىندا ءىنىسى ءارى شاكىرتى دارىن سايىندى كەزەكتى جارىسقا ازىرلەپ جاتقان جاس باپكەردى تانىس جىگىتى ىزدەپ كەلىپ, تىسقارى جەرگە شاقىرادى. ءبىراز ۋاقىت وتكەننەن كەيىن ەكەۋى سوزگە كەلىسە الماي, اقىرى جانجالعا ۇلاستى. جەكپە-جەككە شىقسا, جەڭە المايتىنىنا كوزى جەتكەن قارسىلاسى سومكەسىنەن مىلتىعىن شىعاردى. تارس ەتكەن دىبىس الىسقا ەستىلەدى. ءسويتىپ جاسى وتىزعا دا تولماعان ورىمدەي جاس ازامات سايىن جارىق دۇنيەمەن قوش ايتىستى.
2008 جىل. قاڭتاردىڭ 1-نەن 2-نە قاراعان ءتۇنى بوكستان جاستار اراسىندا الەم بىرىنشىلىگىنىڭ جۇلدەگەرى مۇحتار رۇزباەۆتىڭ ماي قىزمەتكەرلەرى قولىنان قازا تاپقانى جايىندا اقپارات ەل-جۇرتتى ەلەڭ ەتكىزدى. ساقشىلاردىڭ سوزىنە سەنسەك, سەيفۋللين كوشەسى مەن رايىمبەك داڭعىلىنىڭ قيىلىسىندا ولار «تويوتا-سيۋرف» كولىگىن توقتاتقان. ىشىنەن اتىپ شىققان ءۇش جىگىت پوليتسەيلەرگە شابۋىل جاساپ, وزدەرىن تارپا باس سالادى. بار پالە سودان باستالعان. ال جابىرلەنۋشى جاق بۇل دايەكتىڭ بارلىعىن جوققا شىعارىپ, ماي قىزمەتكەرلەرى زاڭسىز قارۋ قولداندى دەيدى. قايسىسى راس, قايسىسى وتىرىك ەكەنىن ءدال قازىر ايتۋ قيىن. ونى انىقتاۋ قۇقىق قورعاۋ ورگاندارى قۇزىرىندا. ءبىر انىعى, بۇل جانجالدىڭ اقىرى ادام ولىمىنە اكەپ سوقتىرىپ, ورىمدەي ءبىر ازامات اجال تىرناعىنا ىلىكتى.
اسىلحان بۇسىرمانوۆ توقسانىنشى جىلداردىڭ باسىندا قازاقستانداعى ەڭ مىقتى كيكبوكسشىلاردىڭ ءبىرى سانالعان. تالاي بايراقتى باسەكەدە ەل نامىسىن ابىرويلى قورعاعان ساڭلاق ۇلكەن سپورتتان قول ۇزگەننەن كەيىن تۋعان ولكەسى قوستانايدا جاتتىقتىرۋشىلىق قىزمەت اتقارىپ, جەكە كلۋبىن اشتى. بۇگىنگى تاڭدا قازاقستان سپورتىنىڭ ماقتانىشىنا اينالعان وليمپيادا ويىندارى مەن الەم چەمپيوناتىنىڭ جۇلدەگەرى, ازيانىڭ ءۇش دۇركىن چەمپيونى ۆاسيلي لەۆيتتىڭ العاشقى باپكەرلەرىنىڭ ءبىرى بولعان دا ءدال وسى اسىلحان ەدى.
قايعىلى وقيعا بىلاي وربىگەن: 29 اقپاندا قوستانايداعى «دوبروە» ءدامحاناسىندا 37 جاستاعى اسىلحان بۇسىرمانوۆ جەرگىلىكتى كاسىپكەر ۆالەري الەكسەەۆتىڭ قوس ۇلىمەن جانجالداسىپ قالادى. كاسىبي سپورتشى جاستاردى ساباسىنا تۇسىرەدى. توبەلەس بارىسىندا ءبىرىنىڭ جاعى سىنادى. جابىرلەنۋشى جاق پوليتسياعا ارىز جازادى. بۇسىرمانوۆ ولارعا ماسەلەنى بەيبىت تۇرمەن شەشۋدى ۇسىنادى. بىراق قوس تاراپ ورتاق مامىلەگە كەلمەدى. ارادا بەس كۇن وتكەننەن سوڭ الەكسەەۆ سپورت كەشەنىنىڭ قاسىنا كەلىپ, بۇسىرمانوۆتى دالاعا شاقىرادى. كاسىپكەردىڭ كولىگىنە جاقىنداعان بەتتە مىلتىق اتىلادى.
2008 جىلدىڭ 15 قازانىندا الماتىداعى مومىش ۇلى مەن مارەچكا كوشەلەرىنىڭ قيلىسىنداعى باعدارشامعا Land Cruiser Prado كولىگىنىڭ توقتاعانى سول ەدى, جانىنا كەلىپ ايالداعان قارا ءتۇستى ۆمW-نىڭ تەرەزەسىنەن وق اتىلدى. ەش الاڭسىز وتىرعان ءدجيپتىڭ جۇرگىزۋشىسى, اتاقتى كيكبوكسشى, اسا اۋىر سالماقتا الەم جانە ازيا چەمپيونى اتانعان اسقار كوحانوۆ اۋىر جاراقات الىپ, دەرەۋ №7 كلينيكالىق اۋرۋحاناعا جەتكىزىلدى. ارادا 10 كۇن وتكەننەن سوڭ ول اۋرۋحانادا كوز جۇمدى.
تەرگەۋ امالدارى بارىسىندا مىناداي جايتتار انىقتالادى: 2008 جىلدىڭ قازان ايىنىڭ باسىندا كيكبوكستان الماتى قالاسىنىڭ اشىق بىرىنشىلىگى وتەدى. ايتۋلى جارىستا اسقار كوحانوۆ جەتەكشىلىك ەتەتىن «ماكۋس» كلۋبىنىڭ مۇشەلەرى دە باق سىنايدى. كەزەكتى جەكپە-جەك بارىسىندا كيكىلجىڭ بولىپ, بۇل ىسكە باپكەرلەر دە ارالاسادى. ايگىلى سپورتشى جارىستى ۇيىمداستىرۋشىلار جانە سولاردىڭ جاقتاستارىمەن «جاعا جىرتىسۋعا» دەيىن بارادى. الايدا اراعا تۇسكەن ادامدار قىزۋقاندى جىگىتتەردى اراشالاپ الادى.
سول كۇنى بارلىعى دا ءۇيدى-ۇيىنە امان-ەسەن قايتادى. كەيىننەن بەلگىلى بولعانداي, چەمپيونعا سەس كورسەتكەن الماتىداعى قىلمىستىق توپتىڭ مۇشەلەرى ەكەن. سودان ولار كەك الۋدى كوزدەپ, اسقاردىڭ ءار قادامىن اڭديدى. اقىرىندا ارامزا جوسپارلارىن جۇزەگە اسىرىپ, 45 جاستاعى قازاقتىڭ نار تۇلعالى سپورتشىسىن و دۇنيەگە اتتاندىردى. 22 قاراشادا الماتىداعى سەيفۋللين كوشەسى بويىنداعى تۇنگى كلۋبتاردىڭ بىرىندە تانىمال بوكسشى ەۆگەني گاۆريلەنكو ءوزى قۇرالىپتاس جىگىتتەرمەن جانجالداسادى. اشىق ايقاستا وعان ءالى جەتپەيتىندەرىن تۇسىنگەن قارسى جاقتىڭ جىگىتتەرى مىلتىق اتادى.
2009 جىل. 9 تامىزدا شاحتينسكىدە بولعان قاندى وقيعا دا ءدامحانادا شىققان داۋدان باستالدى. جەرگىلىكتى جاستار ءبىر-بىرىمەن ءتىل تابىسا المادى. ەكى جاقتىڭ دا مامىلەگە كەلەتىن ءتۇرى جوق. ەرتەسىنە ولار كەزدەسەتىن جەردى بەلگىلەپ, جاندارىنا جورا-جولداستارىن جينايدى. دوستارىنا قولداۋ كورسەتۋ ءۇشىن قاراعاندىدان اسا دارىندى بوكسشى, جاستار اراسىنداعى ازيانىڭ ءۇش دۇركىن چەمپيونى, الەم بىرىنشىلىگىنىڭ كۇمىس جۇلدەگەرى ەرمەك سەرىكوۆ تە كەلەدى. كەشكى ساعات 20:00-دە شاحتينسكى قالاسىنا كىرە-بەرىستەگى جانار-جاعارماي قۇيۋ بەكەتىنە توقتاعاندا, قارسىلاستارى سول جەردەن كۇتىپ الادى. بىردەن وق جاۋدىرادى. كوپ وقتىڭ ءبىرى ەرمەككە تيەدى. بەكەت كاسسيرى پوليتسياعا تەلەفون شالادى.
سول مەزەتتە قارسى جاق كولىكتەرىنە ءمىنىپ, تايىپ تۇرادى. بوكسشى اۋرۋحاناعا جەتكىزىلگەنىمەن, كەلەسى كۇنى كوز جۇمدى. ول نەبارى 20 جاستا ەدى... كوپ ۇزاماي ەرمەك سەرىكوۆتى اتقان جىگىت ۇستالىپ, 7,5 جىلعا باس بوستاندىعىنان ايىرىلادى. الايدا ۆلاديمير شەپين تەمىر قاپاستا كوپ تۇراقتامادى. ارادا ءبىراز ۋاقىت وتكەننەن كەيىن ونىڭ تۇرمەدە ءجانتاسىلىم ەتكەنى بەلگىلى بولدى.
2013 جىل. ماۋسىم ايىندا ماڭعىستاۋ وبلىسى اۋماعىندا ازاماتتىق اۋە اۆياتسياسىنىڭ بۇرىنعى باسشىسى مۇحيت قۇباەۆ پەن الماتى قالالىق ىشكى ىستەر دەپارتامەنتىنىڭ ەكس-ورىنباسارى, كاراتەدەن الەم چەمپيونى سەرىك ءبيمۇرزيننىڭ ءمايىتى تابىلدى. كەيىن بەلگىلى بولعانداي ولاردى ءبىزدىڭ ەلدە ناپاقاسىن تاۋىپ جۇرگەن وزبەكستاننىڭ تۋماسى اتىپ ولتىرگەن. كوپ ۇزاماي قىلمىسكەر قاراقالپاقستاندا قولعا ءتۇستى. الايدا سول جەردە ول ءوز-وزىنە قول جۇمساعان ەكەن.
وسىلاي جالعاستىرا بەرسەك, اڭگىمەنىڭ تىم ۇزاققا سوزىلاتىن ءتۇرى بار. بۇگىنگى ماقالامىزدا ءبىز تەك داڭقى الىسقا جايىلعان نەمەسە كەزىندە ەلدى دۇرلىكتىرگەن وقيعالاردى عانا باياندادىق. ارينە, ادام قولىنان قازا تاپقان سپورتشىلاردىڭ سانى بۇدان دا كوپ...
عالىم سۇلەيمەن,
«ەگەمەن قازاقستان»
الماتى
