«بيىلعى ءبىرىنشى جارتىجىلدىقتا وڭدەۋ سەكتورى وتكەن جىلدىڭ سايكەس كەزەڭىمەن سالىستىرعاندا 5,2%-كە ءوستى. يندۋستريالىق دامۋدىڭ نەگىزگى كورسەتكىشتەرى بويىنشا دا وڭ ديناميكا بايقالىپ وتىر. بيىلعى قاڭتار-اقپان ايلارىندا بۇل كورسەتكىش 2017 جىلدىڭ سايكەس كەزەڭىمەن سالىستىرعاندا 22,1%-كە ارتىپ, 2,5 ملرد اقش دوللارىنا جەتتى. 2018 جىلدىڭ قاڭتار-ماۋسىمىندا وڭدەۋ ونەركاسىبىنە سالىنعان ينۆەستيتسيا كولەمى 18,2%-كە ءوسىپ, 532,8 ملرد تەڭگەنى قۇرادى», دەپ اتاپ ءوتتى ج.قاسىمبەك.
يندۋستريالاندىرۋ باستالعالى بەرى (2010-2017جج.) بارلىعى 6,6 ترلن تەڭگە بولاتىن 1148 جوبا ىسكە قوسىلىپ, 107 مىڭ تۇراقتى جۇمىس ورنى اشىلدى. بيىل جالپى سوماسى 850 ملرد تەڭگە بولاتىن 123 جوبانى ىسكە قوسۋ جوسپارلانىپ وتىر. وندا 14 مىڭنان استام جۇمىس ورنى اشىلاتىن بولادى. ۆەدومستۆو باسشىسىنىڭ اقپاراتى بويىنشا, بيىلعى 1-توقساندا تىكەلەي شەتەلدىك ينۆەستيتسيانىڭ جالپى اعىنى 6,7 ملرد دوللاردى قۇراپ, 24,4%-كە ءوستى.
«يندۋستريالاندىرۋ باعدارلاماسى اياسىنداعى سالالار ينۆەستيتسيا ءۇشىن تارتىمدى بولىپ كەلەدى. تىكەلەي شەتەلدىك ينۆەستيتسيا قۇرىلىمىندا وڭدەۋ ونەركاسىبىنىڭ ۇلەسى شامامەن
3 ەسە ءوستى. نەگىزگى كاپيتالعا سالىنعان ينۆەستيتسيالاردىڭ جالپى كولەمى 2018 جىلدىڭ 6 ايىندا 4,5 ترلن تەڭگەنى قۇرادى. بۇل وتكەن جىلدىڭ سايكەس كەزەڭىمەن سالىستىرعاندا 25,8%-كە ارتىق. ءبىز 59 ميلليارد دوللاردان اساتىن 658 ينۆەستيتسيالىق جوبانىڭ نەگىزگى تىزبەسىن قۇردىق, بۇل 2020 جىلعا دەيىن جۇزەگە اسىرىلادى», دەدى ينۆەستيتسيالىق جوبالار تۋرالى ايتقان مينيستر.
قۇرىلىس سالاسىندا بيىل 12,1 ملن شارشى مەتر تۇرعىن ءۇيدى نەمەسە 103 مىڭنان استام باسپانانى پايدالانۋعا بەرۋ جوسپارلانىپ وتىر. تۇرعىن ءۇي قۇرىلىسىنا 513,3 ملرد تەڭگە ينۆەستيتسيا سالىندى. بۇل وتكەن جىلعىدان 28,4%-كە جوعارى. رەسپۋبليكا بويىنشا 49 667 باسپانا پايدالانۋعا بەرىلدى, ونىڭ ىشىندە 20 532 جەكە ءۇي بار.
«مەملەكەت باسشىسىنىڭ باستاماسى بويىنشا يپوتەكانى ودان ءارى دامىتۋ جانە تولەم قابىلەتى بار حالىقتى قولداۋ ماقساتىندا «7 – 20 – 25» جاڭا يپوتەكالىق نەسيەلەندىرۋ باعدارلاماسى ەنگىزىلدى. تومەن پايىزدى يپوتەكا جاڭا قۇرىلىستان باسپانا الۋعا بەرىلەدى. ۇلتتىق بانكتىڭ دەرەگى بويىنشا بيىل 4 شىلدەدەن باستاپ كرەديتتىك كوميسسيانىڭ قاراۋىنا وتىنىشتەر تۇسە باستادى. بۇگىندە 148 ءوتىنىش جولدانىپ, 1,1 ملرد تەڭگە بولاتىن 95 يپوتەكالىق كرەديتتى بەرۋ ماقۇلداندى», دەپ حابارلادى مينيستر ج. قاسىمبەك.
ەلىمىزدىڭ كولىك سالاسى دا ءوسىم ديناميكاسىن كورسەتىپ وتىر. بارلىق كولىك تۇرلەرىمەن جۇك تاسىمالداۋ كولەمى 6,4%-كە ءوسىپ, 1,8 ملرد توننانى قۇرادى. 6 ايدىڭ قورىتىندىسى بويىنشا ءترانزيتتىڭ جالپى كولەمى 8,5 ملن تونناعا جەتتى. بۇل 2017 جىلدىڭ (7,8 ملن توننا) سايكەس كەزەڭىندەگى كورسەتكىشتەن 9%-كە ارتىق. كونتەينەرلىك تاسىمال كولەمى 206 مىڭ كونتەينەردى قۇراپ, وتكەن جىلدىڭ سايكەس كەزەڭىمەن سالىستىرعاندا 40%-كە ارتتى (2017 جىلدىڭ 1 جارتىجىلدىعىندا – 148 مىڭ جفە). سونىڭ ىشىندە قىتاي – ەۋروپا – قىتاي باعىتى بويىنشا اتالعان كورسەتكىش 101 مىڭ كونتەينەرگە جەتتى. بۇل 38%-كە ارتىق (73,1 مىڭ جفە). ازاماتتىق اۆياتسيا سالاسىندا جولاۋشىلار اعىنىنىڭ تۇراقتى ءوسىم قارقىنى ساقتالۋدا. 2018 جىلدىڭ 6 ايىندا تاسىمالدانعان اۋە جولاۋشىلارىنىڭ ءوسىمى 19%-ءتى نەمەسە 3,8 ملن ادامدى قۇرادى (2017 جىلى 3,2 ملن ادام). حالىقارالىق باعىتتارعا ۇشۋ گەوگرافياسى كەڭەيۋدە.
«بىلتىر 10 جاڭا حالىقارالىق اۋە قاتىناسى اشىلدى. بيىل جىل باسىنان بەرى 12 حالىقارالىق مارشرۋت اشىلدى. ونىڭ ىشىندە قازاقستاندىق اۋە تاسىمالداۋشىلار اتىراۋ – فرانكفۋرت, استانا – قازان, استانا – تۇمەن, استانا – ۆيلنيۋس, استانا – چەليابى, استانا – كراسنودار, استانا –توم, استانا – سوچي باعىتتارىن ورىندايدى. سونداي-اق شەتەلدىك تاسىمالداۋشىلار ورىندايتىن ريگا – الماتى («AirBaltic»), ءنوۆوسىبىر – پاۆلودار («سيبير»), كراسنويار – الماتى («انگارا»), ماسكەۋ – قىزىلوردا («اەروفلوت») جاڭا اۋە مارشرۋتتارى اشىلدى», دەپ اتاپ ءوتتى ج.قاسىمبەك.
راۋان قايدار,
«ەگەمەن قازاقستان»
