ەلباسى جولداۋىندا «2018 جىلدىڭ 1 شىلدەسىنەن باستاپ كامەلەتكە تولعان, بالا كەزىنەن ءبىرىنشى توپتاعى مۇگەدەكتەردى باعىپ وتىرعان اتا-انالار ءۇشىن قوسىمشا مەملەكەتتىك جاردەماقىنى ەنگىزۋدى تاپسىرامىن», دەگەن بولاتىن.
سوعان سايكەس, جاردەماقىنىڭ مولشەرى اعىمداعى جىلى ەڭ تومەنگى كۇنكورىس دەڭگەيىنەن 1,05 نەمەسە 29 699 تەڭگەنى قۇراماق. سونداي-اق جاردەماقى 18 جاستان اسقان, بالا كەزىنەن ءبىرىنشى توپتاعى مۇگەدەككە كۇتىمدى جۇزەگە اسىراتىن ادامدارعا تولەنەدى. اتاپ وتكەن ءجون, بارلىق ءتيىستى الەۋمەتتىك تولەمدەر مۇگەدەكتەر ءۇشىن ساقتالادى. جاردەماقى بالا كەزىنەن ءبىرىنشى توپتاعى مۇگەدەك نەمەسە ونىڭ زاڭدى وكىلى جۇگىنگەن كۇننەن باستاپ بالا كەزىنەن ءبىرىنشى توپتاعى مۇگەدەكتىك بەلگىلەنگەن بارلىق كەزەڭگە تاعايىندالادى.
ەڭبەك جانە حالىقتى الەۋمەتتىك قورعاۋ مينيسترلىگى وكىلدەرىنىڭ ايتۋىنشا, جاڭا فورماتتاعى جۇيە الەۋمەتتىك كومەكتى كۇشەيتۋدى, بەرىلەتىن جاردەماقىلاردى بىرىكتىرە وتىرىپ, ازاماتتار ءۇشىن وڭتايلاندىرۋدى جانە ولاردىڭ مولشەرىن كوبەيتۋ ماسەلەلەرىن شەشەتىن بولادى. «بالالى وتباسىلارعا بەرىلەتىن مەملەكەتتىك جاردەماقىلار تۋرالى» زاڭعا ءبىرىنشى توپتاعى مۇگەدەككە بالا كەزىنەن كۇتىم جاسايتىن 18 جاستان اسقان ادامدارعا ارنالعان جاڭا جاردەماقىنى ەنگىزۋ نورمالارى بەكىتىلدى», دەدى مينيستر م.ابىلقاسىموۆا.
جاردەماقىنىڭ ءومىر بويىنا تاعايىندالاتىنى دا جارىمجان جاندارعا مورالدىق ءارى ماتەريالدىق كومەك دەپ ءبىلۋىمىز كەرەك. تەك كامەلەتكە تولماعاندار, جۇيكە اۋرۋى مەن ناركولوگيالىق ديسپانسەردە تىركەۋدە تۇرعاندار قامقورشى بولا المايدى. سونىمەن قاتار سوت ارەكەتىنە قابىلەتسىز نەمەسە قابىلەتتىگى شەكتەۋلى دەپ تانىلعاندارعا دا مۇگەدەككە كۇتىم كورسەتۋ بويىنشا جاردەماقى تولەنبەيدى.
الەۋمەتتىك كومەك دەپارتامەنتى ديرەكتورىنىڭ ورىنباسارى بالجان باياحاتوۆانىڭ ايتۋىنشا, ءبىر وتباسىندا ەكى مۇگەدەك بولسا, مۇگەدەكتى باعىپ وتىرعان ءار ادامعا جاردەماقى تولەنەدى. وتباسىندا ەكى نە ودان دا كوپ بالا ءى توپتاعى مۇگەدەك بولاتىن بولسا, جاردەماقى ارقايسىسىنا تولەنەدى. «ەگەر دە ولاردى ءبىر ەمەس, بىرنەشە ادام باعىپ وتىراتىن بولسا, تەك سول باعىپ وتىرعان ادامعا تولەنەدى», دەيدى ول. الداعى ۋاقىتتا اتالعان الەۋمەتتىك كومەكتى 14 مىڭنان استام وتباسى الادى دەپ كۇتىلۋدە. بۇعان دەيىن ءى توپتاعى مۇمكىندىگى شەكتەۋلى جاندار 18 جاسقا تولعان سوڭ ولاردىڭ اتا-انالارىنا تولەنەتىن جاردەماقى توقتاتىلاتىن.
جاقسى جاڭالىققا استانا قالاسىنىڭ تۇرعىنى ناعيما جۇمابەك ەسىمدى انا ءوز ريزاشىلىعىن ءبىلدىردى. ونىڭ 28 جاستاعى ۇلى ەرجان – ءى توپتاعى مۇگەدەك. «بالامدى باعىپ-قاعۋعا شامام جەتكەنىمەن, كۇتىمىنە قاراجات كەرەك. مەملەكەتتىڭ وسىنداي جاندارعا قامقورلىق جاساعانى وتە قۇپتارلىق ءىس. ەگەر ونىڭ ءوزىنىڭ دەنساۋلىعى جاقسى بولىپ, جۇمىس ىستەپ سول قاراجاتتى ءوزى تاپسا, ودان ارتىق باقىت بولماس ەدى. بىراق مۇگەدەك بولعان سوڭ ۇيدە وتىر. وعان كۇندىز-ءتۇنى كۇتىم كەرەك. قاراۋسىز قالدىرۋعا بولمايدى. اسپاز بولىپ تۇنگى اۋىسىمدا ىستەيمىن. كۇندىز مەن, تۇندە اكەسى قارايدى. بىلتىر پاتەر الدىق. ەندى جاردەماقى تاعايىندالىپ جاتىر. وسىنىڭ ءبارى مەملەكەتتىڭ جاناشىرلىعى دەپ بىلەمىز», دەيدى ەرجاننىڭ اناسى.
تاعى ءبىر ايتا كەتەرلىگى, قامقورشىلاردى جىلىنا ەكى رەت اۋىستىرۋعا بولادى. سونداي-اق ولار مۇمكىندىگى شەكتەۋلى اداممەن بىرگە نەمەسە جاقىن ماڭدا تۇرۋعا مىندەتتى دەپ سانالادى. جاڭا جاردەماقى سونداي-اق ايەلدىڭ مۇگەدەك بالاسىنا كۇتىم جاساعان جىلدارى زەينەتكە شىققاندا ەڭبەك وتىلىنە قوسىلادى. بۇل ماقساتقا رەسپۋبليكالىق بيۋدجەتتەن 2,7 ميلليارد تەڭگە قاراستىرىلعان. ايتا كەتسەك, بۇگىنگى تاڭدا بالا كەزدەن ءبىرىنشى توپتاعى مۇگەدەك ادامدارعا بەرىلەتىن مەملەكەتتىك الەۋمەتتىك جاردەماقىنىڭ مولشەرى – 54 306 تەڭگە.
ميراس اسان,
«ەگەمەن قازاقستان»
