جوقتاۋ ايتقان جۇرتتىڭ جۇرەگى تىنشۋ تابار ەمەس. ايناداي ايدىندا سىناپتاي سىرعىپ وتە شىققان ومىرىڭدەگى جەتىستىگىڭدى جىپكە ءتىزىپ قانا كولكىگەن كوز جاسىن سىعىپ, كوڭىلىن الدارقاتقان بولادى. دەنيس تەننىڭ ەلىنە بەرگەنىنەن بەرەرى, ءالى دە ەڭسەرەر بەلەسى كوپ ەدى. وكىنىشكە قاراي, الماتى قالاسىنىڭ قاق ورتاسىندا قانىپەزەرلەردىڭ قولىنان قاپىدا قازا تاپتى. اجالعا اراشا تۇسكەن دارىگەرلەر بارىن سالىپ باققانمەن, ساڭلاقتىڭ ءومىرىن ساقتاپ قالا المادى. قازاقتىڭ ۇرانىنا, ۇلتتىڭ ۇلانىنا اينالعان ۇلى سپورتشى قامشىنىڭ سابىنداي عۇمىرىندا اتىن كۇللى الەمگە ايگىلەپ كەتتى. قازاقستان سپورتى تاريحىندا مانەرلەپ سىرعاناۋدان حالىقارالىق دودالاردا بۇعان دەيىن وزا شاۋىپ, ولجا سالعان ەشكىم بولعان جوق. دەنيس - جەڭىس تۇعىرىنان تۇسپەگەن سايىپقىران ەدى.
تەكتى تۋعان تەن - حالىقارالىق دارەجەدەگى سپورت شەبەرى. ول 2010 جىلى كانادانىڭ ۆانكۋۆەر قالاسىندا وتكەن ءححى قىسقى وليمپيادا ويىندارىندا ونەر كورسەتىپ, مانەرلەپ سىرعاناۋدان فينالدىق كەزەڭگە وتكەن قازاقستاننىڭ تۇڭعىش سپورتشىسى. 2013 جىلى الەم چەمپيوناتىنىڭ كۇمىس جۇلدەگەرى اتاندى. 2014 جىلعى قىسقى وليمپيادا ويىندارىندا جانە 2015 جىلعى جاھاندىق جارىستا قولا مەدالعا قول جەتكىزدى. مانەرلەپ سىرعاناۋدان ءتورت قۇرلىق دوداسىنىڭ, VII قىسقى ازيا ويىندارىنىڭ جانە قازاقستاننىڭ ءۇش دۇركىن چەمپيونى. حالىقارالىق كونكيشىلەر قاۋىمداستىعى رەيتينگىندە ۇزدىك ۇشتىكتى تۇيىندەدى.
ءبىرتۋار سپورت شەبەرى "دەنيس جانە ونىڭ دوستارى" دەپ اتالعان ءداستۇرلى عالامات شوۋىن بيىل ءتورتىنشى مارتە وتكىزىپ, استانانىڭ 20 جىلدىق مەرەيتويىنا ارنادى. تاماشا قويىلىم كورسەتۋگە رەسەي, فرانتسيا, اقش, كانادا, قىتاي مەن جاپونيادان مانەرلەپ سىرعاناۋدىڭ جۇمىر جەردەگى جۇلدىزدارى كەلدى. «بارىس ارەناداعى» كەرەمەت كەشتە ول ەرەكشە ەرىك-جىگەر, تىڭ سەرپىنمەن ونەر كورسەتتى. بۇل ونىڭ مۇز ايدىنداعى ەركىن سامعاعان ەڭ سوڭعى ءساتى ەكەن.
ءيا, ونىڭ جاراقاتى جانىنا باتسا دا, ەل نامىسى ءۇشىن دودالاردا دارا شاپقان شاعى كوپ. ءوزىمدى الماستىراتىن سىرعاناۋشى بولسا ەكەن دەۋمەن ەسىل ەر ارماندا كەتتى. وسى ولقىلىقتىڭ ورىنىن تولتىرۋ ءۇشىن وزىمەن وكشەلەس ورەندەرگە بار ونەرىن ۇيرەتىپ باققان دەنيس 2010 جىلى شەبەرلىك سىنىبىن وتكىزۋدى باستاعان بولاتىن. بالا شاقتان بالاڭ ارمان العا جەتەكتەگەن البىرت جاستار اراسىنان الەمدىك دودالاردا ءانۇرانىمىزدى اۋەلەتىپ, العى شەپتەن كورىنەتىن شەبەرلەر شىعاتىنىنا كامىل سەنەتىن. اتتەڭ, مەزگىلسىز اجال مەجەگە جەتكىزبەي, قاعىلەز قارا بالا قاپىدا مەرت بولدى.
بارشا قازاقستان حالقىنا ورتاق قايعىلى قازاعا قابىرعاسى قايىسىپ, ازالى وي تولعاعان تورعايلىق اقىن سايات ابەننىڭ ولەڭى ولىمگە وزەگى ورتەنگەن جۇرتتىڭ وكسىگىن جەتكىزىپ تۇرعانداي:
وتكىنشى ءومىر دەيتىن مايداندا بۇل,
سوعارىن كىم بىلەدى قايدان داۋىل؟!
كولىكتىڭ ايناسى ءۇشىن اجال قۇشتى,
قازاقتىڭ ايناسىنا اينالعان ۇل.
ەرىكسىز كوزىمىزگە جاس كەلەدى,
ەلىمە ارنالاتىن باستى ونەرى.
ماڭگىلىك قوش ايتىستى ومىرمەنەن,
مانەرلەپ سىرعاناۋدىڭ حاس شەبەرى.
ايناداي ايدىندا ايقىن ءىز قالدىرعان التىن اسىقتاي ۇل شارىققا ۇستاعان شاربولاتتاي لىپىپ تۇرۋشى ەدى. جاسىنداي جارق ەتكەن جاس عۇمىر نەبارى جيىرما بەسىندە قىرشىنىنان قيىلدى. «جازمىشتان وزمىش جوق». ەل بوپ ەڭىرەپ, جۇرت بوپ جوقتاساق تا مۇزداعى مۇزبالاقتىڭ ورىنى ويسىراپ تۇرارى وكىنىشتى! جارقىن بەينەڭ جاسامپاز حالقىمىزدىڭ جادىندا جاتتالىپ, ساناسىندا ساقتالىپ قالارى حاق. سەنىڭ بيىك تۇعىرداعى تۇما بۇلاقتاي تۇنىق تۇلعاڭ وزىڭە قاراپ بوي تۇزەگەن بولاشاق چەمپيوندار ءۇشىن بويتۇمار بولارى ءسوزسىز. دەسەك تە... دەنيس... جەڭىس جولىنا جەتەلەگەن جەتكىنشەكتەر ۇلتىمىزدى ۇلىقتايتىن ۇلى مۇراتىڭا جەتكىزەرى ايدان انىق!
اسپان بۇلتسىز بولمايدى,
بۇلتتى جارىپ كۇن شىعار!
ايدىنعا ورنەك سالاتىن
قازاقتان سەندەي ۇل شىعار!
.... باقۇل بول, قازاقتىڭ دەنيسى!
امانگۇل ەرمەكقىزى,
سەرىك ءابدۋالى,
«قازاق راديولارى» جشس ۇجىمى اتىنان
